Taittiriyabrahmana 3.9.14
Taittirīyabrāhmaṇa 3.9.14
- Language
- Sanskrit
3.9.14.1
ápa vā́ etásmāt_śrī́ rāṣṭráṃ krāmati /
yò 'śvamedhéna yájate /
brāhmaṇáu vīṇāgāthínau gāyataḥ /
śriyā́ vā́ etád rūpám /
yád vī́ṇā /
śríyam evā́smin tád dhattaḥ /
yadā́ khálu vái púruṣaḥ śríyam aśnuté /
vī́ṇā_asmai vādyate //
tád āhuḥ /
yád ubháu brāhmaṇáu gā́yetām //
3.9.14.2
prabhrám̐śukā_asmāt_śrī́ḥ syāt /
ná vái brāhmaṇé śrī́ ramata íti /
brāhmaṇò 'nyó gā́yet /
rājanyò 'nyáḥ /
bráhma vái brāhmaṇáḥ /
kṣatrám̐ rājanyàḥ /
táthā hāsya bráhmaṇā ca kṣatréṇa ca_ubhayátaḥ śrī́ḥ párigṛhītā bhavati //
tád āhuḥ /
yád ubháu dívā gā́yetām /
ápāsmād rāṣṭráṃ krāmet /
3.9.14.3
ná vā́ brāhmaṇé rāṣṭrám̐ ramata íti /
yadā́ khálu vái rā́jā kāmáyate /
átha brāhmaṇáṃ jināti /
dívā brāhmaṇó gāyet /
náktam̐ rājanyàḥ /
bráhmaṇo vái rūpám áhaḥ /
kṣatrásya rā́triḥ /
táthā hāsya bráhmaṇā ca kṣatréṇa ca_ubhayáto rāṣṭráṃ párigṛhītaṃ bhavati //
íty adadā íty ayajathā íty apaca íti brāhmaṇó gā́yet /
iṣṭāpūrtáṃ vái brāhmaṇásya /
3.9.14.4
iṣṭāpūrténa_eváinam̐ sá sámardhayati //
íty ajinā íty ayudhyathā íty amúm̐ saṃgrāmám ahann íti rājanyàḥ /
yuddháṃ vái rājanyàsya /
yuddhéna_eváinam̐ sá sámardhayati //
ákḷptā vā́ etásya_ṛtáva íty āhuḥ /
yò 'śvamedhéna yájata íti /
tisrò 'nyó gā́yati tisrò 'nyáḥ /
ṣáṭt sámpadyante /
ṣáḍ vā́ ṛtávaḥ /
ṛtū́n evā́smai kalpayataḥ //
tā́bhyām̐ sam̐sthā́yām /
anoyukté ca śaté ca dadāti /
śatā́yuḥ púruṣaḥ śata_índriyaḥ /
ā́yuṣy evá_indriyé prátitiṣṭhati //
Commentaries (5)
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (1)
- A Vedic Concordance — Maurice Bloomfield, English