Pramāṇa · Search · About · API

Yajurbrahmana 58

Yajurbrāhmaṇa 58

Language
Sanskrit

58.1

ja̱bhāra̍ dyaura̱gneru̱pastha̍ upa̱hvaya̍nto̱ baddhamā̍no̱ yadamā̍naḥ
sa̱mudre'ha̱ṃsaḥ prasthi̍tasya || anu0 7
aṣṭamo'nuvākaḥ
a̱hama̍smi prathama̱jā ṛ̱tasya̍ | pūrva̍ṃ de̱vebhyo̍'mṛ̱tasya̱
nābhi̍ḥ | yo mā dadā̍ti̱ sa ide̱vamāvā̍ḥ | a̱hamanna̱manna̍ma̱danta̱madmi̍ | pūrva̍ma̱gnerapi̍ daha̱tyanna̍ṃ | yattau hāsā̍te
a̱hamutta̱reṣu̍ | vyātta̍masya pa̱śava̍ḥ su̱jambha̍ṃ | paśya̍nti
dhī̱rāḥ pracara̍nti pā̱kāḥ | jahā̍mya̱nyaṃ na ja̍hāmya̱nyaṃ
a̱hamanna̱ṃ vaśa̱micca̍rāmi

58.2

sa̱mānamartha̱ṃ parye̍mi bhu̱ñjat | komāmanna̍ṃ manu̱ṣyo̍dayeta | parā̍ke̱ anna̱ṃ nihi̍taṃ lo̱kaetata̍ | viśvai̍rde̱vaiḥ pitṛbhirgu̱ptamanna̍ṃ | yadadyate̍ lu̱pyate̱ yatparo̱pyate̍ | śa̱tata̍mī
sā ta̱nūrme̍ babhūva | ma̱hāntau̍ ca̱rū sa̍kṛ̱ddugdhena̍ pa̱prau | diva̍ñca̱ pṛśni̍ṃ pṛthi̱vīñca̍ sā̱kaṃ | tat sa̱ṃpibanto̱ nami̍nanti
ve̱dhasa̍ḥ | naitadbhūyo bhava̍ti̱ no kanī̍yaḥ

58.3

anna̍ṃ prā̱ṇamanna̍mapā̱namā̍huḥ | anna̍ṃ mṛ̱tyuṃ tamu̍ jīvā̱tumā̍huḥ | anna̍ṃ bra̱hmāṇo̍ ja̱rasa̍ṃ vadanti | anna̍māhuḥ
pra̱jana̍naṃ pra̱jānā̍ṃ | mogha̱manna̍ṃ vindate̱ apra̍cetāḥ | sa̱tyaṃ
bravīmi vadhaitsatyaṃ | nāryamaṇaṃ puṣyati no sakhāyaṃ | kevalāgho bhavati kevalādī | ahaṃ meghastanayan varṣannasmi | māmadantyahamadmyanyāna

58.4

aham̐ sadasṛto bhavāmi | madādityāadhi sarve
tapanti | devīṃ vācamajanayanta yadvāgvadantī | anantāmantādadhinirmitāṃ mahīṃ | yasyāṃ devā adadhurbhojanāni | ekākṣarā dvipadām̐ ṣaṭpadāñca | vācaṃ devā upajīvanti viśve | vācaṃ devā upajīvanti viśve | vācaṃ gandharvāḥ paśavo manuṣyāḥ | vācīmā viśvā bhuvanānyarpitā

58.5

sā nohavaṃ juṣatāmindrapatnī | vāgakṣaraṃ prathamajā
ṛtasya | vedānāṃ mātāmṛtasya nābhiḥ | sā no juṣāṇopayajñamāgāt | avantī devī suhavā me astu | yāmṛṣayo mantrakṛto manīṣiṇaḥ | anvaicchandevāstapasā śrameṇa | tāṃ devīṃ vācam̐ haviṣā yajāmahe | sā no dadhātu
sukṛtasya loke | catvāri vākparimitā padāni

58.6

tāni vidurbrāhmaṇā ye manīṣiṇaḥ | guhā trīṇi nihitā neṅgayanti | turīyaṃ vāco manuṣyā vadanti | śraddhayāgniḥ samidhyate | śraddhayā vindate haviḥ | śraddhāṃ bhagasya
mū̱rddhani̍ | vaca̱sā ve̍dayāmasi | pri̱yam̐ śra̱ddhe dada̍taḥ
pri̱yam̐ śra̱ddhe didā̍sataḥ | pri̱yaṃ bho̱jeṣu̱ yajva̍su

58.7

i̱daṃ me̍ udi̱taṃ kṛ̍dhi | yathā̍ de̱vā asu̍reṣu | śra̱ddhāmu̱greṣu̍ cakri̱re | evaṃ bho̱jeṣu̱ yajva̍su | a̱smāka̍mudi̱taṃ kṛ̍dhi
śra̱ddhāṃ de̱vā yaja̍mānāḥ | vā̱yugo̍pā upā̍sate | śra̱ddhām̐
hṛda̍yyayākū̍tyā | śra̱ddhayā̍ hūyate ha̱viḥ | śra̱ddhāṃ prā̱tarha̍vāmahe

58.8

śra̱ddhāṃ ma̱dhyandi̍na̱ṃ pari̍ | śra̱ddhām̐ sūrya̍sya ni̱mruci̍
śra̱ddhe śra̍ddhāpaye̱ha mā̍ | śra̱ddhā de̱vānadhi̍vaste | śra̱ddhā viśva̍mi̱daṃ jaga̍t | śra̱ddhāṃ kāma̍sya mā̱tara̍ṃ | ha̱viṣā̍ varddhayāmasi | brahma̍jajñā̱naṃ pra̍tha̱maṃ pu̱rastā̍t | visī̍mataḥ su̱ruco̍ve̱naā̍vaḥ | sa bu̱dhniyā̍ upa̱mā a̍syavi̱ṣṭhāḥ

58.9

sa̱taśca̱ yoni̱masa̍taśca̱ viva̍ḥ | pi̱tā vi̱rājā̍mṛṣa̱bho
ra̍yī̱ṇāṃ | a̱ntari̍kṣaṃ vi̱śvarū̍pa̱ ā vi̍veśa | tama̱rkaira̱bhya̍rccanti va̱tsaṃ | bra̱hma̱santa̱ṃ brahma̍ṇā va̱rddhaya̍ntaḥ | brahma̍ de̱vāna̍janayat | brahma̱ viśva̍mi̱daṃ jaga̍t | brahma̍ṇaḥ kṣa̱traṃ nirmi̍taṃ | brahma̍ brā̱hmaṇa ā̱tmanā̍ | a̱ntara̍sminni̱me lo̱kāḥ

58.10

a̱ntarviśva̍mi̱daṃ jaga̍t | brahmaiva bhū̱tānā̱ṃ jye̱ṣṭhaṃ | tena̍
ko'rhati syā̍ṅgituṃ | brahma̍nde̱vāstraya̍strim̐śat | brahma̍nnindraprajāpatī | brahma̍n ha̱ viśvā̍ bhū̱tāni̍ | nāvīvāntaḥ samāhi̍tā | cata̍sra̱ścāśā̱ḥ pracara̍ntva̱gnaya̍ḥ | i̱maṃ nau̍ ya̱jñaṃ na̍yatu prajānan | ghṛ̱taṃ pinva̍nna̱jaram̐̍ su̱vīra̍ṃ

58.11

brahma̍ samiddhavatyāhu̍tīnāṃ | ā gāvo̍agmannu̱ta bha̱drama̍kran | sīda̍ntu go̱ṣṭhe ra̱ṇaya̍ntva̱sme | pra̱jāva̍tīḥ puru̱rūpā̍
i̱ha syu̍ḥ | indrā̍ya pū̱rvīrupa̱so duhā̍nāḥ | indro̱ yajva̍ne
pṛṇa̱te ca̍ śikṣati | upeddadā̍ti̱ nasvaṃ mu̍ṣāyati | bhūyo̍
bhūyo ra̱yimida̍sya varddhayan | a̱bhinne̍ khi̱lle nida̍dhāti
de̱vayu̍ṃ | na tāna̍śanti̱ na tāa̱vī

58.12

gāvo̱ bhago̱ gāva̱ indro̍ meacchān | gāva̱ḥ soma̍sya
pratha̱masya̍ bha̱kṣaḥ | i̱mā yā gāva̱ḥ sajanāsa̱indra̍ḥ | i̱cchāmīddhṛ̱dā mana̍sā ci̱dindra̍ṃ | yū̱yaṃ gā̍vo medayathā kṛ̱śaṃ
ci̍t | a̱ślī̱laṃ ci̍t kṛṇuthāt su̱pratī̍kaṃ | bha̱draṃ gṛ̱haṃ kṛ̍ṇutha bhadravācaḥ | bṛ̱hadvo̱vaya̍ ucyate sa̱bhāsu̍ | pra̱jāva̍tīḥ
sū̱yava̍sam̐ru̱śantī̍ḥ | śu̱ddhāa̱paḥ su̍prapā̱ṇe piba̍ntīḥ || māva̍ste̱na ī̍śata̱māghaśam̐̍saḥ | pari̍vohe̱tī ru̱drasya̍ vṛñjyāt
upe̱damu̍pa̱parca̍naṃ | ā̱sugopūpa̍pṛcyatāṃ | upa̍rṣa̱bhasya̱ reta̍si | upe̍ndra̱ tava̍ vī̱ryye̍

Commentaries (1)

Linked texts (8)