Angirasi 142
Aṅgirasī 142
- Language
- Sanskrit
142.1
nava̱ṃ prā̱ṇānnava̍bhiḥ saṃ mi̍mīte dī̱rghā̱yu̱tvāya̍ śata̱śāra̍dāya
hari̍te̱ trīṇi̍ raja̱te trīṇyaya̍si̱ trīṇi̱ tapa̍sāvi̍ṣṭhitāni
142.2
a̱gniḥ sūrya̍śca̱ndramā̱ bhūmi̱rāpo̱ dyaura̱ntari̍kṣaṃ pra̱diśo̱ diśa̍śca
ā̱rta̱vā ṛ̱tubhi̍ḥ saṃvidā̱nā ane̍na̱ṃ mā tri̱vṛtā̍ pārayantu
142.3
traya̍ḥ poṣā̍stri̱vṛti̍ śrayantā̱manva̱ktu pū̱ṣā paya̍sā ghṛ̱tena̍
anna̍sya bhū̱mā puru̍ṣasya bhū̱mā bhū̱mā pa̍śū̱nāṃ ta i̱ha śra̍yantām
142.4
i̱mamā̍di̱tyā vasu̍nā̱ samṛ̍kṣa̱temama̍gne vardhaya vāvṛdhā̱naḥ
i̱mami̍ndra̱ saṃ sṛ̍ja vī̱rye̍ṇā̱smiṃstri̱vṛcchra̍yatāṃ poṣayi̱ṣṇu
142.5
bhūmi̍ṣṭvā pātu hari̍tena vi̱śvabhṛ̱dagniḥ pi̍pa̱rtvaya̍sā sa̱joṣā̍:
vī̱rudbhi̍ṣṭṭe̱ ārju̍naṃ saṃvidā̱naṃ dakṣa̍ṃ dadhātu sumana̱syamā̍nam
142.6
tre̱dhā jā̱taṃ janma̍ne̱daṃ hira̍ṇyama̱gnereka̍ṃ pri̱yata̍maṃ babhūva̱ soma̍syai̱kaṃ hi̍ṃsi̱tasya̱ parā̍patat
a̱pāme̱kaṃ vedhasā̱ṃ reta̍ āhu̱statte̱ hira̍ṇyaṃ trivṛ̱da̱stvāryu̍ṣe
142.7
tryāyu̍ṣaṃ jamada̍gneḥ ka̱śyapa̍sya tryāyu̱ṣam
tre̱dhāmṛta̍sya cakṣa̍ṇa̱ṃ trīṇyāyū̍m̐ṣi tekaram
142.8
traya̍: supa̱rṇāstri̱vṛtā̱ yadā̱yannekā̍kṣarama̱bhisaṃbhūya̍ śa̱krāḥ
pratyau̍hanmṛ̱tyuma̱mṛte̍na sā̱kamanta̱rdadhā̍nā duri̱tāni̱ viśvā̍
142.9
di̱vastvā̍ pātu hari̍ta̱ṃ madhyā̍ttvā pātva̱rjuna̍m
bhūmyā̍ a̱yasma̍yaṃ pātu prāgā̍ddevapu̱rā aya̍m
142.10
i̱māsti̱sro de̍vapu̱rāstāstvā̍ṃ rakṣantu sa̱rvata̍:
tāstvaṃ bibhra̍dva̱rca̱syutta̍ro dviṣa̱tāṃ bha̍va
142.11
pu̱raṃ de̱vānā̍ma̱mṛta̱ṃ hira̍ṇya̱ṃ ya ā̱ba̍dhe pratha̱mo de̱vo agre̍
tasmai̱ namo̱ daśa̱ prācī̍: kṛṇo̱myanu̍ manyatāṃ trivṛ̱dāba̍dhe me
142.12
ā tvā̍ cṛta̱tvarya̍mā pū̱ṣā bṛha̱spati̍:
aha̍rjātasya̱ yannāma̱ tena̍ tvārtiṃ cṛtāmasi
142.13
ṛ̱tubhi̍ṣṭvārtavairāryuṣe̱ varca̍se tvā
sa̱ṃva̱tsa̱rasya̱ teja̍sā̱ tena̱ saṃha̍nu kṛṇmasi
142.14
ghṛ̱tādu̱llupta̱ṃ madhu̍nā̱ sama̍kta̱ṃ bhūmi̍ṃdṛ̱ṃhamacyu̍taṃ pārayi̱ṣṇu
bhi̱ndatsapa̱tnānadha̍rām̐śca kṛ̱ṇvadā mā̍ roha maha̱te saubha̍gāya
Linked texts (2)
- Atharvaveda — Sanskrit
- Śaunakasaṃhitā — Sanskrit