Yajurbrahmana 23
Yajurbrāhmaṇa 23
- Language
- Sanskrit
23.1
jighām̐satya̱gnicāṃ jaghanvānīḍate sarvām̐am̐haso vātohṛde rājatyagnirūpāḥ suvidānoagnaekaṃ ca||anu01
dvitīyo'nuvākaḥ
cakṣu̍ṣohe̱te mana̍sohete | vā̱cohe̱te brahmaṇohete
yo mā̍ghāyu̱rabhi̱dāsa̍ti | tama̍gne me̱nyāme̱niṃ kṛ̍ṇu | yo
mā cakṣu̍ṣā̱ yomana̍sā | yovā̱cā brahma̍ṇāghāyu̱rabhi̱dāsa̍ti | tayā̍gne̱ tvaṃ me̱nyā | a̱muma̍me̱niṃ kṛ̍ṇu | yatkiñcāsau mana̍sā̱ yacca̍ vā̱cā | ya̱jñairjuho̍ti̱ yaju̍ṣā ha̱virbhiḥ
23.2
tanmṛ̱tyurnirṛ̍tyā saṃvidānaḥ | pu̱rā di̱ṣṭādāhu̍tīrasya
hantu | yātu̱dhānā̱ nirṛ̍tirādu̱rakṣa̍ḥ | tea̍sya ghnantvanṛ̍tena sa̱tyaṃ | indro̍pi̱tāā̱jya̍masyamaghnantu | mā tatsamṛ̍ddhiṃ
yada̱sau ka̱roti̍ | hanmi te'haṃ kṛ̱taḥ ha̱viḥ | yome̍ gho̱ramacī̍kṛ̱taḥ | apāñcau tau̱bhau bā̱hū | apa̍nahyāmyā̱sya̍ṃ
23.3
apa̍nahyāmi te bā̱hū | apa̍nahyāmyā̱sya̍ṃ | agnerde̱vasya̱
brahma̍ṇā | sarva̍ṃ te'vadhiṣaṃ kṛ̱taṃ | pu̱rāmuṣya̍ vaṣaṭkā̱rāt
ya̱jñaṃ de̱veṣu̍ naskṛdhi | sviṣṭamasmāka̍ṃ bhūyāt | māsmān
prāpannarā̍tayaḥ | anti̍ dū̱re sa̱toa̍gne | bhrātṛ̍vyasyābhidā̱sataḥ
23.4
vaṣaṭkā̱reṇa̱ vajre̍ṇa | kṛ̱tyām̐ ha̍nmi kṛ̱tāma̱haṃ | yomā
nakta̱ṃ divā̍ sā̱yaṃ | prā̱taścāhno̍ni̱pīrya̍ti | ṛ̱cā tami̍n vajre̍ṇa | bhrātṛ̍vyaṃ pādayāmasi | indra̍sya gṛ̱ho̍si̱ taṃ
tvā̱ prapa̍dye | saguḥ sāśva̍ḥ | sa̱ha yanme̱ asti̱ tena̍ | īḍe̍
a̱gniṃ vi̍pa̱ścita̍ṃ
23.5
gi̱rā ya̱jñasya̱ sādha̍naṃ | śru̱ṣṭī̱vāna̍ṃ dhitā̱vāna̍ṃ | a̱gne
śa̍kema te va̱yaṃ | yama̍ṃ de̱vasya̍ vā̱jina̍ḥ | ati̱dveṣā̍m̐si tarema | ava̍ta̱mmā sa̱mana̍sau sa̱mauka̍sau | sace̍tasau sare̍tasau | u̱bhau māma̍vataṃ jātavedasau | śi̱vau bha̍vatama̱dya
na̍ḥ | sva̱yaṃ kṛ̍ṇvā̱naḥ su̍ga̱mapra̍yāvaṃ
23.6
ti̱gmaśṛ̍ṅgo vṛṣa̱bhaḥ śośu̍cānaḥ | pra̱tnam̐ sa̱dhastha̱manu̱paśya̍mānaḥ | ā̱tantu̍ma̱gnirdi̱vyaṃ ta̍tāna | tvanna̍stantu̍ru̱ta
setu̍ragne | tvaṃ panthā̍ bhavasi de̱vayā̱naḥ | tvayā̍gne pṛ̱ṣṭhaṃ va̱yamā̍ruhema | athā̍ de̱vaiḥ sa̍dha̱māda̍mmadema | tadu̍tta̱maṃ mu̍mugdhi naḥ | vipāśa̍ṃ madhya̱maṃ cṛ̍ta | avā̍dha̱māni̍ jī̱vase̍
23.7
va̱yam̐ so̍mavra̱te tava̍ | mana̍sta̱nūṣu̱ bibhra̍taḥ | pra̱jāva̍nto aśīmahi | indrā̍ṇī de̱vī su̱bhagā̍ su̱patnī̍ | udam̐śe̱na pati̍vidye̍ jigāya | trim̐śada̍syā ja̱ghana̱ṃ yoja̍nāni
u̱pastha̱ indram̐̍ sthavi̍raṃ bibhartti | senā̍ ha̱ nāma̍ pṛthi̱vī dhanañja̱yā | vi̱śvavya̍cā adi̍ti̱ḥ sūrya̍tvak | indrā̍ṇī de̱vī
prā̱sahā̍ dadā̍nā
23.8
sā no̍ de̱vī su̱havā̱ śarma̍ yacchatu | ā tvā̍hārṣama̱ntara̍bhūḥ | dhru̱vasti̱ṣṭhā vicā̍caliḥ | viśa̍stvā̱ sarvā̍vāñchantu
mā tvadrā̱ṣṭramadhi̍bhraśat | dhru̱vā dyaurdhru̱vā pṛ̍thi̱vī | dhru̱vaṃ viśva̍mi̱daṃ jaga̍t | dhru̱vāsa̱ parva̍tāi̱me | dhru̱vorājā̍ vi̱śāma̱yaṃ | i̱haivaidhi̱ māvya̍thiṣṭhāḥ
23.9
parva̍taiva vicācaliḥ | indra̍ive̱ha dhru̱vasti̍ṣṭha | i̱ha
rā̱ṣṭramu̍ dhāraya | a̱bhiti̍ṣṭha pṛtanya̱taḥ | adha̍re santu̱ śatra̍vaḥ
indra̍iva vṛtra̱hā ti̍ṣṭha | a̱paḥ kṣetrā̍ṇi sa̱ñjayan̍ | indra̍meṇamadīdharat | dhru̱vaṃ dhru̱veṇa̍ ha̱viṣā̍ | tasmai̍ de̱vāadhi̍bravan || ayañca̱ brahma̍ṇa̱spati̍ḥ
Commentaries (1)
- Yajurbrahmaṇabhāṣya — Sāyaṇācārya, Sanskrit
Linked texts (4)
- Taittirīyabrāhmaṇa — Sanskrit
- Hiraṇyakeśiśrautasūtra — Hiraṇyakeśin, Sanskrit
- Udakaśānti — Baudhāyana, Sanskrit
- Udakaśāntimantra — Sanskrit