Pramāṇa · Search · About · API

Yajurbrahmana 48

Yajurbrāhmaṇa 48

Language
Sanskrit

48.1

bhava̱ntyaṣṭā̱mava̱rudhya̍ vadanti da̱rbhā yaddarbha̍puñjī̱laḥ pa̱vaya̱tyeka̍ñca || anu0 9
daśamo'nuvākaḥ
pra̱jāpa̍tirakāmayata̱ bahorbhūyā̍ntsyā̱miti̍ | sa e̱taṃ
pa̍ñcaśāra̱dī̱yama̍paśyat | tamāha̍rat | tenā̍yajata | tato̱
vai sa bahorbhūyā̍nabhavat | yaḥ kā̱maye̍ta̱ bahorbhūyā̍ntsyāmiti̍ | sa pa̍ñcaśāra̱dī̱yena̍ yajeta | bahore̱va bhūyā̍n bhavati | ma̱rutsto̱mo vā e̱ṣaḥ | ma̱ruto̱ hi de̱vānā̱ṃ bhūyi̍ṣṭhāḥ

48.2

ba̱hurbha̍vati | ya e̱tena̱ yaja̍te | ya u̱ caina̍me̱vaṃ veda̍ | pa̱ñcaśā̱radī̱yo bha̍vati | pañca̱ vā ṛ̱tava̍: saṃvatsa̱raḥ | ṛ̱tuṣve̱va
saṃvatsa̱re prati̍tiṣṭhati | atho̱ pañcā̍kṣarā pa̱ṅktiḥ | pāṅkto̍
ya̱jñaḥ | ya̱jñame̱vāva̍rundhe | sa̱ptada̱śam̐ stomā̱nāti̍yanti
sa̱ptada̱śaḥ pra̱jāpa̍tiḥ | pra̱jāpa̍terāptyai

48.1-2

bhūyi̍ṣṭāyanti̱ dve ca̍ || anu0 10
ekādaśo'nuvākaḥ
agastyo̍ ma̱rudbhya̍ u̱kṣṇaḥ praukṣa̍t | tānindra̱ āda̍tta
te e̱naṃ vajra̍mu̱dyatyābhyāyanta | tānagastya̍ścai̱vendra̍śca kayāśu̱bhīyai̱nāśa̍mayatāṃ | tāñchā̱ntānupā̍hvayata | yat ka̍yāśu̱bhīya̱ṃ bhava̍ti̱ śāntyai̍ | tasmā̍de̱ta ai̍ndrā māru̱tā u̱kṣāṇa̍:
savanī̱yā bha̍vanti | traya̍: pratha̱me'ha̱nnāla̍bhyante | e̱vaṃ dvitī̱ye | e̱vaṃ tṛtī̱ye

48.2-2

e̱vaṃ catu̱rthe | pañco̍tta̱me'ha̱nnāla̍bhyante | varṣi̍ṣṭhamiva
hye̍tadaha̍: | varṣi̍ṣṭhaḥ samā̱nānā̍ṃ bhavati | ya e̱tena̱ yaja̍te
ya u̱ caina̍me̱vaṃ veda̍ | svārā̱jyaṃ vā e̱ṣa ya̱jñaḥ | e̱tena̱ vā
eka̱yā vā̍ ka̱āda̱maḥ svā̍rā̱jyama̍gacchat | svārā̱jya̍ṃ gacchati | ya e̱tena̱ yaja̍te

48.3

ya u̱ caina̍me̱vaṃ veda̍ | māru̱to vā e̱ṣa stoma̍ḥ | e̱tena̱ vai
ma̱ruto̍ de̱vānā̱ṃ bhūyi̍ṣṭhamabhavan | bhūyi̍ṣṭhaḥ samā̱nānā̍ṃ
bhavati | ya e̱tena̱ yaja̍te | ya u̱ caina̍me̱vaṃ veda̍ | pañca̍ śā̱radī̱yo vā e̱ṣa ya̱jñaḥ | ā pa̍ñca̱māt puru̍ṣā̱danna̍matti | yae̱tena̱ yaja̍te | ya u̱ caina̍me̱vaṃ veda̍ || sa̱pta̱da̱śam̐ stomā̱ nāti̍yanti | sa̱pta̱da̱śaḥ pra̱jāpa̍tiḥ | pra̱jāpa̍te̱reva naiti̍

48.1-3

tṛtī̱ye gacchati̱ ya e̱tena̱ yaja̍teti̱ ya e̱tena̱ yaja̍te̱ yau̱ caina̍me̱vaṃ veda̱ trīṇi̍ ca || anu0 11
agastyaḥ svārājyaṃ mārutaḥ pañcaśāradīyo vā eṣa
yajñaḥ saptadaśaḥ prajāpatereva naiti
dvādaśo'nuvākaḥ
a̱syāja̍rāso̱ damā̍mari̱ṣāḥ | arca̱ddhūmāso a̱gnaya̍ḥ
pāva̱kāḥ | śvi̱tī̱caya̍ḥ śvā̱trāso̍ bhura̱ṇyava̍ḥ | vana̱rṣado̍
vā̱yavo̱ na somā̍ḥ | yajā̍no mi̱trāvaru̍ṇā | yajā̍ de̱vām̐
ṛ̱taṃ bṛ̱hat | agne̱ yakṣi̱ svandama̍ | a̱śvinā̱ piba̍tam̐ su̱taṃ
dī̱dya̍gnī śucivratā | ṛ̱tunā̍ yajñavāhasā

48.2-3

dve virū̍pe carata̱ḥ svarthe̍ | a̱nyānyā̍ va̱tsamupa̍dhāpayete
hari̍ra̱nyasyā̍ṃ bhavati sva̱dhāvā̍n | śu̱kroa̱nyasyā̍ṃ dadṛśe
su̱varcā̍ḥ | pūrvāpa̱raṃ ca̍rato mā̱yayai̱tau | śiśū̱ krīḍa̍ntau
pari̍yāto adhva̱raṃ | viśvā̍nya̱nyo bhuva̍nābhi̱caṣṭe̍ | ṛ̱tūna̱nyo vi̱dadha̍jjāyate̱ puna̍ḥ | trīṇi̍ śa̱tāt trīsa̱hasrā̍ṇya̱gniṃ | tri̱ṃśacca̍ de̱vānava̍cā saparyan

48.3-2

aukṣa̍n ghṛ̱tairāstṛ̍ṇan ba̱rhira̍smai | ādiddhotā̍raṃ
nya̍ṣādayanta | a̱gninā̱gniḥ sami̍dhyate | ka̱virgṛ̱hapa̍tiryuvā̍ | ha̱vyaṃ vāḍju̱hvā̍syaḥ | a̱gnirde̱vānā̍ṃ ja̱ṭhara̍ṃ | pū̱tada̍kṣaḥ ka̱vikra̍tuḥ | de̱vo de̱vebhi̱rāga̍mat | a̱gnimiśri̍yau
ma̱ruto̍ vi̱śvarū̍pyaḥ | ā tveṣamu̱gramava̍ īmahe va̱yaṃ

48.4

te svā̱nino̍ ru̱driyā̍ varṣa̱nirṇi̍jaḥ | si̱ṃhāna he̱ṣa
krata̍vaḥ su̱dāna̍vaḥ | yadu̍tta̱me ma̍ruto madhya̱me vā̍ | yadvāva̱me su̍bhagāso di̱viṣṭha | tato̍ no rudrā u̱tavā̱nuvasya̍†
agne̍ vi̱ttāddha̱viṣo̱ yadyajā̍maḥ | īḷe̍a̱gnim̐ svava̍sa̱nnamo̍bhiḥ | i̱ha pra̍sa̱tto vi̱caya̍tkṛ̱taṃ na̍ḥ | rathai̍ri̱va pra̱bhare̍ vāja̱yadbhi̍ḥ | pra̱da̱kṣi̱ṇinma̱rutām̐ stoma̍mṛdhyāṃ

48.5

śru̱dhicchru̍tkarṇa̱vahni̍bhiḥ | de̱vaira̍gne sa̱yāva̍bhiḥ | āsī̍dantu ba̱rhiṣi̍ | mi̱tro varu̍ṇo arya̱mā | prā̱taryāvā̍ṇo
adhva̱raṃ | viśve̍ṣāmadi̍tirya̱jñiyā̍nāṃ | viśve̍ṣāmati̍thirmānu̍ṣāṇāṃ | a̱gnirde̱vānā̱mava̍vṛṇānaḥ | su̱mṛḍī̱ko
bha̍vatu jā̱tave̍dāḥ | tve a̍gne su̱ma̱tiṃ bhikṣa̍māṇāḥ

48.6

di̱viśravo̍ dadhire ya̱jñiyā̍saḥ | naktā̍ca ca̱kruru̱ṣasā̱
virū̍pe | kṛ̱ṣṇañca̱ varṇa̍maru̱ṇañca̱ sanda̍dhuḥ | tvāma̍gna̱ ā̱dityāsa̍ ā̱sya̍ṃ | tvāṃ ji̱hvāṃ śuca̍yaścakrire kave | tvām̐
rā̍ti̱ṣāco̍ adhva̱reṣa̍saścire | tve de̱vā ha̱vira̍dantyāhu̍taṃ | ni̱tvā ya̱jñasya̱† sā̱dhana̍ṃ | agne̱ hotā̍ramṛ̱tvija̍ṃ
ma̱nu̱ṣvadde̍va dhīmahi̱ prace̍tasaṃ || jī̱raṃ dū̱tamama̍rtyaṃ

Commentaries (1)

Linked texts (4)