Pramāṇa · Search · About · API

Angirasi 313

Aṅgirasī 313

Language
Sanskrit

313.1

ra̱kṣo̱haṇa̍ṃ vā̱jina̱mā ji̍gharmi mi̱traṃ prathi̍ṣṭha̱mupa̍ṃ yāmi̱ śarma̍
śi̱śā̱no a̱gniḥ kratu̍bhi̱ḥ sami̍ddha̱ḥ sa no̱ divā̱ sa ri̱ṣaḥ pā̍tu̱ nakta̍m

313.2

ayo̍daṃṣṭro a̱rciṣā̍ yātu̱dhānā̱nupa̍ṃ spṛśa jātaveda̱ḥ sami̍ddhaḥ
ā ji̱hvayā̍ mūrade̱vānrabha̍sva kra̱vyādau̍ vṛ̱ktvāpi̍ dhatsvā̱san

313.3

u̱bhobha̍yāvinnupa̍ dhehi̱ daṃṣṭrau̍ hi̱ṃsraḥ śi̍śā̱novara̱ṃ para̍ṃ ca
u̱tāntari̍kṣe̱ pari̍ yāhya̱gne jambhai̱ḥ saṃ dhe̱hyabhi yā̍tu̱dhānā̍n

313.4

a̱gne tvaca̍ṃ yātu̱dhāna̍sya bhindhi hi̱ṃsrāśa̍ni̱rhara̍sā hantve̱nam
pra parvā̍ṇi jātavedaḥ śṛṇīhi kra̱vyātkra̱viṣṇurvi ci̍notve̱nam

313.5

yatredā̍nī̱ṃ paśya̍si jātaveda̱stiṣṭha̍nta̱magna̍ u̱ta vā̱ cara̍ntam
u̱tāntari̍kṣe̱ pata̍ntaṃ yātu̱dhāna̱ṃ tamastā̍ vidhya̱ śarvā̍ śiśā̱naḥ

313.6

u̱tairi̍ṣūḥ sa̱ṃnama̍māno agne vā̱cā śa̱lyām̐ a̱śani̍bhirdi̱hāna̍ḥ
tābhi̍rvidhya hṛda̍ye yātu̱dhānā̍npra̱tīco̍ bā̱hūnprati̍ bhaṅgdhyeṣām

313.7

u̱tāra̍bdhānspṛṇuhi jātaveda u̱tāre̍bhā̱ṇām̐ ṛ̱ṣṭibhi̍ryātu̱dhānā̍n
agne̍ pū̱rvo ni ja̍rhi̱ śośu̍cāna ā̱māda̍ḥ kṣviṅkāstamada̱ntvenī̍:

313.8

i̱ha pra brū̍hi yata̱maḥ so a̍gne yātu̱dhāno̱ ya i̱daṃ kṛ̱ṇoti̍
tamā ra̍bhasva sa̱midhā̍ yaviṣṭha nṛ̱cakṣa̍saścakṣuṣe randhayainam

313.9

tī̱kṣṇenā̍gne̱ cakṣu̍ṣā rakṣa ya̱jñaṃ prāñca̍ṃ vasu̍bhya̱ḥ pra ṇa̍ya pracetaḥ
hi̱ṃsraṃ rakṣā̍ṃsya̱bhi śośu̍cāna̱ṃ mā tvā̍ dabhanyātu̱dhānā̍ nṛcakṣaḥ

313.10

nṛ̱cakṣā̱ rakṣa̱ḥ pari̍ paśya vi̱kṣu tasya̍ trī̱ṇi prati̍ śṛṇī̱hyagrā̍
tasyā̍gne pṛ̱ṣṭīrhara̍sā śṛṇīhi tre̱dhā mūla̍ṃ yātu̱dhāna̍sya vṛśca

313.11

triryā̍tu̱dhāna̱ḥ prasi̍tiṃ ta etvṛ̱taṃ yo a̍gne̱ anṛ̍tena̱ hanti̍
tama̱rciṣā̍ sphūrja̱yañjā̍tavedaḥ sa̱makṣamaina̍ṃ gṛṇa̱te ni vṛ̍ṅgdhi

313.12

yada̍gne a̱dya mi̍thu̱nā śapā̍to̱ yadvāca̍stṛ̱ṣṭaṃ ja̱naya̍nta̱ rebhā̍ḥ
ma̱nyormana̍saḥ śa̱ravyā̍3̱ jāya̍te̱ yā tayā̍ vidhya hṛda̍ye yātu̱dhānā̍n

313.13

parā̍ śṛṇīhi tapa̍sā yātu̱dhānā̱nparā̍gne̱ rakṣo̱ hara̍sā śṛṇīhi
parā̱rciṣā̱ mūra̍devāñchṛṇīhi parā̍su̱tṛpa̍ḥ śośu̍cataḥ śṛṇīhi

313.14

parā̍dya de̱vā vṛ̍ji̱naṃ śṛ̍ṇantu pratyage̍naṃ śa̱pathā̍ yantu sṛ̱ṣṭāḥ
vā̱cāstena̱ṃ śara̍va ṛcchantu marma̱nviśva̍syaitu prasitiṃ yātu̱dhāna̍ḥ

313.15

yaḥ pauru̍ṣeyeṇa kra̱viṣā̍ sama̱ṅkte yo a̍śvye̍na pa̱śunā̍ yātu̱dhāna̍ḥ
yo a̱ghnyāyā̱ bhara̍ti kṣī̱rama̍gne̱ teṣā̍ṃ śī̱rṣāṇi̱ hara̍sāpi̍ vṛśca

313.16

viṣa̱ṃ gavā̍ṃ yātu̱dhānā̍ bharantā̱mā vṛ̍ścantā̱madi̍taye du̱revā̍ḥ
parai̍ṇānde̱vaḥ sa̍vi̱tā da̍dātu parā̍ bhā̱gamoṣa̍dhīnāṃ jayantām

313.17

saṃva̍tsa̱rīṇa̱ṃ paya̍ u̱sriyā̍yā̱stasya̍ māśīdyātu̱dhāno̍ nṛcakṣaḥ
pīyū̍ṣamagne yata̱masti̍tṛ̱psāttaṃ pratyañca̍ma̱rciṣā̍ vidhya marma̍ṇi

313.18

sanā̱dagne̍ mṛṇasi yātu̱dhānā̱nna tvā̱ rakṣā̍ṃsi pṛta̍nāsu jigyuḥ
saha̱mūrānanu̍ daha kra̱vyādo̱ mā te̍ he̱tyā mu̍kṣata̱ daivyā̍yāḥ

313.19

tvaṃ no̍ agne̱ adha̍rā̱duda̍ktastvaṃ pa̱ścādu̱ta ra̍kṣā pu̱rastā̍t
prati̍ te te̱ aja̍rāsastapi̍ṣṭhā a̱ghaśa̍ṃsaṃ śośu̍cato dahantu

313.20

pa̱ścātpura̱stādadha̍rādu̱daktaḥ ka̱viḥ kā̱vyena̱ pari̍ pāhi̱hyagne̍
sakhā̱ sakhā̍ya̱maja̍ro ja̱rimṇe 'gne̱ martā̍m̐ ama̱rtyastvaṃ na̍ḥ

313.21

tada̍gne̱ cakṣu̱ḥ prati̍ dhehi re̱bhe śa̱phāru̍jo̱ yena̱ paśya̍si yātu̱dhānā̍n
atha̍rva̱vajjyoti̍ṣā̱ daivye̍na sa̱tyaṃ dhūrva̍nta̱maci̍taṃ nyoṣa̍

313.22

pari̍ tvāgne̱ pura̍ṃ va̱yaṃ vipra̍ṃ sahasya dhīmahi
dhṛ̱ṣadva̍rṇaṃ di̱vedi̍ve ha̱ntāra̍ṃ bhaṅgu̱rāva̍taḥ

313.23

viṣe̍ṇa bhaṅgu̱rāva̍taḥ prati̍ sma̱ rakṣaso̍ jahi
agne̍ ti̱gmena̍ śo̱ciṣā̱ tapu̍ragrābhiṛ̱cibhi̍ḥ

313.24

vi jyoti̍ṣā bṛha̱tā bhā̱tya̱gnirā̱virviśvā̍ni kṛṇute mahi̱tvā
prādaivī̍rmā̱yāḥ saha̍te du̱revā̱ḥ śi̍śī̱te śṛṅge̱ rakṣo̍bhyo vi̱nikṣve̍

313.25

ye te̱ śṛṅge̍ ajare jātaveda̱stigmahe̍tī̱ brahma̍saṃśite
tābhyā̍ṃ du̱rhārdama̱bhidāsa̍ṃntaṃ kimī̱dina̍ṃ pratyañca̍ma̱rciṣā̍ jātavedo vini̍kṣva

313.26

a̱gnī rakṣā̍ṃsi sedhati śu̱kraśo̍ci̱ramartya̍ḥ | śuci̍ḥ pāvaka īḍya̍ḥ

Linked texts (4)