Pramāṇa · Search · About · API

Angirasi 258

Aṅgirasī 258

Language
Sanskrit

258.1

ṛṣiḥ-aṅgirāḥ ( kitavavadhakāmaḥ ) || devatā - indraḥ
chandaḥ-1, 2, 5, 8, 9 anuṣṭup; 3, 7 triṣṭup ; 4 jagatī; 6 bhurik triṣṭup
yathā̍ vṛ̱kṣama̱śani̍rvi̱śvāhā̍ ha̱ntya̍prati
e̱vāha̱madya ki̍ta̱vāna̱kṣairba̍dhyāsamapra̱ti

258.2

tu̱rāṇā̱ma̍turāṇāṃ vi̱śāmava̍rjuṣīṇām
sa̱maitu̍ vi̱śvato̱ bhago̍ anta̱rhasta̍ṃ kṛ̱taṃ marma̍

258.3

ī̱ḍe a̱gniṃ svāva̍suṃ namo̍bhi̱riha pra̍sa̱kto vi ca̍yatkṛ̱taṃ na̍:
rathai̍riva̱ pra bhare̍ vā̱jaya̍dbhiḥ pradakṣi̱ṇaṃ ma̱rutā̱ṃ stoma̍mṛdhyām

258.4

va̱yaṃ ja̍yema̱ tvayā̍ yu̱jā vṛ̱ta̍ma̱smāka̱maṃśa̍ṃmuda̱vā bhare̍bhare
a̱smabhya̍mindra̱ varī̍yaḥ su̱gaṃ kṛ̍dhi̱ pra śatrū̍ṇāṃ maghavanvṛ̱ṣṇyā̍ ruja

258.5

ajai̍ṣaṃ tvā̱ saṃli̍khita̱majai̍ṣamuta sa̱ṃrudha̍m
avi̍ṃ vṛ̱ko yathā̍ ma̱thede̱vā ma̍thnāmi te kṛ̱tam

258.6

u̱ta pra̱hāma̍tidī̱vyo jaya̍ti kṛ̱tamiva̱ śvaghnī vi ci̍noti kā̱le
yo de̱vakā̍mo̱ na dhana̍ṃ ru̱ṇaddhi̱ sami̱ttaṃ rāya̍: sṛjati sva̱dhābhi̍:

258.7

gobhi̍ṣṭa̱remā̍ma̱tiṃ du̱revā̱ṃ yave̍na vā̱ kṣudha̍ṃ puruhūta vi̱śve̍
va̱yaṃ rāja̍su pratha̱mā dhanā̍nyari̍ṣṭāso vṛ̱janī̍bhirjayema

258.8

kṛtaṃ me dakṣi̍ṇe hastai jayo me̍ savya āhi̍taḥ
go̱jidbha̍yāsa̱maśva̍jiddhana̱ṃjayo hira̍ṇyajit

258.9

akṣāḥ phala̍vatīṃ dyuvaṃ datta gāṃ kṣī̱riṇī̍miva
saṃ māṃ kṛ̱tasya̱ dhāra̍yā̱ dhanuḥ snāvnaiva nahyata

Linked texts (2)