Angirasi 279

Aṅgirasī 279

sāṃta̍panā i̱daṃ ha̱virmaru̍tasta̱jju̍juṣṭana | a̱smāko̍tī ri̍śādasaḥ

yo no̱ marto̍ maruto durhṛṇā̱yusti̱raścittāni̍ vasavo̱ jighā̍ṃsati
druha̱ḥ pāśā̱nprati̍ muñcatā̱ sa tapi̍ṣṭhena̱ tapa̍sā hantanā̱ tam

sa̱ṃva̱tsa̱rīṇā̍ ma̱ruta̍ḥ sva̱rkā u̍ru̱kṣa̍yā̱ḥ sarga̍ṇā̱ mānu̍ṣāsaḥ
te a̱smatpāśā̱npra mu̍ñca̱ntvena̍saḥ sāṃta̍panā matsa̱rā mā̍da̱yi̱ṣṇava̍ḥ

vi tai muñcāmi raśa̍nāṃ vi yoktraṃ vi ni̱yoja̍nam | i̱haiva tvamaja̍sra e̱dhyagne

a̱smai kṣa̱trāṇi̍ dhā̱raya̍ntamagne yu̱najmi̍ tvā̱ brahma̍ṇā̱ daivye̍na
dī̱di̱hya̍1smabhya̱ṃ dravi̍ṇeha bha̱draṃ prermaṃ vo̍co havi̱rdāṃ de̱vatā̍su

yattai̍ de̱vā akṛ̍ṇvanbhāga̱dheyama̍mā̍vāsye sa̱ṃvasa̍nto mahi̱tvā
tenā̍ no ya̱jñaṃ pi̍pṛhi viśvavāre ra̱yiṃ nau̍ dhehi subhage su̱vīra̍m

a̱hame̱vāsmya̍māvā̱syā̱3̱̍ māmo̱ va̍santi su̱kṛto mayīme
mayi̍ de̱vā u̱bhaye̍ sā̱dhyāścendra̍jyeṣṭhāḥ sama̍gacchanta̱ sarve̍

ā̱ga̱nnātrī̍ sa̱ṃgama̍nī vasū̍nā̱mūrja̱ṃ pu̱ṣṭaṃ vasvā̍ve̱śaya̍ntī
a̱mā̱vā̱syā̱3̱̍yai ha̱viṣā̍ vidhe̱morja̍ṃ duhā̍nā̱ paya̍sā na̱ āga̍n

amā̍vāsye̱ na tvade̱tānya̱nyo viśvā̍ rū̱pāṇi̱ pari̱bhūrba̍bhūva
yatkā̍māste juhu̱mastanno̍ astu va̱yaṃ syā̍ma̱ pata̍yo rayī̱ṇām

Linked texts (4)