Pramāṇa · Search · About · API

Taittiriyabrahmana 3.9.22

Taittirīyabrāhmaṇa 3.9.22

Language
Sanskrit

3.9.22.1

prajā́patiṃ vái devā́ḥ pitáram /
paśúṃ bhūtáṃ médhāya_ā́labhanta /
tám ālábhya_úpāvasan /
prātár yáṣṭāsmaha íti /
ékaṃ vā́ etád devā́nām áhaḥ /
yát saṃvatsaráḥ /
tásmād áśvaḥ purástāt saṃvatsará ā́labhyate //
yát prajā́patir ā́labdhó 'śvó 'bhavat /
tásmād áśvaḥ /
yát sadyó médhó 'bhavat //

3.9.22.2

tásmād aśvamedháḥ //
védukó 'śvam āśúṃ bhavati /
yá eváṃ véda //
yád vái tát prajā́patir ā́labdhó 'śvó 'bhavat /
tásmād áśvaḥ prajā́pateḥ paśūnā́m ánurūpatamaḥ //
ā́_asya putráḥ prátirūpo jāyate /
yá eváṃ véda //
sárvāṇi bhūtā́ni sambhṛ́tya_ā́labhate /
sám enaṃ devā́s téjase brahmavarcasā́ya bharanti /
yò 'śvamedhéna yájate /

3.9.22.3

yá u ca_enam eváṃ véda //
etád vái tád devā́ etā́ṃ devátām /
paśúṃ bhūtáṃ médhāya_ā́labhanta /
yajñám evá /
yajñéna yajñám ayajanta devā́ḥ /
kāmapráṃ yajñám akurvata /
tè 'mṛtatvám akāmayanta /
tè 'mṛtatvám agacchan //
yò 'śvamedhéna yájate /
devā́nām evá_ā́yanena_eti /

3.9.22.4

prājāpatyéna_evá yajñéna yajate kāmapréṇa /
ápunarmāram evá gacchati /
etásya vái rūpéṇa purástāt prājāpatyám ṛṣabháṃ tūparáṃ bahurūpám ā́labhate /
sárvebhyaḥ kā́mebhyaḥ /
sárvasya_ā́ptyai /
sárvasya jítyai //
sárvam evá téna_āpnoti /
sárvaṃ jayati /
yò 'śvamedhéna yájate /
yá u ca_enam eváṃ véda //

Commentaries (1)