Pramāṇa · Search · About · API

Angirasi 278

Aṅgirasī 278

Language
Sanskrit

278.1

apa̍citāṃ lohi̍nīnāṃ kṛ̱ṣṇā mā̱teti̍ śuśruma
mune̍rde̱vasya̍ mū̱lena̍ sarvā̍ vi̱dhyāmi̍ tā a̱ham

278.2

vi̱dhyāmyā̍sāṃ pratha̱māṃ vi̱dhyāmyu̱ta ma̍dhya̱mām
i̱daṃ ja̍ṃghanyā̱māsā̍mā cchi̍nadmi stu̱kāmiva̍

278.3

tvā̱ṣṭreṇā̱haṃ varca̍sā̱ vi te̍ ī̱rṣyāma̍mīmadam
atho̍ yo ma̱nyuṣṭe̍ pate̱ tama̍ te śamayāmasi

278.4

vra̱tena̍ tvāṃ vratapate̱ sama̍kto vi̱śvāhā̍ su̱manā̍ dīdihī̱ha
taṃ tvāṃ va̱yaṃ jā̍tavedaḥ sami̱ddhaṃ pra̱jāva̍nta̱ upa̍ sadema̱ sarvai̍

278.1-2

pra̱jāva̍tīḥ sūyava̱se ru̱śantī̍ḥ śu̱ddhā a̱paḥ su̍prapā̱ṇe piba̍ntīḥ
mā va̍ ste̱na ī̍śata̱ māghaśa̍ṃsa̱ḥ pari̍ vo ru̱drasya̍ he̱tirvṛ̍ṇaktu

278.2-2

pa̱du̱jñā stha ra̍ma̍taya̱ḥ saṃhi̍tā vi̱śvanā̍mnīḥ | upa̍ mā de̱vīrdevai̍re̱ta
i̱maṃ go̱ṣṭhami̱daṃ sado̍ ghṛ̱tenā̱smāntsama̍kṣata

278.2-3

ā susra̍saḥ susra̱so a̍sa̱ṃtībhyo̱ asa̍ṃtta̱rāḥ | sehora̍rasa̱ttarā̍ la̱vaṇā̱dvikle̍dīyasīḥ
yā graivyā̍ apa̱citotho̱ yā upa̍pa̱kṣyā̍'ḥ
vi̱jā̱mnni yā apa̍citaḥ sva̱yaṃsrasa̍ḥ

278.3-2

yaḥ kīka̍sāḥ pra̱śṛṇā̍ti ta̱līdya̱miva̱tiṣṭha̍ti
nirāsta̱ṃ sarva̍ṃ jāyā̱nya̱ṃ yaḥ kaśca̍ ka̱kudi̍ śri̱taḥ

278.4-2

pa̱kṣī jā̱yānya̍ḥ pata̱ti sa ā vi̍śati̱ pūru̍ṣam
tada̱kṣita̍sya bheṣa̱jamu̱bhayo̍ḥ su̱kṣata̍sya ca

278.5

vi̱dma vai te̍ jāyā̱nya̱ jāna̱ṃ yato̍ jāyā̱nya̱ jāya̍se
ka̱thaṃ ha̱ tatra̱ tvaṃ ha̍no̱ yasya̍ kṛ̱ṇmoṃ ha̱virgṛ̱he

278.6

dhṛ̱ṣatpi̍ba ka̱laśe̱ soma̍mindra vṛtra̱hā śūra̱ sama̍re vasū̱nām
mādhya̍ndine̱ sava̍na̱ ā vṛ̍ṣasva rayi̱ṣṭhāno̍ ra̱yima̱smāsu̍ dhehi

Linked texts (2)