Pramāṇa · Search · About · API

Yajurbrahmana 45

Yajurbrāhmaṇa 45

Language
Sanskrit

Contents

45.1

viṃśo'nuvākaḥ
de̱vaṃ ba̱rhirindra̍ṃ vayo̱dhasa̍ṃ | de̱vaṃ de̱vama̍varddhayat | gā̱ya
tri̱yā chanda̍sendri̱yaṃ | tejo̱'ndre̱ vayo̍dadhat | vasu̍vane̍ vasu̱dheya̍sya vetu̱ yaja̍ | de̱vīrdvā̍ro̍ de̱vamindra̍ṃ vayo̱dhasa̍ṃ | de̱vīrde̱vama̍varddhayan | u̱ṣṇihā̱ chanda̍sendri̱yaṃ | prā̱ṇamindre̱
vayo̍dadhat | vasu̍vane̍ vasu̱dheya̍sya viyantu̱ yaja̍

45.2

de̱vī de̱vaṃ va̍yo̱dhasa̍ṃ | u̱ṣe'ndra̍mavarddhatāṃ | anu̱ṣṭubhā̱
chanda̍sendri̱yaṃ | vāca̱mindre̱ vayo̍dadhat | vasu̍vane̍ vasu̱dheya̍sya vī̱tāṃ yaja̍ | de̱vī joṣṭrī̍ de̱vamindra̍ṃ vayo̱dhasa̍ṃ | de̱vī
de̱vama̍vardhatāṃ | bṛ̱hatyā chanda̍sendri̱yaṃ | śrotra̱mindre̱ vayoda̍dhat | vasu̍vane̍ vasu̱dheya̍sya vītā̱ṃ yaja̍

45.3

de̱vī ūrjo̍hutī de̱vamindra̍ṃ vayo̱dhasa̍ṃ | de̱vī de̱vama̍vardhatāṃ | pa̱ṅktyā chanda̍sendri̱yaṃ | śu̱kramindre̱ vayoda̍dhat
vasu̍vane̍ vasu̱dheya̍sya vītā̱ṃ yaja̍ | de̱vā daivyā̱ hotā̍rā
de̱vamindra̍ṃ vayo̱dhasa̍ṃ | de̱vā de̱vama̍vardhatāṃ | tri̱ṣṭubhā chanda̍sendri̱yaṃ | tviṣi̱mindre̱ vayoda̍dhat | vasu̍vane̍ vasu̱dheya̍sya
vītā̱ṃ yaja̍

45.4

de̱vīsti̱srasti̱sro de̱vīrva̍yo̱dhasa̍ṃ | pati̱mindra̍mavardhayan | jaga̍tyā̱ chanda̍sendri̱yaṃ | bala̱mindre̱ vayoda̍dhat
vasu̍vane̍ vasu̱dheya̍sya viyantu̱ yaja̍ | de̱vo narāśa̍ṃso de̱vamindra̍ṃ vayo̱dhasa̍ṃ | de̱vo de̱vama̍vardhayat | vi̱rājā chanda̍sendri̱yaṃ | reta̱indre̱ vayoda̍dhat | vasu̍vane̍ vasu̱dheya̍sya vetu̱
yaja̍

45.5

de̱vo vana̱spati̍rde̱vamindra̍ṃ vayo̱dhasa̍ṃ | de̱vo de̱vama̍vardhayat | dvi̱padā̱ chanda̍sendri̱yaṃ | bhaga̱mindre̱ vayoda̍dhat | vasu̍vane̍ vasu̱dheya̍sya vetu̱ yaja̍ | de̱vaṃ ba̱rhirvā̍ri̱tīnā̍ṃ de̱vamindra̍ṃ vayo̱dhasa̍ṃ | de̱vaṃ de̱vama̍vardhayat | ka̱kubhā chanda̍sendri̱yaṃ | yaśa̱indre̱ vayoda̍dhat | vasu̍vane̍ vasu̱dheya̍sya vetu̱ yaja̍
de̱vo a̱gniḥ sviṣṭa̱kṛdde̱vamindra̍ṃ vayo̱dhasa̍ṃ | de̱vo de̱vama̍varddhayat | ati̍cchandasā̱ chanda̍sendri̱yaṃ | kṣa̱tramindre̱ vayo̍dadhat | vasu̍vane vasu̱dheya̍sya vetu̱ yaja̍

45.5.p1

vi̱yantu̱ yaja̍ vī̱tāṃ yaja̍ vī̱tāṃ yaja̍ vetu̱ yaja̍ vetu̱ yaja̱
pañca̍ ca || anu0 20
de̱vaṃ ba̱rhirgā̍ya̱triyā teja̍ḥ | de̱vīrdvā̍ra u̱ṣṇihā̍ prā̱ṇaṃ
de̱vī de̱vamu̱ṣe a̍nu̱ṣṭubhā vāca̍ | de̱vī joṣṭrī̍ bṛ̱hatyā
śrotra̍ṃ | de̱vī ū̱rjāhu̍tī pa̱ṅktyā śu̱kraṃ | de̱vā de̱vyā hotā̍rā tri̱ṣṭubhā tviṣi̍ṃ | de̱vīsti̱srasti̱sro de̱vīḥ pati̍ṃ
jaga̍tyā̱ bala̍ṃ | de̱vo narā̱śam̐so̍ vi̱rājā reta̍ḥ | de̱vo
vana̱spati̍rdvi̱padā̱ bhaga̍ṃ | de̱vaṃ ba̱rhirvā̍ri̱tīnā̍ṃ ka̱kubhā
yaśa̍ḥ | de̱vo a̱gniḥ sviṣṭa̱kṛdati̍cchandasā kṣa̱traṃ | vetu̱ viya̍ntu̱ catu̍rvī̱tāmeko̍ vi̱yantu̱ catu̍rvetu | ava̍rddhaya̱dava̍rddhaya̱ñcatu̍ravarddhatā̱meko̍'varddhaya̱ñcatu̍ravarddhayat
khā̱daum̐ tvā̱ soma̍ḥ su̱rāva̍ntam̐ sī̱sena̍ mi̱tro'si yadde̱vā hotā̍yakṣatsa̱midhendram̐̍ sa̱middha indra̍ścarṣa̱ṇi prā
de̱vaṃ †ba̱rhirindram̐̍ sude̱vam̐ hotā̍yakṣatsa̱midhā̱gnim̐ sa̱mi̍ddhoa̱gnira̍śvi̱nāśvi̱nā ha̱viri̍ndri̱yaṃ de̱vaṃ ba̱rhiḥ sara̍svatyagnima̱dyo śa̱nto hotā̍yakṣadi̱ḍaspa̱de sami̍ddhoa̱gniḥ
sa̱midhā̍ vasa̱ntena̍ de̱vaṃ ba̱rhirindra̍ṃ vayo̱dhasa̍ṃ vi̱m̐śa̱tiḥ
†svā̱dau tve̱maṃ mi̍trau'syavabhṛ̱that pu̍randa̱ro hotā̍yakṣadi̱ḍaspa̱de sami̍ddhoa̱gnira̱śvinā̍ de̱vī ū̱rjjāhu̍tī vetvājya̍sya vairū̱peṇa̍ vi̱śauja̍sā pañcā̍śa̱tiḥ
svā̱dau tvāmī̍madanta pi̱tara̍ḥ sāmrā̍jyāya ‡ pū̱taṃ pa̱vitre̱ṇāpa̍vi̱trevājya̍mu̱pāsā̍naktā̱ vada̍rai̱radhā̍tāma̱śvinā̍ ha̱virindri̱yaṃ de̱vaindro̱ vana̱spati̍ṃ paṣṭhavā̱haṃ gāṃ de̱vīde̱vaṃ
§vayo̱dhasa̱ṃ catu̍rnava̱tiḥ
cchi̱nnaṃ tantu̱m̐ hotā̍yakṣa̱t supeśa̍so varu̍ṇaḥ kṣa̱trami̍ndri̱yaḥ hotā̍yakṣadi̱ḍaspa̱de vairū̱peṇa̍ vi̱śauja̍sā ṣaḍa̍śī̱tiḥ || oṃ tatsat

45.5.p2

iti ṣaṣṭho'dhyāyaḥ

Commentaries (1)