Taittiriyabrahmana 3.9.16

Taittirīyabrāhmaṇa 3.9.16

Language: Sanskrit

3.9.16.1

vāruṇó vā́ áśvaḥ /
táṃ devátayā vyàrdhayati /
yát prājāpatyáṃ karóti /
námo rā́jñe námo váruṇāya_íty āha /
vāruṇó vā́ áśvaḥ /
sváyā_eváinaṃ devátayā sámardhayati //
námó 'śvāya námaḥ prajā́pataya íty āha /
prājāpatyó vā́ áśvaḥ /
sváyā_eváinaṃ devátayā sámardhayati //
námo 'dhipataya íty āha /

3.9.16.2

dhármo vā́ ádhipatiḥ /
dhármam evā́varundhe //
ádhipatir asy ádhipatiṃ mā kurv ádhipatir aháṃ prajā́nāṃ bhūyāsam íty āha /
ádhipatim eváinam̐ samānā́nāṃ karoti //
mā́ṃ dhehi máyi dhehī́ty āha /
āśíṣam eváitām āśāste //
upā́kṛtāya svā́hā_íty upā́kṛte juhoti /
ā́labdhāya svā́hā_íti níyukte juhoti /
hutā́ya svā́hā_íti huté juhoti /
eṣā́ṃ lokā́nām abíjityai //

3.9.16.3

prá vā́ eṣá ebhyó lokébhyaś cyavate /
yò 'śvamedhéna yájate /
āgneyám aindrāgnám āśvinám /
tā́n paśū́n ā́labhate prátiṣṭhityai //
yád āgneyó bhávati /
agníḥ sárvā devátāḥ /
devátā evā́varundhe //
brahma vā́ agníḥ /
kṣatrám índraḥ /
yád aindrāgnó bhávati /

3.9.16.4

brahmakṣatré evā́varundhe //
yád āśvinó bhávati /
āśíṣām ávaruddhyai //
tráyo bhavanti /
tráya imé lokā́ḥ /
eṣv èvá lokéṣu prátitiṣṭhati //
agnáye 'm̐homúce 'ṣṭā́kapāla íti dáśahaviṣam íṣṭiṃ nírvapati /
dáśākṣarā virā́ṭ /
ánnaṃ virā́ṭ /
virā́jā_evā́nnā́dyam ávarundhe //
agnér manve prathamásya prácetasa íti yājyānuvākyā̀ bhavanti sarvatvā́ya //

Commentaries (4)

Taittirīyabrāhmaṇabhāṣya (Sāyaṇa) — Sāyaṇa, Sanskrit
Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
Taittirīyabrāhmaṇaṭīkā — Sanskrit

Linked texts (4)

Aśvamedhabhāṣya — Bhaṭṭabhāskara Miśra, Sanskrit
A Vedic Concordance — Maurice Bloomfield, English
Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī) — Sanskrit
Die Religion des Veda — Hermann Oldenberg, German