Yajurbrahmana 11
Yajurbrāhmaṇa 11
- Language
- Sanskrit
11.1
syā̱diti̍ saṃvatsa̱ro'ja̍nayadhva̱mitītya̍bravīt pūrvva̱ityā̍di̱tyāmṛ̱tava̱ḥ ṣaṭ ca̍ || anu0 3
caturtho'nuvākaḥ
pra̱jāpa̍tirakāmayata̱ prajā̍yeyeti̍ | sa e̱taṃ daśa̍hotāramapaśyat | tena̱ daśa̍dhā̱tmāna̍ṃ vi̱dhāya̍ | daśa̍hotrā'tapyata
tasya̱ citti̱ḥ srugāsī̍t | ci̱ttamājya̍ṃ | tasyai̱tāva̍tyeva vāgāsī̍t | e̱tāvān ya̱jñakratu̍ḥ | sa catu̍rhotāramasṛjata
so̍'nandat
11.2
asṛ̍kṣi̱ vāṅmamiti̍ | tasya̱ somo̍ ha̱virāsī̍t | sa
catu̍rhotrātapyata | so̍'tāmyat | sa bhūriti̱ vyāha̍rat
sa bhūmi̍masṛjata | a̱gni̱ho̱traṃ da̍rśapūrṇamā̱sau yajū̍m̐ṣi | sa
dvi̱tīya̍matapyata | so̍'tāmyat | sa bhuva̱ iti̱ vyāha̍rat
11.3
so̍'ntari̍kṣa̱masṛ̍jata | cā̱tu̱rmā̱syāni̱ sāmā̍ni | sa
tṛ̱tīya̍matapyata | so̍'tāmyat | sa suva̱riti̱ vyāha̍rat
sa diva̍masṛjata | a̱gni̱ṣṭo̱mamu̱kthya̍matirā̱tramṛca̍ḥ | e̱tāvai vyāhṛ̍taya i̱me lo̱kāḥ | i̱mān khalu̱ vai lo̱kānanu̍pra̱jāḥ pa̱śava̱śchandā̍m̐si̱ prājā̍yanta | ya e̱vame̱tāḥ pra̱jāpa̍teḥ pratha̱mā vyāhṛ̍tīḥ pra̱jātā vede̍
11.4
pra pra̱jayā̍ pa̱śubhi̍rmithu̱nairjā̍yate | sa pañca̍hotāramasṛjata | sa ha̱virnāvi̍ndata | tasmai̱ soma̱ḥ svānu̱vaṃ prāya̍cchat | e̱tatte̍ ha̱viriti̍ | sa pañca̍hotrātapyata | so̍'tāmyat | sa pa̱tyaṅbādhata | so'su̍rānasṛjata | tada̱syāpri̍yamāsīt
11.5
taddurva̍rṇa̱m̐ hira̍ṇyamabhavat | taddurva̍rṇasya̱ hira̍ṇyasya̱ janma | sa dvi̱tīya̍matapyata | so̍'tāmyat | sa prāṅ tvādhatta | sa de̱vāna̍sṛjata | tada̍sya pri̱yamā̍sīt | tatsu̱varṇa̱m̐
hira̍ṇyamabhavat | tatsu̱varṇa̍sya̱ hira̍ṇyasya̱ janma̍ | ya e̱vam̐
su̱varṇa̍sya̱ hira̍ṇyasya̱ janma̍ ve̱da
11.6
su̱varṇa̍ ā̱tmanā̍ bhavati | durva̍rṇo'sya̱ bhrātṛ̍vyaḥ | tasmātsu̱varṇa̱m̐ hira̍ṇya̱ṃ dhārya̍m | su̱varṇa̍ e̱va bha̍vati | ena̍ṃ pri̱yaṃ
gacchati̱ nāpri̍yam | sa sa̱ptaho̍tāramasṛjata | sa sa̱ptaho̍trai̱va su̍va̱rgaṃ lo̱kamai̍t | tri̱ṇave̱na stome̍nai̱bhyo lo̱kebhyo
'surā̱n prāṇu̍data | tra̱ya̱stri̱m̐śe̱na pratya̍tiṣṭhat | e̱ka̱vi̱m̐śe̱na ruca̍ṃmadhatta
11.7
sa̱pta̱da̱śe̱na prājā̍yata | ya e̱vaṃ vi̱dvāntsome̍na̱ yaja̍te
sa̱ptaho̍trai̱va su̍va̱rgaṃ lo̱kamai̍ti | tri̱ṇave̱na stome̍nai̱bhyo lokebhyo̱ bhrātṛ̍vyā̱n praṇu̍date | tra̱ya̱stri̱m̐śe̱na prati̍tiṣṭhati
e̱ka̱vi̱m̐śe̱na ruca̍ṃdhatte | sa̱pta̱da̱śe̱na prajā̍yate | tasmā̍t
sa̱ptada̱śaḥ stomo̱ na niha̍rtyaḥ | pra̱jāpa̍ti̱rvai sa̍ptada̱śaḥ | pra̱jāpa̍time̱va ma̍dhya̱to dha̍tte pra̱jātyai̍
Commentaries (1)
- Yajurbrahmaṇabhāṣya — Sāyaṇācārya, Sanskrit
Linked texts (1)
- Taittirīyabrāhmaṇa — Sanskrit