Taittiriyabrahmana 3.9.2
Taittirīyabrāhmaṇa 3.9.2
- Language
- Sanskrit
3.9.2.1
prajā́patir akāmayata_ubháu lokā́v ávarundhīya_íti /
sá etā́n ubháyān paśū́n apaśyat /
grāmyā́m̐ś ca_āraṇyā́m̐ś ca /
tā́n ā́labhata /
táir vái sá ubháu lokā́v ávārundha /
grāmyáir evá paśúbhir imáṃ lokám ávārundha /
āraṇyáir amúm /
yád grāmyā́n paśū́n ālábhate /
imám evá táir lokám ávarundhe /
yád āraṇyā́n /
3.9.2.2
amúṃ táiḥ //
ánavaruddho vā́ etásya saṃvatsará íty āhuḥ /
yá itá_itaś cāturmāsyā́ni saṃvatsaráṃ prayuṅktá íti /
etā́vān vái saṃvatsaráḥ /
yác cāturmāsyā́ni /
yád eté cāturmāsyā́ḥ paśáva ālabhyánte /
pratyákṣam evá táiḥ saṃvatsaráṃ yájamānó 'varundhe //
ví vā́ eṣá prajáyā paśúbhir ṛdhyate /
yáḥ saṃvatsaráṃ prayuṅkté /
saṃvatsaráḥ suvargó lokáḥ /
3.9.2.3
suvargáṃ tú lokáṃ nā́parādhnoti /
prajā́ vái paśáva ekādaśínī /
yád etá aikādaśinā́ḥ paśáva ālabhyánte /
sākṣā́d evá prajā́ṃ paśū́n yájamānó 'varundhe //
prajā́patir virā́jam asṛjata /
sā́ sṛṣṭā́_aśvamedháṃ práviśat /
tā́ṃ daśíbhir ánu prā́yuṅkta /
tā́m āpnot /
tā́m āptvā́ daśíbhir ávārundha /
yád daśína ālabhyánte /
3.9.2.4
virā́jam evá táir āptvā́ yájamānó 'varundhe //
ekādaśa daśáta ā́labhyante /
ékādaśākṣarā triṣṭúp /
tráiṣṭubhāḥ paśávaḥ /
paśū́n evā́varundhe //
vaiśvadevó vā́ áśvaḥ /
nānādevatyā̀ḥ paśávo bhavanti /
áśvasya sarvatvā́ya /
nā́nārūpā bhavanti /
tásmān nā́nārūpāḥ paśávaḥ /
bahurūpā́ bhavanti /
tásmād bahurūpā́ḥ paśávaḥ sámṛddhyai //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
Linked texts (2)
- Mādhyandina — Sanskrit
- Aśvamedhabhāṣya — Bhaṭṭabhāskara Miśra, Sanskrit