Pramāṇa · Search · About · API

Yajurbrahmana 28

Yajurbrāhmaṇa 28

Language
Sanskrit

28.1

saptamo'nuvākaḥ
vṛṣā̍sya̱m̐śurvṛ̍ṣa̱bhāya̍ gṛhyase | vṛṣā̱yamu̱gronu̍cakṣa̍se
di̱vyaḥ karma̍ṇyohi̱to bṛ̱hannāma̍ | vṛṣa̱bhasya̱ yā ka̱kut
viṣū̍vān vi̱ṣṇo bha̍vatu | a̱yaṃ yo māma̍ko vṛṣā̍ | atho̱
indra̍iva de̱vebhya̍ḥ | vi bra̍vītu jane̍bhyaḥ | ā̱yuṣma̍ntaṃ varca̍svantaṃ | atho̱ adhi̍patiṃ vi̱śāṃ

28.2

a̱syāḥ pṛ̍thi̱vyāadhya̍kṣaṃ | i̱mami̍ndravṛṣa̱bhaṃ kṛ̍ṇu | yaḥ
su̱śṛṅga̍ḥ suvṛṣa̱bhaḥ | ka̱lyā̱ṇo droṇa̍āhi̍taḥ | kārṣī̍baṇapragā̱ṇena̍ | vṛṣa̱bheṇa̍ yajāmahe | vṛṣa̱bheṇa̱ yaja̍mānāḥ | akrū̍reṇeva sa̱rpiṣā̍ | mṛdha̍śca̱ sarvā̱indre̍ṇa | pṛta̍nāśca jayāmasi

28.3

yasyā̱yamṛ̍ṣa̱bho ha̱viḥ | indrā̍ya pari̱ṇīyate̍ | jayā̍ti̱
śatru̍māyanta̍ṃ | atho̱ hanti̍ pṛtanya̱taḥ | vṛ̱ṣṇāma̱haṃpu̍ṇīrasa̍t | a̱gneu̱dbhinda̱tāmasa̍t | indra̍śuṣma̱ntanū̱vāmare̍yasva
nī̱cā viśvā̍ a̱bhiti̍ṣṭhābhimā̍tīḥ | ni̱ṣṭṛ̱ṇī̱ hyabādha̍ṃ
yo̱noasti̍ | u̱ruṃ nau̍ lo̱kaṃ kṛ̍ṇuhi jīradāno

28.4

prehya̱bhipraihi̍ pra̱bharo̱ saha̍sva | mā vivè̍no vi̱śvaśu̍ṣma̱jane̍ṣu | u̱dauḍi̍to vṛṣabha tiṣṭha̱ śuṣmai̍ḥ | indra̱śatrū̍n pu̱roa̱smāka̍ṃ yudhya | agne̱ jetā̱ tvaṃ ja̍ya | śatrū̍ntsahasraojasa
viśatrū̍n vimṛ̱dhaunu̍da | e̱taṃ te̱ stoma̍ṃtu vijātavipra̍ḥ
ratha̱nna dhīra̱ḥ svapā̍atakṣaṃ | yadīda̍gne̱ prati̱ tvaṃ de̍va̱haryyā̍ḥ

28.5

su̱varva̍tīra̱pae̍nājayema | yoghṛ̱tenā̍bhi̱māni̍taḥ | indra̱
jaitrā̍ya jajñiṣe | sa na̱ḥ saṅkā̍su pāraya | pṛta̍nā sāhye̍ṣu ca | indro̍jigāya pṛthi̱vīṃ | a̱ntari̍kṣa̱m̐ suva̍rma̱hat
vṛ̱tra̱hā pu̍ru̱ceta̍naḥ | indro̍jigāya̱ saha̍sā̱ sahā̍m̐si
indro̍jigāya̱ pṛta̍nāni̱ viśvā̍

28.6

indro̍jā̱tovipu̱rauru̍roja | sa na̱ḥ para̱syāvari̍vaḥ
kṛṇotu | a̱yaṃ kṛ̱lura̍hṛṇītaḥ | vi̱śvaji̍du̱dbhidi̍tsoma̍ḥ
ṛṣi̱rvipra̍ḥ kā̱vyena̍ | vā̱yura̍gre̱gā ya̍jña̱proḥ | sā̱kaṅganma̍na̍
sā ya̱jñaṃ | śi̱voni̱yudbhi̍ḥ śi̱vābhi̍ḥ | vāyo̍ śu̱kroa̍yāmi te | madhvo̱agra̍ṃ di̱viṣṭi̍ṣu

28.7

āyā̍hi̱ soma̍pītaye | svā̱ruhode̍va ni̱yutva̍tā | i̱mami̍ndra varddhaya kṣa̱triyo̍ṇāṃ | a̱yaṃ vi̱śāṃ vi̱śpati̍rastu rājā | a̱smā i̍ndra mahi̱varcā̍m̐si dhehi | ava̱varca̍sam̐ sṛṇuhi
śatru̍masya | i̱mamābha̍ja̱ grāme̱ aśve̍ṣu̱ goṣu̍ | nira̱muṃ bha̍ja
yo mi̱tro̍'sya | varṣma̍n kṣa̱trasya̍ ka̱kubhi̍ḥ śrayasva | tato̍
na u̱gro virbha̍jā̱ vasū̍ni

28.8

a̱sme dyā̍vāpṛthi̱vī bhūri̍ vā̱maṃ | sandu̍hāthāṃ gha̱rmadughe̍va dhe̱nuḥ | ayam̐ rājā̍ pri̱ya indra̍sya bhūyāt | pri̱yo gavā̱moṣa̍dhīnāmu̱tāpā̍ṃ | yuna̍jmi ta utta̱rāva̍nta̱mindra̍ṃ
yena̱ jayā̍si̱ na parā̱jayā̍sai | satvā̍karekavṛṣa̱bham̐ svānā̍ṃ | atho̍ rājannutta̱maṃ māna̍vānāṃ | utta̍ra̱stvama̍dha̱re te
sapa̍tnāḥ | eka̍vṛṣā indra̍sakhā jigī̱vān

28.9

viśvā̱ścāśā̍ḥ pṛta̍nāḥ sa̱ñjaya̍ñjayan | a̱bhiti̍ṣṭha̱ śatrū
ya̱taḥ saha̍sva | tubhya̍ṃ bharanti kṣi̱tayo̍yaviṣṭha | ba̱limi̍gne̱
anti̍ta̱ścota dū̱rāt | ābha̍ndiṣṭhasya suma̱tiṃ ci̍kiddhi
bṛ̱hatte̍ agne mahi̱ śarma̍ bha̱draṃ | yo de̱hyo̍'na̍mayadvadha̱snaiḥ
yoa̱ryyapa̍tnīru̱ṣasa̍śca̱kāra̍ | sa niru̍dhyāna̱hu̍ṣo̱ yahvoa̱gniḥ | viśa̍ścakre ba̱lihṛta̱ḥ saho̍bhiḥ

28.10

pra sa̱dyoa̍gne̱ atye̍ṣya̱ yān | ā̱viryasmai̱ cāru̍taro babhūtha̍ | īḍe̱nyo̍vapu̱ṣyo̍vibhā̱vā | pri̱yovi̱śāmati̍thimānu̍ṣīṇāṃ | brahma̍ jye̱ṣṭhā vī̱ryyā̍ sambhṛ̍tāni | brahmāgne̱ jyeṣṭha̍ṃ
diva̱māta̍tāna | ṛ̱tasya̱ brahma̍ pratha̱mota ja̍jñe | tenā̍rhati
brahma̍ṇā sparddhitu̱ṃ kaḥ | brahma̍sruco̍ ghṛtava̍tīḥ | brahma̍ṇā svara̍vomi̱tāḥ

28.11

brahma̍ya̱jñasya̱ tanta̍vaḥ | ṛ̱tvijo̱ye ha̍viṣkṛ̍taḥ | śṛṅgā̍ṇīvecchṛ̱ṅgiṇa̍ḥ sanda̍dṛśrire | u̱pāla̍vanta̱ḥ svara̍vaḥ pṛthi̱vyāṃ | te de̱vāsa̱ḥ svara̍vastasthivām̐saḥ | nama̍ḥ sakhibhya̱ḥ sannānmāva̍gāta | a̱bhibhūra̍gnira̍taradrajām̐si | spṛdho̍vi̱hatya̱ pṛta̍nāabhi̱śrīḥ | juṣā̱ṇoma̱hyāhu̍tiṃ mā
mahiṣṭa | ha̱tvā sapa̱tnān vari̍vaskarannaḥ || īśā̍naṃ tvā bhuva̍nānāmabhi̱śriya̍ṃ | staumya̍gnauru kṛ̱tam̐ su̱vīra̍ṃ | ha̱virjuṣā̱ṇaḥ sapa̱tnām̐ a̍bhi̱bhūra̍si | ja̱hi śatrū̱m̐ apamṛdho̍ nudasva

Commentaries (1)

Linked texts (4)