Pramāṇa · Search · About · API

Taittiriyabrahmana 3.9.6

Taittirīyabrāhmaṇa 3.9.6

Language
Sanskrit

3.9.6.1

ápa vā́ etásmāt prāṇā́ḥ krāmanti /
yò 'śvamedhéna yájate /
prāṇā́ya svā́hā vyānā́ya svā́hā_íti saṃjñapyámāna ā́hutīr juhoti /
prāṇā́n evā́smin dadhāti /
nā́smāt prāṇā́ ápakrāmanti //
ávantīḥ sthā́vantīs tvāvantu /
priyáṃ tvā priyā́ṇām /
várṣiṣṭham ā́pyānām /
nidhīnā́ṃ tvā nidhipátim̐ havāmahe vaso mama_íty āha /
ápa_evā́smai tád dhnuvate /

3.9.6.2

átho dhuvánty evá_enam /
átho ny èvāsmai hnuvate //
tríḥ páriyanti tráya imé lokā́ḥ /
ebhyá evá_enaṃ lokébhyo dhuvate //
tríḥ púnaḥ páriyanti /
ṣáṭ sáṃpadyante /
ṣáḍ vā́ ṛtávaḥ /
ṛtúbhir eváinaṃ dhuvate //
ápa vā́ etébhyaḥ prāṇā́ḥ krāmanti /

3.9.6.3

yé yajñé dhúvanaṃ tanváte /
navakṛ́tvaḥ páriyanti /
náva vái pū́ruṣe prāṇā́ḥ /
prāṇā́n evá_ātmán dadhate /
ná_ebhyaḥ prāṇā́ ápakrāmanti //
ámbe ambāly ámbika íti pátnīm udā́nayati /
áhvata_eváinām //
súbhage kā́mpīlavāsinī_íty āha /
tápa eváinām úpanayati //
suvargé loké sáṃ prórṇvāthām íty āha /

3.9.6.4

suvargám evá_enāṃ lokáṃ gamayati //
ā́_ahám ajāni garbhadhám ā́ tvám ajāsi garbhadham íty āha /
prajā́ vái paśávo gárbhaḥ /
prajā́m evá paśū́n ātmán dhatte //
devā́ vā́ aśvamedhé pávamāne /
suvargáṃ lokáṃ ná prā́jānan /
tám áśvaḥ prā́jānāt /
yát sūcī́bhir asipathā́n kalpáyanti /
suvargásya lokásya prájñātyai //
gāyatrī́ triṣṭúb jágatī_íty āha /

3.9.6.5

yathāyajúr evá_etát /
trayyáḥ sūcyò bhavanti /
ayasmáyyo rajatā́ háriṇyaḥ /
asyá vái lokásya rūpám ayasmáyyaḥ /
antárikṣasya rajatā́ḥ /
divó háriṇyaḥ /
díśo vā́ ayasmáyyaḥ /
avāntaradiśā́ rajatā́ḥ /
ūrdhvā́ háriṇyaḥ /
díśa evā́smai kalpayati //
kás tvā chyati kás tvā víśāstī́ty āhā́him̐sāyai //

Commentaries (4)

Linked texts (6)