Yajurbrahmana 18
Yajurbrāhmaṇa 18
- Language
- Sanskrit
18.1
vi̱grāha̍mṛ̱tava̍stadā̱la̍bhatendra̍ṃ gṛhṇīyā̱t ṣaṭ ca̍
anu0 2
yovāavi̍dvānnivartta̍yate | viśī̍rṣā sa pā̱pmāmuṣmi̍llo̱ke bha̍vati | atha̱ yovi̱dvānnivartta̍yate | saśī̍rṣā vipā̱pmāmuṣmi̍llo̱ke bha̍vati | de̱vatā̱vai sa̱ptapuṣṭi̍kāmā̱nyava̍rttayanta | a̱gniśca̍ pṛthi̱vī ca̍ | vā̱yuścā̱ntari̍kṣañca | ādi̱tyaśca̱ dyauśca̍ ca̱ndramā̍ḥ | a̱gnirnya̍varttayata | sa sā̍ha̱srama̍puṣyat
18.2
pṛ̱thi̱vī nya̍varttayata | sauṣa̍dhībhi̱rvana̱spati̍bhirapuṣyat
vā̱yurnya̍varttayata | sa marī̍cibhirapuṣyat | a̱ntari̍kṣa̱ṃ nya̍varttayata | tadvayo̍bhirapuṣyat | ā̱di̱tyo nya̍varttayata | sa
ra̱śmibhi̍rapuṣyat | dyaurnya̍varttayata | sā nakṣa̍trairapuṣyat
ca̱ndramā̱nyava̍rttayata | so'horā̱traira̍rdhamā̱sairmāsai̍rṛ̱tubhi̍ḥ
saṃvatsa̱reṇā̍puṣyat | tān poṣā̍n puṣyati | yām̐ste'pu̍ṣyan | yae̱vaṃ vi̱dvānni ca̱ vartta̍yate̱ pari̍ ca
18.1-2
a̱puṣya̱nnakṣa̍nnarapuṣya̱t pañca̍ ca || anu0 3
caturtho'nuvākaḥ
tasya̱ vāa̱gnerhira̍ṇyaṃ pratijagṛ̱huṣa̍ḥ | a̱rddhami̍ndri̱yasyāpā̍krāmat | tade̱tenai̱va pratya̍gṛhṇāt | tena̱ vai so'rdha̍mindri̱yasyā̱tmannupādha̍tta | a̱rddhami̍ndri̱yasyā̱tmannupādha̍tte | ya e̱vaṃ
vi̱dvān hira̍ṇyaṃ pratigṛ̱hṇāti̍ | atha̱ yo'vi̍dvān pratigṛ̱hṇāti̍ | a̱rddhama̍syendri̱yasyāpa̍krāmati | tasya̱ vai soma̍sya
vāsa̍ḥ pratijagṛ̱huṣa̍ḥ | tṛ̱tīya̍mindri̱yasyāpā̍krāmat
18.2-2
tade̱tenai̱va pratya̍gṛhṇāt | tena̱ vai sa tṛ̱tīya̍mindri̱yasyā
tmannupādha̍tta | tṛ̱tīya̍mindri̱yasyā̱tmannupādha̍tte | ya e̱vaṃ vidvān vāsa̍ḥ pratigṛ̱hṇāti̍ | atha̱ yo'vi̍dvān pratigṛ̱hṇāti̍
tṛ̱tīya̍masyendri̱yasyāpa̍krāmati | tasya̱ vai ru̱drasya̱ gāṃ pra̍tijagṛ̱huṣa̍ḥ | ca̱tu̱rthami̍ndri̱yasyāpā̍krāmat | tāme̱tenai̱va pratya̍gṛhṇāt | tena̱ vai sa ca̍tu̱rthami̍ndri̱yasyā̱tmannupādha̍tta
18.3
ca̱tu̱rthami̍ndri̱yasyā̱tmannupādha̍tte | ya e̱vaṃ vi̱dvān gāṃ pra̍tigṛ̱hṇāti̍ | atha̱ yo vi̍dvān pratigṛ̱hṇāti̍ | ca̱tu̱rthama̍syendri̱yasyāpa̍krāmati | tasya̱ vai varu̍ṇa̱syāśva̍ṃ pratijagṛ̱huṣa̍ḥ
pa̱ñca̱mami̍ndri̱yasyāpā̍krāmat | tame̱tenai̱va pratya̍gṛhṇāt
tena̱ vai sa pa̍ñca̱mami̍ndri̱yasyā̱tmannupā̍dhatta | pa̱ñca̱mami̍ndri̱yasyā̱tmannupā̍dhatte | ya e̱vaṃ vi̱dvānaśva̱ṃ prati̱gṛhṇāti̍
18.4
atha̱ yo'vi̍dvān prati̱gṛhṇāti̍ | pa̱ñca̱mama̍syendri̱yasyāpa̍krāmati | tasya̱ vai pra̱jāpa̍teḥ puru̍ṣaṃ pratijagṛhuṣa̍ḥ
ṣa̱ṣṭhami̍ndri̱yasyāpā̍krāmat | tame̱tenai̱va pratya̍gṛhṇāt | tena̱
vai sa ṣa̱ṣṭhami̍ndri̱yasyā̱tmannupā̍dhatta | ṣa̱ṣṭhami̍ndri̱yasyā̱tmannu̍pādha̍tte | ya e̱vaṃ vi̱dvān puru̍ṣaṃ prati̱gṛhṇāti̍ | atha̱ yo'vi̍dvān prati̱gṛhṇāti̍ | ṣa̱ṣṭhama̍syendri̱yasyāpa̍krāmati
18.5
tasya̱ vai mano̱stalpa̍ṃ pratijagṛhuṣa̍ḥ | sa̱pta̱mami̍ndri̱yasyāpā̍krāmat | tame̱tenai̱va pratya̍gṛhṇāt | tena̱ vai sa sa̍pta̱mami̍ndri̱yasyā̱tmannupā̍dhatta | sa̱pta̱mami̍ndri̱yasyā̱tmannupā̍dhatte | ya e̱vaṃ vi̱dvām̐stalpa̍ṃ prati̱gṛhṇāti̍ | atha̱ yo'vi̍dvān prati̱gṛhṇāti̍ | sa̱pta̱mama̍syendri̱yasyāpa̍krāmati | tasya̱
vāu̍ttānasyāṅgīra̱sasyāprā̍ṇat pratijagṛhuṣa̍ḥ | a̱ṣṭa̱mami̍ndri̱yasyāpā̍krāmat
18.6
tade̱tenai̱va pratya̍gṛhṇāt | tena̱ vai so'ṣṭa̱mami̍ndri̱yasyā̱tmannupā̍dhatta | a̱ṣṭa̱mami̍ndri̱yasyā̱tmannupā̍dhatte | ya e̱vaṃ vidvānaprā̍ṇat prati̱gṛhṇāti̍ | atha̱ yo'vi̍dvān prati̱gṛhṇāti̍ | a̱ṣṭa̱mama̍syendri̱yasyāpa̍krāmati | yadvā i̱daṃ kiñca̍
tatsa̱rvvamu̍ttā̱nae̱vāṅgī̍ra̱saḥ pratya̍gṛhṇāt | tade̍na̱ṃ prati̍gṛhītama̱nvāhi̍nat | yatkiñca̍ pratigṛhṇī̱yāt || tatsa̱rvvamu̍ttā̱nastvā̍ṅgīra̱saḥ prati̍gṛhṇā̱tvitye̱va prati̍gṛhṇīyāt
i̱yaṃ vāu̍ttā̱naścā̍ṅgīra̱saḥ | a̱nayai̱vaina̍t prati̍gṛhṇāti
naina̱m̐ hinasti
Commentaries (1)
- Yajurbrahmaṇabhāṣya — Sāyaṇācārya, Sanskrit
Linked texts (2)
- Taittirīyabrāhmaṇa — Sanskrit
- Kāṭhakaśākhā — Sanskrit