Taittiriyabrahmana 3.9.9
Taittirīyabrāhmaṇa 3.9.9
- Language
- Sanskrit
3.9.9.1
prathaména vā́ eṣá stómena rādhvā́ /
catuṣṭoména kṛténā́yānām úttaré 'han /
ekavim̐śé pratiṣṭhā́yāṃ prátitiṣṭhati //
ekavim̐śā́t pratiṣṭhā́yā ṛtū́n anvā́rohati //
ṛtávo vái pṛṣṭhā́ni /
ṛtávaḥ saṃvatsaráḥ /
ṛtúṣv evá saṃvatsaré pratiṣṭhā́ya /
devátā abhyā́rohati /
śákvarayaḥ pṛṣṭháṃ bhavanty anyád_anyac chándaḥ /
anyè_'nye vā́ eté paśáva ā́labhyante /
3.9.9.2
utá_iva grāmyā́ḥ /
utá_iva_āraṇyā́ḥ /
áhar evá rūpéṇa sámardhayati /
átho áhna evá_eṣá balír hriyate //
tád āhuḥ /
ápaśavo vā́ eté /
yád ajāváyaś ca_āraṇyā́ś ca /
eté vái sárve paśávaḥ /
yád gavyā́ íti /
gavyā́n paśū́n uttamé 'hann ā́labhate /
3.9.9.3
téna_evá_ubháyān paśū́n ávarundhe //
prājāpatyā́ bhavanti /
ánabhijitasyābhíjityai //
saurī́r náva śvetā́ vaśā́ anūbandhā̀ bhavanti /
antatá evá brahmavarcasám ávarundhe //
sómāya svarā́jñe 'novā́hā́v anaḍvā́hāv íti dvandvínaḥ paśū́n ā́labhate /
ahorātrā́ṇām abhíjityai //
paśúbhir vā́ eṣá vyṛ̀dhyate /
yò 'śvamedhéna yájate /
chagaláṃ kalmā́ṣaṃ kikidīvíṃ vidīgáyam íti tvāṣṭrā́n paśū́n ā́labhate /
paśúbhir evá_ātmā́nam̐ sámardhayati //
ṛtúbhir vā́ eṣá vyṛ̀dhyate /
yò 'śvamedhéna yájate /
piśaṅgās tráyo vāsantā́ íty ṛtupaśū́n ā́labhate /
ṛtúbhir evá_ātmā́nam̐ sámardhayati //
ā́ vā́ eṣá paśúbhyo vṛścyate /
yò 'śvamedhéna yájate /
páryagnikṛtā útsṛjanty ánāvraskāya //
Commentaries (5)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (3)
- Āpastambaśrautasūtra — Āpastamba, Sanskrit
- Kāṭhakasaṃhitā — Sanskrit
- Pañcamāṣṭaka — Sanskrit
Discussed in (1)
- Altindische Grammatik — Wackernagel & Debrunner 1896, German