Pramāṇa · Search · About · API

Yajurbrahmana 38

Yajurbrāhmaṇa 38

Language
Sanskrit

38.1

pa̱styo̍khā sara̍svatyai bheṣa̱jyena̱ śrīraṅgā̍ni bhasa̱dyajñe
ya̱jño yaju̍rbhirupa̍nati̱rhe ca̍ || anu0 5
ṣaṣṭho'nuvākaḥ
yadde̍vāde̱vaṃ heḍa̍naṃ | de̱vāsaścakṛ̱māva̱yaṃ | a̱gnirmā̱ tasmā̱dena̍saḥ | viśvā̍nmuñcatvam̐ha̍saḥ | yadi̱ divā̱ yadi̱ nakta̍ṃ
enā̍ṃsi cakṛ̱māva̱yaṃ | vā̱yurmā̱ tasmā̱dena̍saḥ | viśvā̍nmuñcatvam̐ha̍saḥ | yadi̱ jāgra̱dyadi̱ svapne̍ | enā̍ṃsi cakṛ̱māva̱yaṃ

38.2

sūryo̍ mā̱ tasmā̱dena̍saḥ | viśvā̍nmuñcatvam̐ha̍saḥ | yadgrāme̱ yadara̍ṇye | yatsa̱bhāyā̱ṃ yadi̍ndri̱ye | yacchū̱dre yadarye̍
yada̱nasaśca̍kṛ̱māva̱yaṃ | yadeka̱syādhi̱dharma̍ṇi | tasyā̍vaya̱janama̍si | yadāpo̱aghnyā̱ varu̱ṇeti̱ śapā̍mahe | tato̍ varuṇa
no muñca

38.3

ava̍bhṛthanicaṅkuṇa nice̱rura̍si nicaṅkuṇa | ava̍de̱vairde̱vakṛ̍ta̱meno̍yāṭ | ava̱martyai̱rmartya̍kṛ̱taṃ | u̱rorā no̍ devariṣaspā̍hi | su̱mi̱trā na̱āpa̱oṣa̍dhaḥ santu | du̱rmi̱trāstasmai̍ bhūyāsuḥ | yo̱'smān dveṣṭi̍ | yañca̍ va̱yaṃ dvi̱ṣma | dru̱padādi̱venmu̍mucā̱naḥ | svi̱nnasnā̱tvomalā̍diva

38.4

pū̱taṃ pa̱vitre̱ṇe vājya̍ṃ | āpa̍ḥ śudhantu̱ maino̍saḥ | udva̱yaṃ
tama̍sa̱spari̍ | paśya̍nto̱ jyoti̱rutta̍raṃ | de̱vaṃ de̍va̱trā sūrya̍
aga̍nma̱ jyoti̍rutta̱maṃ | prati̍yuto̱ varu̍ṇasya̱ pāśa̍ḥ | pratya̍sto̱
varu̍ṇasya̱ pāśa̍ḥ | edho̍'syedhiṣī̱mahi̍ | sa̱mida̍si

38.5

tejo̍'si̱ tejo̱mayi̍ dhehi | a̱poa̱nvacā̍riṣaṃ | rase̍na
sama̍sṛkṣmahi | paya̍svām̐ a̱gnaāga̍maṃ | taṃ mā̱ sam̐sṛ̍ja
varca̍sā | pra̱jayā̍ ca̱ dhane̍na ca | samā̱vava̍rtti pṛthi̱vī | samu̱ṣāḥ | samū̱ sūrya̍ḥ | samu̱ viśva̍mi̱daṃ jaga̍t || vai̱śvā̱na̱rajyo̍tirbhūyāsaṃ | vi̱bhuṃ kāma̍ṃ vya̍śnuvai | bhūḥ svāhā̍

Commentaries (1)

Linked texts (1)