Pramāṇa · Search · About · API

Vimshabrahmana 39: atha pañcamaḥ khaṇḍaḥ

Viṃśabrāhmaṇa 39

Language
Sanskrit

atha pañcamaḥ khaṇḍaḥ

39.1

svarasāmāna ete bhavanti

39.2

svarbhānurvvā āsura ādityantamasā'vidhyattaṃ devāḥ
svarairaspṛṇvanyat svarasāmāno bhavantyādityasya spṛtyai

39.3

parairvai devā āditya svāṃ lokamapārayandyadapārayastatparāṇāṃ paratvaṃ

39.4

pārayantyenaṃ parāṇi ya evaṃ veda

39.5

saptadaśā bhavanti

39.6

prajāpati vai saptadaśaḥ prajāpatimevopayanti

39.7

anuṣṭup chandaso bhavantyānuṣṭubho vai prajāpatiḥ
sākṣādeva prajāpatimārabhante

39.8

trayaḥ purastāt trayaḥ parastādbhavanti

39.9

devā vā ādityasya svargāllokādavapādādabibhayustametaiḥ stomaiḥ saptadaśairadṛᳪhanyadete stomābhavantyādityasya dhṛtyai

39.10

catustriᳪśā bhavanti varṣma vai catustriᳪśo varṣmaṇaivenaᳪ sammimate

39.11

tasya parācīnātipādādabibhayustaᳪsarvaiḥ stomaiḥ
paryyāriṣanviśvajidabhijiṭbhyāṃ vīryaṃ vā etau stomau
vīryeṇaiva tadādityaṃ paryuṣanti dhṛtyai

39.12

anavapādāyānātipādāya

39.13

tadāhuḥ karttapraskanda iva vā eṣa yat trayastriśata
saptadaśamupayantīti pṛṣṭhayontaraḥ kāryyaḥ

39.14

tasya yatsaptadaśamahastaduttamaṃ kāryam̐salomatvāya

39.15

tadāhurudaraṃ vā eṣa stomānāṃ yat saptadaśo yat
saptadaśammadhyato nirhareyuraśanāyavaḥ prajāḥ syuraśanāyavaḥ
satriṇaḥ

39.16

trayastrim̐śādeva saptadaśa upetyo varṣma vai trayastrim̐śo varṣma saptadaśo varṣmaṇa eva tadvarṣmāmisaṃkrāmanti

39.17

tānāhurukthāḥ kāryā3 agniṣṭomā3 iti yadyukathāḥ syuḥ

39.18

paśavo vā ukthāni śāntiḥ paśavaḥ śāntenaiva tadviṣuvantamupayanti

39.19

tadāhurvivāvadhamiva vā etadyadagniṣṭomo viṣuvānagniṣṭomau viśvajidabhijitāvathaitara ukthāḥ syuriti

39.19-2

kthānāṃ pañcadaśastotraśastratvādurutvaṃ na hi gurudha bhārau vīvadhena voḍhuṃ
śakyau ato vaiṣamyādetadavīvadham

39.20

agniṣṭomā eva sarvve kāryāḥ

39.21

vīryyaṃ vā agniṣṭomo vīryya eva madhyataḥ pratitiṣṭhanti nava saṃstutā bhavanti nava prāṇāḥ prāṇeṣveva pratitiṣṭhanti

Linked texts (3)