Angirasi 128
Aṅgirasī 128
- Language
- Sanskrit
128.1
su̱pa̱rṇastvā̱nva̍vindatsūka̱rastvā̍khananna̱sā
di̱psauṣa̍dhe̱ tvaṃ dipsa̍ntama̱rva kṛ̱tyākṛ̱taṃ ja̍hi
128.2
ava̍ jahi yātu̱dhānā̱nava̍ kṛ̱tyākṛ̱taṃ ja̍hi
atho̱ yo a̱smāndipsa̍ti̱ tamu̍ tvaṃ ja̍hyoṣadhe
128.3
ri̱śya̍syeva parī̱śāsa̱ṃ pari̍kṛtya̱ pari̍ tva̱caḥ
kṛ̱tyāṃ kṛ̱tyākṛ̱te de̍vā ni̱ṣkami̍va̱ prati̍ muñcata
128.4
puna̍ḥ kṛ̱tyāṃ kṛ̱tyākṛ̱te hasta̍gṛ̱hya parā̍ ṇaya
sa̱ma̱kṣama̱smā ā dhe̍hi̱ yathā̍ kṛ̱tyākṛ̱taṃ hana̍t
128.5
kṛ̱tyāḥ sa̍ṃntu kṛ̱tyākṛ̱te śapa̱thaḥ śa̍pathī̱yate
su̱kho ratha̍ iva vartatāṃ kṛ̱tyā kṛ̱tyākṛ̱taṃ puna̍ḥ
128.6
yadi̍ strī̱ yadi̍ vā̱ pumāṃnkṛ̱tyāṃ ca̱kāra̍ pā̱pmane̍
tāmu̱ tasmai̍ nayāma̱syaśva̍mivāśvābhi̱dhānyā̍
128.7
yadi̍ vā̱si de̱vakṛ̍tā̱ yadi̍ vā̱ puru̍ṣaiḥ kṛ̱tā
tāṃ tvā̱ punarṇyāmasīndrye̍ṇa sa̱yujo̍ va̱yam
128.8
agne̍ pṛtanā̱ṣāṭ pṛta̍nāḥ sahasva
puna̍ḥ kṛtyāṃ kṛ̱tyākṛte̍ prati̱hara̍ṇena harāmasi
128.9
kṛ̱tyevya̍dhani̱ vidhya̱ taṃ yaśca̱kāra̍ tama̱ṅga̍hi
na tvāmaca̍kṛṣe va̱yaṃ va̱dhāya̱ saṃ śi̍śīmahi
128.10
pu̱tra i̍va pi̱tara̍ṃ gaccha̱ svaja̍ i̱vābhi̍ṣṭhito daśa
ba̱ndhami̍vāvakrāmī ga̍ccha̱ kṛtyai̍ kṛtyā̱kṛta̱ṃ puna̍ḥ
128.11
ude̍ṇīva vāra̱ṇya̱bhiska̍ndai mṛ̱gīva̍ | kṛtyā ka̱rtāra̍mṛcchatu
128.12
iṣva̍ ṛ̱jīyaḥ patatu̱ dyāvā̍pṛthi̱vī taṃ prati̍
sā taṃ mṛ̱gama̍iva gṛhṇātu kṛtyā kṛtyā̱kṛta̱ṃ puna̍ḥ
128.13
a̱bhiri̍vaitu prati̱kūla̍manu̱kūla̍mivoda̱kam
su̱kho ratha̍ iva vartatāṃ kṛtya kṛtyā̱kṛta̱ṃ puna̍ḥ
Linked texts (2)
- Atharvaveda — Sanskrit
- Śaunakasaṃhitā — Sanskrit