Pramāṇa · Search · About · API

Taittiriyabrahmana 3.9.5

Taittirīyabrāhmaṇa 3.9.5

Language
Sanskrit

3.9.5.1

téjasā vā́ eṣá brahmavarcaséna vyṛ̀dhyate /
yò 'śvamedhéna yájate /
hótā ca brahmā́ ca brahmódyaṃ vadataḥ /
téjasā ca_eváinaṃ brahmavarcaséna ca sámardhayataḥ //
dakṣiṇató brahmā́ bhavati /
dakṣiṇatáāyatano vái brahmā́ /
bārhaspatyó vái brahmā́ /
brahmavarcasám evā́sya dakṣiṇató dadhāti /
tásmād dákṣiṇó 'rdho brahmavarcasítaraḥ //
uttarató hótā bhavati /

3.9.5.2

uttaratáāyatano vái hótā /
āgneyó vái hótā /
téjo vā́ agníḥ /
téja evā́sya_uttarató dadhāti /
tásmād úttaró 'rdhas tejasvítaraḥ //
yū́pam abhíto vadataḥ /
yajamānadevatyò vái yū́paḥ /
yájamānam evá téjasā ca brahmavarcaséna ca sámardhayataḥ //
kím̐ svid āsīt pūrvácittir íty āha /
dyáur vái vṛ́ṣṭiḥ pūrvácittiḥ /

3.9.5.3

dívam evá vṛ́ṣṭim ávarundhe //
kím̐ svid āsīd bṛhád váya íty āha /
áśvo vái bṛhád váyaḥ /
áśvam evā́varundhe //
kím̐ svid āsīt piśaṅgilā́_íty āha /
rā́trir vái piśaṅgilā́ /
rā́trim evā́varundhe //
kím̐ svid āsīt pilippilā_íty āha /
śrī́r vái pilippilā́ /
annā́dyam evā́varundhe //

3.9.5.4

káḥ svid ekākī́ caratī́ty āha /
asáu vā́ ādityá ekākī́ carati /
téja evā́varundhe //
ká u svij jāyate púnar íty āha /
candrámā vái jāyate púnaḥ /
ā́yur evā́varundhe //
kím̐ svid dhimásya bhéṣajám íty āha /
agnír vái himásya bhéṣajám /
brahmavarcasám evā́varundhe //
kím̐ svid āvápanaṃ mahád íty āha /

3.9.5.5

ayáṃ vái loká āvápanaṃ mahát /
asmínn evá loké prátitiṣṭhati //
pṛcchā́mi tvā páram ántaṃ pṛthivyā́ íty āha /
védir vái páró 'ntaḥ pṛthivyā́ḥ /
védim evā́varundhe //
pṛcchā́mi tvā bhúvanasya nā́bhim íty āha /
yajñó vái bhúvanasya nā́bhiḥ /
yajñám evā́varundhe //
pṛcchā́mi tvā vṛ́ṣṇo áśvasya réta íty āha /
sómo vái vṛ́ṣṇo áśvasya rétaḥ /
somapīthám evā́varundhe //
pṛcchā́mi vācáḥ paramáṃ vyòma_íty āha /
bráhma vái vācáḥ paramáṃ vyòma /
brahamvarcasám evā́varundhe //

Commentaries (4)

Linked texts (5)