Pramāṇa · Search · About · API

Taittiriyabrahmana 3.9.4

Taittirīyabrāhmaṇa 3.9.4

Language
Sanskrit

3.9.4.1

yuñjánti bradhnám íty āha /
asáu vā́ ādityó bradhnáḥ /
ādityám evā́smai yunakti /
aruṣám íty āha /
agnír vā́ aruṣáḥ /
agním evā́smai yunakti /
cárantam íty āha /
vāyúr vái cáran /
vāyúm evā́smai yunakti /
páritasthúṣa íty āha /

3.9.4.2

imé vái lokā́ḥ páritasthúṣaḥ /
imán evā́smai lokā́n yunakti //
rócante rocanā́ divī́ty āha /
nákṣatrāṇi vái rocanā́ diví /
nákṣatrāṇy evā́smai rocayati //
yuñjánty asya kā́myā_íty āha /
kā́mān evā́smai yunakti //
hárī vípakṣasā_íty āha /
imé vái hárī vípakṣasā /
imé evā́smai yunakti //

3.9.4.3

śóṇā dhṛṣṇū́ nṛvā́hasā_íty āha /
ahorātré vái nṛvā́hasā /
ahorātré evā́smai yunakti //
etā́ evā́smai devátā yunakti /
suvargásya lokásya sámaṣṭyai //
ketúṃ kṛṇvánn aketáva íti dhvajáṃ prátimuñcati /
yáśa evá_enam̐ rā́jñāṃ gamayati //
jīmū́tasya_iva bhavati prátīkam íty āha /
yathāyajúr evá_etát //
yé te pánthānaḥ savitaḥ pūrvyāsa íty adhvaryúr yájamānaṃ vācayaty abhíjityai //

3.9.4.4

párā vā́ etásya yajñá eti /
yásya paśúr upā́kṛto 'nyátra védyā éti /
etám̐ stotar eténa pathā́ púnar áśvam ā́vartayāsi na íty āha /
vāyúr vái stótā /
vāyúm evā́sya parástād dadhāty ā́vṛttyai //
yáthā vái havíṣo gṛhītásya skándati /
eváṃ vā́ etád áśvasya skandati /
yád asya_upā́kṛtasya lómāni śī́yante /
yád vā́leṣu kācā́n āváyanti /
lómāny evā́sya tát sáṃbharanti //

3.9.4.5

bhū́r bhúvaḥ súvar íti prājāpatyā́bhir ā́vayanti /
prājāpatyó vā́ áśvaḥ /
sváyā_eváinaṃ devátayā sámardhayanti //
bhū́r íti máhiṣī /
bhúva íti vāvā́tā /
súvar íti parivṛktī́ /
eṣā́ṃ lokā́nām abhíjityai //
hiraṇyáyāḥ kācā́ bhavanti /
jyótir vái híraṇyam /
rāṣṭrám aśvamedháḥ /

3.9.4.6

jyótiś ca_evā́smai rāṣṭráṃ ca samī́cī dadhāti //
sahásraṃ bhavanti /
sahásrasaṃmitaḥ suvargó lokáḥ /
suvargásya lokásyābhíjityai //
ápa vā́ etásmāt téja indriyáṃ paśávaḥ śrī́ḥ krāmanti /
yò 'śvamedhéna yájate /
vásavas tvā_añjantu gāyatréṇa chándasā_íti máhiṣy abhyànakti /
téjo vā́ ā́jyam /
téjo gāyatrī́ /
téjasā_evā́smai téjó 'varundhe /

3.9.4.7

rudrā́s tvā_añjantu tráiṣṭubhena chándasā_íti vāvā́tā /
téjo vā́ ā́jyam /
indriyáṃ triṣṭúp /
téjasā_evā́smā indriyám ávarundhe /
ādityā́s tvā_añjantu jā́gatena chándasā_íti parivṛktī́ /
téjo vā́ ā́jyam /
paśávo jágatī /
téjasā_evā́smai paśū́n ávarundhe //
pátnayo 'bhyàñjanti /
śriyā́ vā́ etád rūpám /

3.9.4.8

yát pátnayaḥ /
śríyam evā́smin tád dadhati /
nā́smāt téja indriyáṃ paśávaḥ śrī̀r ápakāmanti //
lā́jī́3n_ śā́cī́3n yáśo mamā́3m̐ ity átiriktam ánnam áśvāya_upā́haranti /
prajā́m evā́nnādī́ṃ kurvate //
etád devā ánnam átta_etád ánnam addhi prajāpata íty āha /
prajā́yām evā́nnā́dyaṃ dadhate //
yádi nā́vajíghret /
agníḥ paśúr āsīd íty ávaghrāpayet /
áva ha_evá jighrati //
ā́krān vājī́ krámair átyakramīd vājī́ dyáus te pṛṣṭháṃ pṛthivī́ sadhástham íty áśvam ánumantrayate /
eṣā́ṃ lokā́nām abhíjityai //
sámiddho añján kṛ́daraṃ mátīnā́m íty áśvasya_āpríyo bhavanti sarūpatvā́ya //

Commentaries (4)

Linked texts (4)