Pramāṇa · Search · About · API

Angirasi 158

Aṅgirasī 158

Language
Sanskrit

158.1

ṛṣiḥ- bhṛgvaṅgirāḥ || devatā - yakṣmanāśanam || chandaḥ - 1 atijagatī; 2 kakummatī
prastārapaṅ ktiḥ; 3 sataḥpaṅktiḥ
a̱gneri̍vāsya̱ daha̍ta eti śu̱ṣmiṇa̍ u̱teva̍ ma̱tto vi̱lapa̍nna̱pāya̍ti
a̱nyama̱smadi̍cchatu̱ kaṃ ci̍davra̱tastatpu̍rva̱dhāya̱ namo̍ astu ta̱kmane̍

158.2

namo̍ ru̱drāya̱ namo̍ astu ta̱kmane̱ namo̱ rāje̍ varu̍ṇāya̱ tviṣī̍mate
namo̍ di̱ve nama̍: pṛthi̱vyai nama̱ oṣa̍dhībhyaḥ

158.3

a̱yaṃ yo a̍bhiśocayi̱ṣṇurviśvā̍ rū̱pāṇi̍ hari̱tā kṛ̱ṇoṣi̍
tasmai̍ te̱ruṇāya̍ ba̱bhrave̱ nama̍: kṛṇomi̱ vanyāya̍ ta̱kmane̍

158.1-2

3
i̱mā yāsti̱sraḥ pṛ̍thi̱vīstāsā̍ṃ ha̱ bhūmi̍rutta̱mā
tāsā̱madhi̍ tva̱co a̱haṃ bheṣa̱jaṃ samu̍ jagrabham

158.2-2

śreṣṭha̍masi bheṣa̱jānā̱ṃ vasi̍ṣṭhaṃ vī̱rudhā̍nām
somo̱ bhaga̍ iva̱ yāme̍ṣu de̱veṣu̱ varu̍ṇo yathā̍

158.3-2

reva̍tīranā̍dhuṣaḥ siṣā̱sava̍: siṣāsatha
u̱ta stha ke̍śa̱dṛṃṃha̍ṇī̱rathò̍ ha keśa̱vardha̍nīḥ

158.1-3

kṛ̱ṣṇaṃ ni̱yāna̱ṃ hara̍yaḥ supa̱rṇā a̱po vasā̍nā̱ diva̱mutpa̍tanti
ta āva̍vṛtra̱ntsada̍nādṛta̱syādiddhṛtena̍ pṛthi̱vīṃ vyū̍duḥ

158.2-3

paya̍svatīḥ kṛṇuthā̱pa oṣa̍dhīḥ śi̱vā yadeja̍thā maruto rukmavakṣasaḥ
ūrja̍ṃ ca̱ tatra̍ su̱mati̍ṃ ca pinvata̱ yatrā̍ naro marutaḥ siñca̍thā̱ madhu̍

158.3-3

u̱duprutò̍ marutastām̐ ī̍yata vṛ̱ṣṭyā viśvā̍ ni̱vata̍spṛṇāti
eja̍ti̱ glahā̍ kṛ̱nye̍va tu̱nnairu̍ṃ tundrānā patye̍va jā̱yā

158.1-4

sa̱sruṣī̍stadapaso di̱vā nakta̍ṃ ca sa̱sruṣī̍: | vare̍ṇyakratura̱hamapo̍ de̱vīrupa̍ hvaye

158.2-4

otā̱ āpa̍: karma̱ṇyā̍ muñcantvitaḥ praṇī̍taye | sa̱dyaḥ kṛ̱ṇvantveta̍ve

158.3-4

de̱vasya̍ savi̱tuḥ sa̱ve karma̍ kṛṇvantu mānu̱ṣāḥ | śaṃ no̍ bhavantvapa̱ oṣa̍dhīḥ śi̱vāḥ

158.1-5

hi̱mava̍taḥ pra sra̍vanti̱ sindhau̍ sama̱ha sa̍ṃga̱maḥ
āpo̍ ha̱ mahya̱ṃ tadde̱vīrdada̍nhṛdyota̱bheṣa̍jam

158.2-5

yanme̍ a̱kṣyorā̍di̱dyota̱ pārṣṇyo̱ḥ prapa̍dośca̱ yat
āpa̱statsarva̍ṃ niṣka̍ranbhi̱ṣajā̍ṃ su̱bhiṣa̍ktamāḥ

158.3-5

sindhu̍patnīḥ sindhu̍rājñī̱ḥ sarvā̍ yā na̱dya̍1̱ sthana̍
da̱tta na̱stasya̍ bheṣa̱jaṃ tenā̍ vo bhunajāmahai

Linked texts (2)