Angirasi 139
Aṅgirasī 139
- Language
- Sanskrit
139.1
parva̍tādvivo̱ yone̱raṅgā̍daṅgā̱tsambhṛ̍tam | śeṣo̱ garbha̍sya reto̱dhāḥ sarau̍ pū̱rṇami̍vā da̍dhat
139.2
yathe̱yaṃ pṛ̍thi̱vī ma̱hī bhū̱tānā̱ṃ garbha̍māda̱dhe | e̱vā da̍dhāmi te̱ garbha̱ṃ tasmai̍ tvāmava̍se huve
139.3
garbha̍ṃ dhehi sinīvāli̱ garbha̍ṃ dhehi sarasvati
garbha̍ṃ te̱ a̱śvino̍bhā̱ dhattā̱ṃ puṣka̍rasrajā
139.4
garbha̍ṃ te mi̱trāvaru̍ṇau̱ garbha̍ṃ de̱vo bṛ̱haspati̍ḥ
garbha̍ṃ ta̱ indra̍ścā̱gniśca̱ garbha̍ṃ dhā̱tā da̍dhātu te
139.5
viṣṇu̱ryoni̍ṃ kalpayatu̱ tvaṣṭā̍ rū̱pāṇi̍ piṃśatu
ā si̍ñcatu pra̱jāpa̍tirdhā̱tā garbha̍ṃ dadhātu te
139.6
yadve̱da rājā̱ varu̍ṇo̱ yadvā̍ de̱vī sara̍svatī
yadindro̍ vṛtra̱hā ve̱da̱ tadgarbha̍kara̱ṇaṃ piba
139.7
garbho̱ asyoṣa̍dhīnā̱ṃ garbho̱ vana̱spatī̍nām
garbho̱ viśva̍sya bhū̱tasya̱ so a̍gne̱ garbha̍meha dhāḥ
139.8
adhi̍ skanda vī̱raya̍sva̱ garbha̍mā dhe̍hi̱ yonyā̍m
vṛṣā̍si vṛṣṇṇa̱yāvanpra̱jāyai̍ tvā nayāmasi
139.9
vi ji̍hīṣva bārhatsā̱me garbhe̍ste yoni̱mā śa̍yām
adu̍ṣṭe de̱vāḥ pu̱traṃ sauma̍pā u̱bhayā̍vinam
139.10
dhātu̱ḥ śreṣṭhe̍na rū̱peṇā̱syā nāryā̍ gavī̱nyoḥ
pumā̍ṃsaṃ pu̱tramā dhe̍hi daśa̱me mā̱si sūta̍ve
139.11
tvaṣṭu̱ḥ śreṣṭhe̍na rū̱peṇā̱syā nāryā̍ gavī̱nyoḥ
pumā̍ṃsaṃ pu̱tramā dhe̍hi daśa̱me mā̱si sūta̍ve
139.12
savi̱tuḥ śreṣṭhe̍na rū̱peṇā̱syā nāryā̍ gavī̱nyoḥ
pumā̍ṃsaṃ pu̱tramā dhe̍hi daśa̱me mā̱si sūta̍ve
139.13
prajā̍pate̱ śreṣṭhe̍na rū̱peṇā̱syā nāryā̍ gavī̱nyoḥ
pumā̍ṃsaṃ pu̱tramā dhe̍hi daśa̱me mā̱si sūta̍ve
Linked texts (2)
- Atharvaveda — Sanskrit
- Śaunakasaṃhitā — Sanskrit