Pramāṇa · Search · About · API

Angirasi 179

Aṅgirasī 179

Language
Sanskrit

179.1

ṛṣiḥ—atharvā || devatā—indraḥ || chandaḥ—anuṣṭup
pari̍ va̱rtmāni̍ sa̱rvata̱ indra̍ḥ pū̱ṣā ca̍ sasratuḥ
muhya̍ntva̱dyāmū̱ḥ senā̍ a̱mitrā̍ṇāṃ para̱starā̱m

179.2

mū̱ḍhā a̱mitrā̍ścaratāśī̱rṣāṇa̍ i̱vāha̍yaḥ | teṣā̍ṃ vo a̱gnimū̍ḍhānā̱mindro̍ hantu vara̍ṃvaram

179.3

aiṣu̍ nahya vṛṣā̱jina̱ṃ hari̍ṇasyā bhi̱yaṃ kṛ̍dhi | parā̍ṅ‌mitrā e̍ṣatva̱rvācī̱ gauru̍peṣatu

179.1-2

āyama̍gantsavi̱tā kṣureṇo̱ṣṇena̍ vāya u̱dake̍nehi̍
ā̱di̱tyā ru̱drā vasa̍va undantu sace̍tasaḥ soma̍sya̱ rājño̍ vapatu̱ prace̍tasaḥ

179.2-2

adi̍tiḥ śmaśru̍ vapa̱tvārpa̍ undantu̱ varca̍sā
ci̱ki̱tsatu̍ pra̱jāpa̍tirdī̱rghāyu̍tvāya̱ cakṣa̍se

179.3-2

yenāva̍patsavi̱tā kṣureṇa̱ soma̍sya̱ rājño̱ varu̍ṇasya vi̱dvān
tena̍ brahmāṇo vapa̱teda̍masya̱ gomā̱naśva̍vānayama̍stu pra̱jāvā̍n

179.1-3

gi̱rāva̍raṅga̱rāṭe̍ṣu̱ hira̍ṇye̱ goṣu̱ yadyaśa̍ḥ | surā̍yāṃ sicya̍mānāyāṃ kī̱lāle̱ madhu̱ tanmaye̍

179.2-3

a̱śvinā̍ sāra̱gheṇa̍ mā̱ madhu̍nāṅkaṃ śubhaspatī | yathā̱ bhaga̍svatī̱ṃ vāca̱māvadā̍ni̱ janā̱m̐ anu̍

179.3-3

mayi̱ varco̱ atho̱ yaśotho̍ ya̱jñasya̱ yatpaya̍ḥ | tanmayi̍ pra̱jāpa̍tirdi̱vi dyāmi̍va dṛṃhatu

179.1-4

yathā̍ mā̱ṃsaṃ yathā̱ surā̱ yathākṣā adhi̍de̱vane̍
yathā̍ pu̱ṃso vṛ̍ṣaṇya̱ta striyā̱ṃ niha̍nyate̱ mana̍ḥ
e̱vā tai aghnye̱ manodhi̍ va̱tse ni ha̍nyatām

179.2-4

yathā̍ ha̱stī ha̱stinyā̍ḥ pa̱dena̍ pa̱damu̍dyu̱je
yathā̍ pu̱ṃso vṛ̍ṣaṇya̱ta striyā̱ṃ niha̍nyate̱ mana̍ḥ
e̱vā te̍ aghnye̱ manodhi̍ va̱tse ni ha̍nyatām

179.3-4

yathā̍ pra̱dhiryatho̍pa̱dhiryathā̱ nābhya̍ṃ pra̱dhāvadhi̍
yathā̍ pu̱ṃso vṛ̍ṣaṇya̱ta striyā̱ṃ niha̍nyate̱ mana̍ḥ
e̱vā tai aghnye̱ manodhi̍ va̱tse ni ha̍nyatām

179.1-5

yadanna̍ma̱dmi ba̍hu̱dhā virū̍pa̱ṃ hira̍ṇya̱maśva̍mu̱ta gāma̱jāmavi̍m
yade̱va kiṃ ca̍ pratija̱grahā̱hama̱gniṣṭaddhotā̍ suhu̱taṃ kṛ̍ṇotu

179.2-5

yanmā̍ hu̱tamahu̍tamā̱jagā̍ma da̱ttaṃ pi̱tṛbhiranu̍mataṃ manuṣyai̍ḥ
yasmā̍nme̱ mana̱ udvi̍va̱ rāra̍ṃjītyagniṣṭaddhotā̍ suhu̱taṃ kṛ̍ṇotu

179.3-5

yadanna̍madyamanṛ̱tena̍ de̱vā a̱dāsyannadā̍syannuta sa̍ṃgṛṇā̱mi
vai̱śvāna̱rasya̍ maha̱to ma̍hi̱mnā śi̱vaṃ mahya̱ṃ madhu̍mada̱stvanna̍m

179.1-6

yathā̍si̱taḥ pra̱thaya̍te va̱śām̐ anu̱ vapū̍ṃṣi kṛ̱ṇvannasu̍rasya mā̱yayā̍
e̱vā te̍ śe̱paḥ sa̱hasyā̱yama̱rkeṇā̱ṅgaṃ sa̍ṃsama̱kaṃ kṛ̍ṇotu

179.2-6

yathā̍ pasa̍stāyādu̱raṃ vāte̍na sthū̱labha̍ṃ kṛ̱tam
yāva̱tpara̍svataḥ pasa̍stāvatte vardhatā̱ṃ pasa̍ḥ

179.3-6

yāva̱ddarī̍naṃ pāra̍svataṃ hāsti̱naṃ gā̍rda̱bhaṃ ca̱ yat
yāva̱daśva̍sya vā̱jina̱stāva̍tte vardhatā̱ṃ pasa̍ḥ

179.1-7

eha yā̍tu̱ varu̍ṇaḥ somo̍ a̱gnirbṛha̱spati̱rvasu̍bhire̱ha yā̍tu
a̱sya śriya̍mupa̱saṃyā̍ta̱ sarva̍ u̱grasya̍ ce̱ttuḥ saṃma̍nasaḥ sajātāḥ

179.2-7

yo va̱ḥ śuṣmo̱ hṛda̍yeṣva̱ntarākū̍ṃtiryā vo̱ mana̍si pravi̍ṣṭā
tāntsī̍vayāmi ha̱viṣā̍ ghṛ̱tena̱ mayi̍ sajātā̱ rama̍tirvo astu

179.3-7

i̱haiva sta̱ māpa̍ yātā̱dhya̱smatpū̱ṣā pu̱rastā̱dapa̍thaṃ vaḥ kṛṇotu
vāsto̍ṣpa̱tiranu̍ vo johavītu̱ mayi̍ sajātā̱ rama̍tirvo astu

179.1-8

saṃ va̍ḥ pṛcyantāṃ ta̱nva1̱̍ḥ saṃ manā̍ṃsi̱ samu̍ vra̱tā
saṃ vo̱yaṃ brahmaṇa̱spati̱rbhaga̱ḥ saṃ vo̍ ajīgamat

179.2-8

sa̱ṃjñapa̍naṃ vo̱ mana̍sodho̍ sa̱ṃjñapa̍naṃ hṛda̍ḥ
atho̱ bhaga̍sya̱ yacchrānta̱ṃ tena̍ saṃjñapa̍yāmi vaḥ

179.3-8

yathā̍di̱tyā vasu̍bhiḥ saṃbabhūva̱rmaru̍dbhi̱rugrā ahṛ̍ṇīyamānāḥ
e̱vā tri̍ṇāma̱nnahṛ̍ṇīyamāna i̱māñjanā̱ntsarma̍namaskṛdhī̱ha

Linked texts (4)