Angirasi 310

Aṅgirasī 310

Language: Sanskrit

310.1

ṛṣiḥ- atharvāṅgirāḥ || devatā-savitā, jātavedāḥ
chandaḥ-1, 4 anuṣṭup; 2, 3 triṣṭup
pra pa̍tetaḥ pā̍pi la̱kṣmi̱ naśye̍ta̱ḥ prāmu̍ta̱ḥ pata̍
aya̱smaye̍nā̱ṅkena̍ dvi̱ṣate̍ tvā sa̍jāmasi

310.2

yā māṃ la̱kṣmīḥ pa̍tayā̱lūraju̍ṣṭā̱bhica̍skanda vanda̍neva vṛ̱kṣam
a̱nyatrā̱smatsa̍vitu̱stāmi̱to dhā̱ hira̍ṇyahasto̱ vasu̍ no̱ rarā̍ṇaḥ

310.3

eka̍śataṃ la̱kṣmyo3̱ martya̍sya sā̱kaṃ ta̱nvā̱3 janu̍ṣo'dhi jā̱tāḥ
tāsā̱ṃ pāpi̍ṣṭhā̱ nirṛ̍taḥ pra hi̍ṇmaḥ śi̱vā a̱smabhya̍ṃ jātavedo̱ ni ya̍ccha

310.4

e̱tā enā̱ vyāka̍raṃ khi̱le gā vi̍ṣṭhi̱tā i̍va
rama̍ntāṃ pu̱ṇyāṃ la̱kṣmīryāḥ pāpī̍stā anīnaśam

310.1-2

namo̍ rū̱rāya̍ cyava̍nāya noda̍nāya dhṛṣṇave̍ | nama̍ḥ śī̱tāya̍ pūrvakāmakṛ̱tvane̍

310.2-2

yo a̱nyedyu̍ru̱bhayadyu̍ra̱bhyetī̱maṃ ma̱ṇḍūka̍ma̱bhyetvindrata̍ḥ

310.1-3

ā ma̱ndrairi̍ndra̱ hari̍bhiryāhi ma̱yūra̍romabhiḥ
mā tvā̱ ke ci̱dvi ya̍ma̱nvi na pā̍śino'ti̱ dhanve̍va̱ tām̐ i̍hi

310.1-4

marmā̍ṇi te̱ varma̍ṇā chādayāmi̱ soma̍stvā̱ rājā̱mṛte̍nānu̍ vastām
u̱rorvarī̍yo̱ varu̍ṇaste kṛṇotu̱ jaya̍nta̱ṃ tvānu̍ de̱vā ma̍dantu

Linked texts (2)

Atharvaveda — Sanskrit
Śaunakasaṃhitā — Sanskrit