Angirasi 113
Aṅgirasī 113
- Language
- Sanskrit
113.1
tvayā̱ pūrva̱matha̍rvāṇo ja̱ghnu rakṣā̍ṃsyoṣadhe
tvayā̍ jaghāna ka̱śyapa̱stvayā̱ kaṇvo̱ aga̍styaḥ
113.2
tvayā̍ va̱yama̍psa̱raso̍ gandha̱rvāṃścāta̍yāmahe
aja̍śṛṅgyaja̱ rakṣaḥ sarvā̍ndāndhe̱na nā̍śaya
113.3
na̱dīṃ ya̍ntvapsara̱sopā̍ṃ tā̱ramava̍śva̱sam
gulgu̱luḥ pīlā̱ nala̍dyau3kṣagandhi̍ḥ pramanda̱nī
tatpare̍tāpsarasaḥ prati̍buddhā abhūtana
113.4
yatrā̍śva̱tthā nya̱grodhā̍ ma̱hāvṛ̱kṣāḥ śi̍kha̱ṇḍina̍taḥ
tatpa̍raitāpsarasa̱ḥ prati̍buddhā abhūtana
113.5
yatra̍ va̱ḥ preṅkhā hara̍tā̱ arju̍nā u̱ta yatrā̍ghā̱ṭāḥ ka̱rkarya̍ḥ sa̱ṃvada̍nti
tatpa̍raitāpsarasa̱ḥ prati̍buddhā abhūtana
113.6
e̱yama̍gantoṣa̍dhīnāṃ vī̱rudhā̍ṃ vī̱ryā̍vatī
a̱jaśṛ̱ṅgya̍rā̱ṭakī tīkṣṇaśṛṅgī vyṛ̍ṣatu
113.7
ā̱nṛtya̍taḥ śi̱khaṇḍinau̍ gandha̱rvasyā̍psarāpa̱teḥ
bhinadmi̍ mu̱ṣkāvapi̍ yā̱mi śepa̍ḥ
113.8
bhī̱mā indra̍sya he̱taya̍ḥ śa̱tamṛ̍ṣṭīraya̱smayī̍ḥ
tābhi̍rhavi̱rdānān̍gandha̱rvānava̍kā̱dānvyṛ̍ṣatu
113.9
bhī̱mā indra̍sya he̱taya̍ḥ śa̱tamṛ̍ṣṭīrhira̍ṇyayī̍ḥ
tābhi̍rhavi̱rdānān̍gandha̱rvānava̍kā̱dānvyṛ̍ṣatu
113.10
ava̍kā̱dāna̍bhi̱śocā̱napsu jyo̍taya māma̱kān
pi̱śācā̱ntsarvā̍noṣadhe̱ pra mṛ̍ṇīhi̱ saha̍sva ca
113.11
śvaivai̍kaḥ ka̱piri̍vaikaḥ kumā̱raḥ sa̍rvake̱śaka̍ḥ
pri̱yo dṛ̱śa i̍va bhū̱tvā ga̍ndha̱rvaḥ saṃca̍te̱ striya̱stami̱to nā̍śayāmasi̱ brahma̍ṇā vī̱ryā̍vatā
113.12
jā̱yā iddho̍ apsaraso̱ gandha̱rvāḥ pata̍yo yū̱yam
apa̍ dhāvatāma̱rtyā martyā̱nmā saṃca̍dhvam
Linked texts (2)
- Atharvaveda — Sanskrit
- Śaunakasaṃhitā — Sanskrit