Angirasi 144

Aṅgirasī 144

ā̱varta̍sta̱ āva̍rtaḥ parāva̱rtasta̱ āva̍rtaḥ
i̱haiva bha̍va̱ mā nu gā̱ mā pūrvā̍nanu̍ gāḥ pi̱tṝntsuṃ ba̍dhnāmi te dṛḍham

yattvā̍bhice̱ruḥ puru̍ṣaḥ svo yada̍ra̱ṇo jana̍ḥ
unmo̍canapramo̱cane̍ u̱bhe vā̱cā va̍dāmi te

yaddu̱drohi̍tha̱ śepi̍ṣe striyai̍ puṃse acittyā
unmo̍canapramo̱cane̍ u̱bhe vā̱cā va̍dāmi te

yadena̍so mā̱tṛkṛ̍tāccche̱ṣe pi̱tṛkṛ̍tācca̱ yat
unmo̍canapramo̱cane̍ u̱bhe vā̱cā va̍dāmi te

yattai̍ mā̱tā yattai̍ pi̱tā jā̱mirbhrātā̍ ca̱ sarja̍taḥ
pratyaksai̍vasva bheṣa̱jaṃ ja̱rada̍ṣṭiṃ kṛṇomi tvā

i̱haidhi̍ puruṣa̱ sarve̍ṇa̱ mana̍sā sa̱ha
dū̱tau ya̱masya̱ mānu̍ gā̱ adhi̍ jīvapu̱rā i̍hi

anu̍hūtaḥ puna̱rehi̍ vi̱dvānu̱daya̍ṃnaṃ pa̱thaḥ
ā̱roha̍ṇamā̱krama̍ṇaṃ jīva̍tojito̱ryana̍m

mā bi̍bherna ma̍riṣyasi ja̱rada̍ṣṭiṃ kṛṇomi tvā
nira̍vocamahaṃ ya̱kṣmamaṅge̍bhyo aṅga̱jvara̱ṃ tava̍

aṅga̍bhedo aṅga̱jvaro yaśca̍ te hṛda̱yāma̍yaḥ
ya̱kṣmaḥ śye̱na i̍va̱ prāpa̍ptadvācā sā̱ḍhaḥ pa̍rasta̱rām

ṛṣī̍ bodhapratībo̱dhāva̍sva̱pno yaśca̍ jāgṛ̱viḥ
tau te̍ prā̱ṇasya̍ go̱ptārau̍ di̱vā nakta̍ṃ ca jāgṛtām

a̱yama̱gnirupa̍sadya i̱ha sūrya̍ u̱detu̍ te
u̱dehi̍ mṛ̱tyorga̍mbhī̱rātkṛ̱ṣṇāccittama̍sa̱spari̍

namo̍ ya̱māya̱ namo̍ astu mṛ̱tyave̱ nama̍ḥ pi̱tṛbhya̍ u̱ta ye naya̍nti
u̱tpāra̍ṇasya̱ yo veda̱ tama̱gniṃ pu̱ro da̍dhe̱smā ari̍ṣṭatātaye

etu̍ prā̱ṇa etu̱ mana̱ etu̱ cakṣū̱ratho̱ bala̍m
śarī̍ramasya̱ saṃ vi̍dā̱ṃ tatpa̱dbhyāṃ prati̍ tiṣṭhatu

prā̱ṇenā̍gne̱ cakṣu̍ṣā̱ saṃ sṛ̍jemaṃ samī̍raya ta̱nvā̱3̱ saṃ bale̍na
vetthāmṛta̍sya̱ mā nu gā̱nmā nu bhūmi̍gṛho bhuvat

mā te̍ prā̱ṇa upa̍ dasanmo a̍pā̱nopi̍ dhāyi te
sūryya̍stvādhipatirmṛtyorudā̱ryyacchatu
ra̱śmibhi̍ḥ

i̱yama̱ntarva̍dati
ji̱hvā ba̱ddhā pa̍niṣpa̱dā
tvayā̱ yakṣma̱ṃ nira̍vocaṃ śa̱taṃ ropī̍śca ta̱kmana̍ḥ

a̱yaṃ lo̱kaḥ pri̱yata̍mo de̱vānāmapa̍rājitaḥ
yasmai̱ tvami̱ha mṛ̱tyave̍ di̱ṣṭaḥ puru̍ṣa̱ jajñi̍ṣe
sa ca̱ tvānu̍ hvayāmasi̱ mā purā ja̱raso̍ mṛthāḥ

Linked texts (2)