Angirasi 260

Aṅgirasī 260

ṛca̱ṃ sāma̍ yajāmahe̱ yābhyā̍ṃ ka̱rmāṇi̍ ku̱rvate̍
e̱te sada̍si rājato ya̱jñaṃ de̱veṣu̍ yacchataḥ

ṛca̱ṃ sāma̱ yadaprā̍kṣaṃ ha̱viro jo̱ yaju̱rbala̍m
e̱ṣa mā tasmā̱nmā hi̍ṃsī̱dveda̍ḥ pṛ̱ṣṭaḥ śa̍cīpate

ye te̱ panthā̍no̱ divo̱ yebhi̍rviśva̱mmaira̍yaḥ | tebhi̍ḥ sumna̱yā dhe̍hi no vaso

ti̱raści̍rājerasi̱tātpṛdā̍koḥ pari̱ saṃbhṛ̍tam | tatka̱ṅkapa̍rvaṇo vi̱ṣamiyaṃ vī̱ruda̍nīnaśat

i̱yaṃ vī̱runmadhu̍jātā madhu̍ścunmadhulā madhu̍ḥ | sā vihṛ̍tasya bheṣa̱jyatho̍ maśa̱kaja̍mbhanī

yato̍ da̱ṣṭaṃ yato̍ dhī̱taṃ tata̍ste nirhvayāmasi | a̱rbhasya̍ tṛpra̱daṃśi̍no maśa̱kasyāra̍saṃ vi̱ṣam

a̱yaṃ yo va̱kro vipa̍rūrvya̱ṅgo mu̍khāni va̱krā vṛ̍ji̱nā kṛ̱ṇoṣi̍
tāni̍ tvaṃ brahmaṇaspata iṣī̍kā̍miva̱ saṃ na̍maḥ

a̱rasa̍sya̱ śarko̍ṭa̱sya nī̱cīna̍syopasa̱rpata̍ḥ | vi̱ṣaṃ hya̍syādi̱ṣyatho̍ enamajījabham

na te̍ bā̱hvorbala̱masti̱ na śīrṣe̱ nota ma̍ṃdhya̱taḥ | atha̱ kiṃ pā̱payā̍muyā pucche̍ bibharṣyarbha̱kam

a̱danti̍ tvā pipīli̍kā̱ vi vṛ̍ścanti ma̱yūrya̍ḥ | sarve̍ bhala bravātha śākau̍ṭama̱rasaṃ vi̱ṣam

ya u̱bhābhyā̱ṃ prahara̍si pu̱cchena̍ cā̱sye̍na ca | ā̱sye̍3 na tai vi̱ṣaṃ kimu̍ te puccha̱dhāva̍sat

Linked texts (2)