Pramāṇa · Search · About · API

Yajurbrahmana 35

Yajurbrāhmaṇa 35

Language
Sanskrit

35.1

ha̱viḥ pratya̱ṅkasomo̱ ati̍drutoya̱kṣmāvi̱śan viṣū̍cikā̱ pañca̍ ca || anu0 1
dvitīyo'nuvākaḥ
somo̱ rājā̱mṛtam̐̍ su̱taḥ | ṛ̱jī̱ṣeṇā̍jahāmṛ̱tyuṃ | ṛ̱tena̍ sa̱tyami̍ndri̱yaṃ | vi̱pānam̐̍ śu̱kramandha̍saḥ | indra̍syendri̱yaṃ | i̱daṃ payo'mṛ̍ta̱ṃ madhu̍ | soma̍ma̱ṅgovya̍pibat | cha̱nda̍sā ha̱m̐saḥ śu̍ci̱ṣat | ṛ̱tena̍ sa̱tyami̍ndri̱yaṃ | a̱ṅgāḥ
kṣī̱raṃ vya̍pibat

35.2

kru̱ṅṅāṃ gira̱sodhi̍yā | ṛ̱tena̍ sa̱tyami̍ndri̱yaṃ | annā̍t
pa̍risru̱to rasa̍ṃ | bra̱hmaṇā̱ vya̍pibat kṣa̱traṃ | ṛ̱tena̍ sa̱tyami̍ndri̱yaṃ | reto̱mūtra̱ṃ vija̍hāti | yoni̱ṃ pravi̍śa̱dindri̱yaṃ
garbho̍jarā̱yuṇā vṛtaḥ | ulva̍ṃ jahāti̱ janma̍nā | ṛ̱tena̍
sa̱tyami̍ndri̱yaṃ

35.3

vede̍na rū̱pe vyāka̍rot | satāsa̱tī pra̱jāpa̍tiḥ | ṛ̱tena̍
sa̱tyami̍ndri̱yaṃ | some̍na̱ somo̱ vya̍pibat | su̱tāsu̱tau pra̱jāpa̍tiḥ | ṛ̱tena̍ sa̱tyami̍ndri̱yaṃ | dṛṣṭvā rū̱pe vyāka̍rot
sa̱tyānṛ̱te pra̱jāpa̍tiḥ | aśra̍ddhāmanṛ̱te'da̍dhāt | śra̱ddhām̐
sa̱tye pra̱jāpa̍tiḥ || ṛ̱tena̍ sa̱tyami̍ndri̱yaṃ | dṛṣṭvā pa̍risru̱to
rasa̍ṃ | śu̱kreṇa̍ śu̱kraṃ vya̍pibat | paya̱ḥ soma̍ṃ pra̱jāpa̍tiḥ
ṛ̱tena̍ sa̱tyami̍ndri̱yaṃ | vi̱pānam̐̍ śu̱kramandha̍saḥ | indra̍syendri̱yaṃ | i̱daṃ payo'mṛ̍ta̱ṃ madhu̍

35.1-2

a̱ṅgāḥ kṣī̱raṃ vya̍piba̱jjanma̍na̱rtena̍ sa̱tyami̍ndri̱yam̐ sa̱tye pra̱jāpa̍ti̱raṣṭau ca̍ || anu0 2
somo̱rājā̍ vi̱pānam̐̍ soma̍ma̱ṅgo'nnādreto̱mūtra̱ṃ vede̱ma satāsatī some̍na su̱tāsu̍tau dṛ̱ṣṭvā rū̱pe dṛ̱ṣṭvā pari̍sruto̱ rasa̱ṃ vipā̍naṃ daśa
tṛtīyo'nuvākaḥ
su̱rāva̍ntaṃ ba̱rhiṣada̱m̐ suvī̍raṃ | ya̱jñam̐ hi̍nvanti mahi̱ṣā
namo̍bhiḥ | dadhā̍nāḥ soma̍ṃ di̱vi de̱vatā̍su | made̍mendra̱ṃ
yaja̍mānāḥ sva̱rkāḥ | yaste̱ rasa̍ḥ sambhṛ̍ta̱oṣa̍dhīṣu | soma̍sya śu̱ṣmaḥ sura̍yā su̱tasya̍ | tena̍ jinva̱ yaja̍māna̱ṃ made̍na
sara̍svatīma̱śvinā̱vindra̍ma̱gniṃ | yama̱śvinā̱namu̍cerāsu̱rādhi | sara̍svatyasa̍nodindri̱yāya̍

35.2-2

i̱maṃ tam̐ śu̱kraṃ madhu̍manta̱mindu̍ṃ | soma̱m̐ rājā̍nami̱ha
bha̍kṣayāmi | yadatra̍ ri̱ptam̐ rasi̍naḥ su̱tasya̍ | yadindro̍'papi̍ba̱cchacī̍bhiḥ | a̱haṃ tada̍sya̱ mana̍sā śi̱vena̍ | soma̱m̐
rājā̍nami̱ha bha̍kṣayāmi | pi̱tṛbhya̍ḥ sva̱dhāvi̍bhyaḥ sva̱dhānama̍ḥ | pi̱tāma̱hebhya̍ḥ sva̱dhāvi̍bhyaḥ sva̱dhānama̍ḥ | prapi̍tāma̱hebhya̍ḥ sva̱dhāvi̍bhyaḥ sva̱dhānama̍ḥ | akṣa̍n pi̱tara̍ḥ

35.3-2

amī̍madanta pi̱tara̍ḥ | atī̍tṛpanta pi̱tara̍ḥ | amī̍mṛjanta pi̱tara̍ḥ | pi̱tara̱ḥ śundha̍dhvaṃ | puna̍ntu̱ mā pi̱tara̍ḥ somyāso̍ḥ | puna̍ntu̱ mā pi̱tāma̱hāḥ | puna̍ntu̱ prapi̍tāma̱hāḥ
pavitre̍ṇa śa̱tāyu̍ṣā | puna̍ntu̱ mā pitāma̱hāḥ | puna̍ntu prapi̍tāma̱hāḥ

35.4

pavitre̍ṇa śa̱tāyu̍ṣā | viśva̱māyu̱rvya̍śnavai | agna̱ āyū̍m̐ṣi
pavase̱'gne pava̍sva | pava̍mānaḥ suva̱rjana̍ḥ puna̍ntu̱ mā devaja̱nāḥ | jā̱tave̍daḥ pa̱vitra̍va̱dyatte̍ pa̱vitra̍ma̱rciṣi̍ | u̱bhābhyā̍ṃ deva savita̱rveṇa̍de̱vī puna̍tī | ye sa̍mā̱nāḥ sama̍nasaḥ
pi̱taro̍ yama̱rājye̍ | teṣā̍ṃ lo̱kaḥ sva̱dhānama̍ḥ | ya̱jño de̱veṣu̍
kalpatāṃ

35.5

ye sa̍jā̱tāḥ sama̍nasaḥ | jī̱vājī̱veṣu̍ māma̱kāḥ | teṣām̐ śrīrmayi̍ kalpatāṃ | a̱smim̐llo̱ke śa̱tam̐ samā̍ḥ | dve
sṛtī̍ aśṛṇavaṃ pitṝ̱ṇāṃ | a̱haṃ de̱vānā̍mu̱ta martyā̍nāṃ | yābhyā̍mi̱daṃ viśva̱meja̱tsame̍ti | yada̍nta̱rā pi̱tara̍ṃ mā̱tara̍ṃca
i̱dam̐ ha̱viḥ pra̱jana̍naṃ me astu | daśa̍vīram̐ sarva̍ga̱ṇam̐
sva̱staye̍ || ā̱tma̱sani̍ pra̱jāsani̍ | pa̱śu̱sani̍mabhaya̱sani̍
lo̱kasani̍ | a̱gniḥ pra̱jāṃ ba̍hu̱lāṃ me̍ karotu | anna̱ṃ payo̱
reto̍a̱smāsu̍ dhatta | rā̱yaspoṣa̱miṣa̱mūrja̍ma̱smāsu̍ dīdharat
svāhā̍

Commentaries (1)

Linked texts (4)