Pramāṇa · Search · About · API

Angirasi 118

Aṅgirasī 118

Language
Sanskrit

118.1

ṛṣiḥ-bṛhaddivo'tharvā || devatā-varuṇaḥ
chandaḥ-1-8 triṣṭup; 9 bhurik parātijāgatā triṣṭup
tadi̱dāsa̍ bhuva̱neṣu̱ jyeṣṭha̱ṃ yato̍ ja̱jña u̱grastve̱ṣanṛ̍mṇaḥ
sa̱dyo ja̍jñā̱no ni ri̍ṇāti̱ śatrū̱nanu̱ yade̍na̱ṃ mada̍nti̱ viśva̍ ū̱māḥ

118.2

vāvṛ̍dhā̱naḥ śava̍sā̱ bhūryau̍jāḥ śatrū̱rda̱sāya̍ bhiya̱saṃ da̍dhāti
avya̍nacca̱ vyana̍cca sa̱sri saṃ ta̍ navanta pra̱bhṛtā̍ made̍ṣu

118.3

tve kratu̱mapi̍ pṛñcanti̱ bhūri̍ dvi̱ryadde̱te trirbha̍va̱ntyūmā̍ḥ
svādo̍: svādī̍yaḥ svā̱dunā̍ sṛjā̱ sama̱daḥ su madhu̱ madhu̍nābhi yodhīḥ

118.4

yadi̍ ci̱nnu tvā̱ dhanā̱ jaya̍nta̱ṃ raṇe̍raṇe anu̱mada̍nti̱ viprā̍:
ojī̍yaḥ śuṣmintsthi̱ramā ta̍nuṣva̱ mā tvā̍ dabhandure̱vāsa̍: ka̱śokā̍:

118.5

tvayā̍ va̱yaṃ śa̍śama̱he raṇe̍ṣu prapa̱śyanto̍ yu̱dhenyā̍ni̱ bhūri̍
co̱dayā̍mi ta̱ āyu̍dhā̱ vaco̍bhi̱: saṃ te̍ śiśā̱mi brahma̍ṇā̱ vayā̍ṃsi

118.6

ni tadddi̍dhiṣe̱vare̍ pa̱raṃ ca̱ yasmi̍nnā̱vithāva̍sā duro̱ṇe
ā sthā̍payata māta̱raṃ jigu̍tnuma̱taṃ inva̍t ka̱rvarā̍ṇi̱ bhūri̍

118.7

stu̱ṣva vaṣma̍npuruva̱rtmāna̍mṛ̱bhvāṇa̍minata̱mamā̱ptamā̱ptyānā̍m
ā darśa̍ti̱ śava̍sā̱ bhūryau̍jāḥ pra sa̱ṃkṣati̍ prati̱māna̍ṃ pṛthi̱vyāḥ

118.8

i̱mā brahma̍ bṛha̱ddiva̍: kṛ̱ṇava̱dindrā̍ya śū̱ṣama̍gri̱yaḥ sva̱rṣāḥ
ma̱ho go̱trasya̍ kṣayati sva̱rāḍā tu̱raści̍dṛ̱ṣvarma̍ṇa̱vṛtta̱pa̍svān

118.9

e̱vā ma̱hānbṛha̱ddi̱vo a̍tha̱rvāvo̍ca̱tsvāṃ ta̱nva̍1̱mindra̍meva
svasā̍rau mā̱tarbhi̍varī̱ a̍ri̱pre hi̱nvanti̍ caine̱ śava̍sā vardhayanti ca

118.1-2

ṛṣiḥ-bṛhadgivo'tharvā || devatā-1, 2 agniḥ; 3, 4 devāḥ; 5 draviṇodādayaḥ; 6, 9 10 viśvedevāḥ; 7 somaḥ; 8, 11 indraḥ || chandaḥ-1, 3-9, 11 triṣṭup; 2 bhurik triṣṭup; 10 virāḍ jagatī
mamā̍ṃgne̱ vacò̍ viha̱veṣva̍stu va̱yaṃ tvendhā̍nāsta̱nva̍ṃ puṣema
mahya̍ṃ namantāṃ pra̱diśa̱ścata̍sra̱stvayādhya̍kṣeṇa̱ pṛta̍nā jayema

118.2-2

agne̍ ma̱nyuṃ prati̍nu̱danpare̍ṣā̱ṃ tvaṃ no̍ go̱pāḥ pari̍ pāhi vi̱śvata̍ḥ
apā̍ñco yantu̱ niva̍tā du̱rasyavo̱maiṣā̍ṃ ci̱ttaṃ prabu̍dhā̱ṃ vi nai̍śat

118.3-2

mama̍ de̱vā viha̍ve santu̱ sarva̍ indra̍vanto ma̱ruto̱ viṣṇu̍ra̱gniḥ
mamāntari̍kṣamurulo̱kama̍stu̱ mahya̱ṃ vāta̍ḥ pavatā̱ṃ kāmā̍yā̱smai

118.4-2

mahya̍ṃ yajantā̱ṃ mama̱ yānīṣṭākṛ̍tiḥ sa̱tyā mana̍so me astu
eno̱ mā ni gā̍ṃ ka̱tamacca̱nāhaṃ viśve̍ de̱vā a̱bhi ra̍kṣantu̱ me̱ha

118.5-2

mayi̍ de̱vā dravi̍ṇa̱mā ya̍jantā̱ṃ mayyā̱śīra̍stu̱ mayi̍ de̱vahū̍tiḥ
daivā̱ hotā̍raḥ saniṣa̱nna e̱tadari̍ṣṭāḥ syāma ta̱nvā̱3̱̍ su̱vīrā̍ḥ

118.6-2

daivī̍ḥ ṣaḍu̱rvīruru̍ naḥ kṛṇota̱ viśve̍ devāsa i̱ha mā̍dayadhvam
mā no̍ vi̱dada̱bhibhā̱ mo aśa̍sti̱rmā no̍ vidaddu̱rjinā̱ dveṣyā̱ yā

118.7-2

ti̱sro de̱vīrmahi̍ na̱ḥ śarma̍ yacchata pra̱jāyai̍ nasta̱nve̱3̱̍ yacca̍ pu̱ṣṭam
mā hā̍smahi pra̱jayā̱ mā ta̱nūbhi̱rmā ra̍dhāma dviṣa̱te soma rājan

118.8-2

u̱ru̱vyacā̍ no mahi̱ṣaḥ śarma̍ yacchatva̱sminhave̍ puruhūtaḥ pu̱rukṣu
sa na̍ḥ pra̱jāyai̍ haryaśva mṛ̱ḍendra̱ mā no̍ rīriṣo̱ mā parā̍ dāḥ

118.9-2

dhā̱tā vi̍dhā̱tā bhuva̍nasya̱ yaspati̍rde̱vaḥ sa̍vi̱tābhi̍māti̱ṣāha̍ḥ
ā̱di̱tyā ru̱drā a̱śvino̱bhā de̱vāḥ pā̍ntu̱ yaja̍māna̱ṃ nirṛ̍thāt

118.10

ye na̍ḥ sa̱patna̱ā apa̱ te bha̍vantvindrā̱gnibhyā̱mava̍ bādhāmaha enān
ā̱di̱tyā ru̱drā upa̍rispṛśo̍ na u̱graṃ ce̱ttāra̱madhi̍rājamakrata

118.11

arvāñca̱mindra̍ma̱mruto̍ havāmahe̱ yo go̱jida̱bjida̍śva̱jidyaḥ
i̱maṃ no̍ ya̱jñaṃ vi̍hve śṛ̍ṇotva̱smāka̍mabhūddharya̱śvo me̱dī

Linked texts (3)