Angirasi 102
Aṅgirasī 102
- Language
- Sanskrit
102.1
ma̱nve vā̍ṃ dyāvāpṛthivī su̱bhoja̍sau̱ sacai̍tasau̱ ye apra̍thethā̱mami̍tā̱ yoja̍nāni
prati̍ṣṭhe hyabha̍vata̱ṃ vasū̍nā̱ṃ te nau̍ muñcatamaṃha̍saḥ
102.2
prati̍ṣṭhe hyabha̍vata̱ṃ vasū̍nāṃ pra̱vṛddhe̍ de̱vī su̱bhage̍ urū̱cī
dyāvā̍pṛthivī bhavataṃ me syo̱ne te nau̍ muñcatamaṃha̍saḥ
102.3
asa̍ṃtāpe su̱tarpa̍sau huve̱hama̱rvī ga̍mbhī̱re ka̱vibhi̱rnama̱sye̍
dyāvā̍pṛthivī bhavataṃ me syo̱ne te nau̍ muñcatamaṃha̍saḥ
102.4
ye a̱mṛta̍ṃ bibhṛ̱tho ye ha̱vīṃṣi̱ ye strotyā̍ bibhṛ̱tho ye ma̍nu̱ṣyā̍n
dyāvā̍pṛthivī bhava̍taṃ me syo̱ne te no̍ muñcatama̍ṃhasaḥ
102.5
ye u̱sriyā̍ bibhṛ̱tho ye vana̱spatī̱nyayo̱rvā viśvā̱ bhuva̍nānya̱ntaḥ
dyāvā̍pṛthivī bhava̍taṃ me syo̱ne te no̍ muñcatama̍ṃhasaḥ
102.6
ye kī̱lāle̍na ta̱rpaya̍tho̱ ye ghṛ̱tena̱ yābhyāmṛ̱te na kiṃ ca̱na śa̱knuva̍nti
dyāvā̍pṛthivī bhava̍taṃ me syo̱ne te no̍ muñcatama̍ṃhasaḥ
102.7
yanme̱dama̱bhi̱śoca̍ti̱ yena̍yena vā kṛ̱taṃ pauru̍ṣeyā̱nna daivā̍t
staumi̱ dyāvā̍pṛthivī nā̍thi̱to jo̍havīmi̱ te no̍ muñcatama̍ṃhasaḥ
Linked texts (2)
- Atharvaveda — Sanskrit
- Śaunakasaṃhitā — Sanskrit