Pramāṇa · Search · About · API

Taittiriyabrahmana 3.9.17

Taittirīyabrāhmaṇa 3.9.17

Language
Sanskrit

3.9.17.1

yády áśvam upatápad vindét /
āgneyám aṣṭā́kapālaṃ nírvapet /
saumyáṃ carúm /
sāvitrám aṣṭā́kapālam //
yád āgneyó bhávati /
agníḥ sárvā devátāḥ /
devátābhir eváinaṃ bhiṣajyati //
yát saumyó bhávati /
sómo vā́ óṣadhīnām̐ rā́jā /
yā́bhya eváinaṃ vindáti /

3.9.17.2

tā́bhir eváinaṃ bhiṣajyati //
yát sāvitró bhávati /
savitṛ́prasūta eváinaṃ bhiṣajyati //
etā́bhir eváinaṃ devátābhir bhiṣajyati /
agadó ha_evá bhavati //
pauṣṇáṃ carúṃ nírvapet /
yádi śloṇáḥ syā́t /
pūṣā́ vái śláuṇyasya bhiṣák /
sá eváinaṃ bhiṣajyati /
áśloṇo ha_evá bhavati //

3.9.17.3

raudráṃ carúṃ nírvapet /
yádi mahatī́ devátā_abhimányeta /
etaddevatyò vā́ áśvaḥ /
sváyā_eváinaṃ devátayā bhiṣajyati /
agadó ha_evá bhavati //
vaiśvānaráṃ dvā́daśakapālaṃ nírvapen mṛgākharé yádi ná_āgácchet /
iyáṃ vā́ agnír vaiśvānaráḥ /
iyám eváinam arcíbhyāṃ pariródham ā́nayati /
ā́ ha_evá sútyam áhar gacchati //
yády adhīyā́t /

3.9.17.4

agnáyé 'm̐homúce 'ṣṭā́kapālaḥ /
sauryáṃ páyaḥ /
vāyavyà ā́jyabhāgaḥ //
yájamāno vā́ áśvaḥ /
ám̐hasā vā́ eṣá gṛhītáḥ /
yásyā́śvo médhāya prókṣito 'dhyéti /
yád am̐homúce nirvápati /
ám̐hasa evá téna mucyate //
yájamāno vā́ áśvaḥ /
rétasā vā́ eṣá vyṛ̀dhyate /

3.9.17.5

yásyā́śvo médhāya prókṣito 'dhyéti /
sauryám̐ rétaḥ /
yát sauryáṃ páyo bhávati /
rétasā_eváinam̐ sá sámardhayati //
yájamāno vā́ áśvaḥ /
gárbhair vā́ eṣá vyṛ̀dhyate /
yásyā́śvo médhāya prókṣito 'dhyéti /
vāyavyā̀ gárbhāḥ /
yád vāyavyà ā́jyabhāgo bhávati /
gárbhair eváinam̐ sá sámardhayati //
átho yásya_eṣā́śvamedhé prā́yaścitiḥ kriyáte /
iṣṭvā́ vásīyān bhavati //

Commentaries (4)

Linked texts (5)