Angirasi 133

Aṅgirasī 133

a̱ti̱mā̱trama̍vardhanta nodi̱vaṃ diva̍maspṛśan
bhṛgu̍ṃ hi̍ṃsi̱tvā sṛñja̍yā vaitaha̱vyāḥ parā̍bhavan

ye bṛ̱hatsā̍mānamāṅgira̱samārpa̍ya̱nbrāhma̍ṇaṃ janā̍ḥ
petva̍steṣā̍mubha̱yādumavi̍sto̱kānya̍vayat

ye brāhma̍ṇaṃ pratya̱ṣṭhīva̱ntye vā̍smiñchulkamarī̍ṣire
a̱sraste madhye̍ ku̱lyāyā̱ḥ keśā̱nvada̍nta āsate

bra̱hma̱ga̱vī pa̱cyamā̍nā̱ yāva̱tsābhi vi̱jaṅga̍he
tejo̍ rā̱ṣṭrasya̱ nirha̍nti̱ na vī̱ro jā̍yate̱ vṛṣā̍

krū̱rama̍syā ā̱śasa̍naṃ tṛ̱ṣṭaṃ pi̱śita̱masya̍te
kṣī̱raṃ yada̍syāḥ pī̱yate̱ tadvai pi̱tṛṣu̍ kilbi̱ṣam

u̱gro rājā̍ manya̍māno brā̱hma̱ṇaṃ yo ji̱ghatsa̍ti
parā̱ tatsi̍cyate rā̱ṣṭraṃ brā̍hma̱ṇo yatra̍ jī̱yate̍

a̱ṣṭāpa̍dī catura̱kṣī ca̍tuḥśro̱trā ca̍tu̱rhanu̍ḥ
dvya1̱̍syā dviji̍hvā bhū̱tvā sā rā̱ṣṭramava̍ dhūnute brahma̱jyasya̍

tadvai rā̱ṣṭramā sra̍vati nā̱vaṃ bhi̱nnāmi̱voda̍kam
bra̱hmāṇa̱ṃ yatra̱ hiṃsa̍nti̱ tadrā̱ṣṭraṃ ha̍nti du̱cchunā̍

taṃ vṛ̱kṣā apa̍ sedhanti chā̱yāṃ no mopa̍gā̱ iti̍
yo brāhma̍ṇasya saddhana̍ma̱bhi nārada̱ manya̍te

vi̱ṣame̱taddeva̍kṛtaṃ rājā̍ varu̍ṇobravīt
na brā̍hma̱ṇasya̱ gāṃ ja̱gdhvā rāṣṭre jā̍gā̱ra kaśca̱na

navai̍va tā nava̱tayo yā bhūmi̍rvyadhūnuta
pra̱jāṃ him̐si̱tvā brāhma̍ṇīmasam̐bha̱vyaṃ parā̍bhavan

yāṃ mṛ̱tāyā̍nuba̱dhnanti̱ kṛtya̍m̐ pa̱dayopa̍nīm
tadvai bra̍hma̱jya te de̱vā u̍pa̱stara̍ṇamabruvan

aśrū̍ṇi kṛ̱pamāṇa̍sya̱ yāni̍ jī̱tasya̍ vāvṛ̱tuḥ
taṃ vai bra̍hma̱jya te de̱vā a̱pāṃ bhā̱gama̍dhārayan

yena̍ mṛ̱taṃ sna̱paya̍nti̱ śmaśrū̍ṇi̱ yeno̍nda̱te
taṃ vai bra̍hma̱jya te de̱vā a̱pāṃ bhā̱gama̍dhārayan

na vṛ̱ṣe mai̍trāvaru̱ṇaṃ bra̍hma̱jyama̱bhi va̍rṣati
nāsmai̱ samiti̍ḥ kalpate̱ na mitra̍ṃ nayate va̱śam

Linked texts (3)