Pramāṇa · Search · About · API

Angirasi 314

Aṅgirasī 314

Language
Sanskrit

314.1

indrā̍somā̱ tarpa̍ta̱ṃ rakṣa̍ u̱bjata̱ṃ nya̍rpayataṃ vṛṣaṇā tamo̱vṛdha̍ḥ
parā̍ śṛṇītama̱cito̍ nyoṣa̍taṃ ha̱taṃ nu̱dethā̱ṃ ni śi̍śītamatriṇa̍ḥ

314.2

indrā̍somā̱ sama̱ghaśa̍ṃsama̱bhya1̱̍ghaṃ ta̱purya̍yastu ca̱rura̍gni̱mām̐ i̍va
bra̱hma̱dviṣe̍ kravyāde̍ gho̱raca̍kṣase̱ dveṣo̍ dhattama̱navā̍yaṃ kimī̱dine̍

314.3

indrā̍somā duṣkṛ̱to̍ va̱vre a̱ntara̍nāra̱mbha̱ṇe tama̍si̱ pra vi̍dhyatam
yatho̱ naiṣā̱ṃ puna̱reka̍śca̱nodyattadvā̍mastu̱ saha̍se ma̱nyuma̱cchava̍ḥ

314.4

indrā̍somā vartaya̍taṃ di̱vo va̱dhaṃ saṃ pṛ̍thi̱vyā a̱ghaśa̍ṃsāya ta̱rhaṇa̍m
utkṣa̍ṇataṃ sva̱ryaṃ1̱̍ parva̍tebhyo̱ yena̱ rakṣo̍ vāvṛdhā̱naṃ ni̱jūrva̍thaḥ

314.5

indrā̍somā vartaya̍taṃ diva̱sparya̍gnita̱ptebhi̍ryu̱vamaśmā̍hanmabhiḥ
tapu̍rvadhebhi̱raja̍rebhi̱ratriṇo̱ ni pa̱rśāne̍ vidhyataṃ yantu ni̱svara̍m

314.6

indrā̍somā̱ pari̍ vāṃ bhūta̱ viśvata̍ i̱yaṃ ma̱tiḥ ka̱kṣyāśve̍va vā̱jinā̍
yāṃ vā̱ṃ hotrā̍ṃ parihi̱nomi̍ me̱dhaye̱mā brahmā̍ṇi nṛpatī iva jinvatam

314.7

prati̍ smarethāṃ tu̱jaya̍dbhi̱revai̍rha̱taṃ druho̱ rakṣaso̍ bhaṅgurā̱vata̍ḥ
indrā̍somā duṣkṛ̱te mā su̱gaṃ bhū̍dyo mā̍ ka̱dā ci̍da̱bhidāsā̍ti dru̱huḥ

314.8

yo mā̱ pāke̍na̱ mana̍sā̱ cara̍nta̱mabhi̱caṣṭe̱ anṛ̍tebhi̱rvaco̍bhiḥ
āpa̍ iva kā̱śinā̱ saṃgṛ̍bhītā̱ asa̍nna̱stvāsta̍ indra va̱ktā

314.9

ye pāka̱śaṃsa̍ṃ vi̱hara̍nta e̱vairye vā̍ bha̱draṃ dū̱ṣaya̍nti sva̱dhābhi̍ḥ
aha̍ye vā̱ tānprada̍dātu̱ soma̱ ā vā̍ dadhātu̱ nirṛ̍teru̱pasthe̍

314.10

yo no̱ rasa̱ṃ dipsa̍ti pi̱tvo agne̱ aśvā̍nā̱ṃ gavā̱ṃ yasta̱nūnā̍m
ri̱pu ste̱na ste̱yakṛ̍ddabhrame̍tu̱ ni ṣa hī̍yatāṃ ta̱nvā3̱̍ tanā̍ ca

314.11

pa̱raḥ so a̍stu ta̱nvā3̱̍ tanā̍ ca ti̱sraḥ pṛ̍thi̱vīradho a̍stu̱ viśvā̍ḥ
prati̍ śuṣyatu ya̱śo̍ asya devā̱ yo mā̱ divā̱ dipsa̍ti̱ yaśca̱ nakta̍m

314.12

su̱vi̱jñāna̍ṃ ci̍ki̱tuṣe̱ janā̍ya̱ saccā̍sa̱cca vaca̍sī paspṛdhāte
tayo̱ryatsa̱tyaṃ ya̍ta̱radṛjī̍ya̱staditsomo̍'vati̱ hantyāsa̍t

314.13

na vā u̱ somo̍ vṛji̱naṃ hi̍noti̱ na kṣa̱triya̍ṃ mithu̱yā dhā̱raya̍ntam
ha̱nti̱ rakṣo̱ hantyāsa̍dvada̍ntamu̱bhāvu̍vindra̍sya̱ prasi̍tau śayāte

314.14

yadi̍ vā̱hamanṛ̍tadevo̱ asmi̱ mogha̍ṃ vā de̱vām̐ a̍pyū̱he a̍gne
kima̱smabhya̍ṃ jātavedo hṛṇīṣe drogha̱vāca̍ste̱ nirṛ̍thaṃ sacantām

314.15

a̱dyā mu̍rīya̱ yadi̍ yātu̱dhāno̱ asmi̱ yadi̱ vāyu̍sta̱tapa̱ pūru̍ṣasya
adhā̱ sa vī̱rairdaśa̍bhirvi yūyā̱ yo mā̱ mogha̍ṃ yātu̱dhānetyāha̍

314.16

yo mā̍yā̱tuṃ yātu̍dhāne̱tyāha̱ yo vā̍ ra̱kṣāḥ śuci̍ra̱smītyāha̍
indra̱staṃ ha̍ntu maha̱tā va̱dhena̱ viśva̍sya ja̱ntora̍dha̱maspa̍dīṣṭa

314.17

pra yā jigā̍ti kharga̱leva̱ nakta̱mapa̍ druhu̱stanva̍ṃ1̱ gūha̍mānā
va̱vrama̍na̱ntamava̍ sā pa̍dīṣṭa̱ grāvā̍ṇo ghnantu ra̱kṣasa̍ upa̱bdaiḥ

314.18

vi ti̍ṣṭhadhvaṃ maruto vi̱kṣvi1̱cchata̍ṃ gṛbhā̱yata̍ rakṣa̱saḥ saṃ pi̍naṣṭana
vayo̱ ye bhū̱tvā pa̱taya̍nti na̱ktabhi̱rye vā̍ ri̱po da̍dhi̱re de̱ve a̍dhva̱re

314.19

pra va̍rtaya di̱vo aśmā̍namindra̱ soma̍śitaṃ maghavantsa̱śiśā̍dhi
prākto̱ apā̍kto adha̱rāduda̍kto̱1̱'bhi ja̍hi ra̱kṣasa̱ḥ parva̍tena

314.20

e̱ta u̱ tye pa̍tayanti śvayā̍tava̱ indra̍ṃ dipsanti di̱psavodā̍bhyam
śi̱śī̱te śa̱kraḥ pi̍śu̱nebhyo̍ va̱dhaṃ nūnaṃ sṛ̍jadaśa̱niṃ yā̍tu̱madbhya̍ḥ

314.21

indro̍ yā̱tūnāma̍bhavatparāśa̱ro ha̱virma̍thīnā̍ma̱bhyā1̱vivā̍satām
a̱bhīdu̍ śa̱kraḥ pa̍ra̱śuryathā̱ vana̱ṃ pātre̍va bhi̱ndantsa̱ta e̍tu ra̱kṣasa̍ḥ

314.22

ulū̍kayātuṃ śuśulū̍kayātuṃ ja̱hi śvayā̍tuma̱ta koka̍yātum
su̱pa̱rṇayā̍tuma̱ta gṛdhra̍yātuṃ dṛ̱ṣadai̍va̱ pra mṛ̍ṇa ra̱kṣa i̍ndra

314.23

mā no̱ rakṣo̍ a̱bhi na̍ḍyātu̱māva̱dapo̍cchantu mithu̱nā ye ki̍mī̱dina̍ḥ
pṛ̱thi̱vī na̱ḥ pārthi̍vātpā̱tvaṃha̍so̱ntari̍kṣaṃ di̱vyātpā̍tva̱smān

314.24

indra̍ ja̱hi pumā̍ṃsaṃ yātu̱dhāna̍mu̱ta striya̍ṃ mā̱yayā̍ śāśadā̍nām
vigrī̍vāso̱ mūra̍devā ṛdantu̱ mā te̍ dṛśantsūrya̍mu̱ccara̍ntam

314.25

prati̍ cakṣva̱ vi ca̍kṣvendra̍śca soma jā̱gṛta̍m
rakṣo̱bhyo va̱dhama̍syatamaśa̱niṃ yā̍tu̱madbhya̍ḥ

314.1-2

a̱yaṃ prati̍saro ma̱ṇirvī̱ro vī̱rāya̍ badhyate
vī̱ryyā̍vāntsapatna̱hā śūra̍vīraḥ pari̱pāṇa̍ḥ suma̱ṅgala̍ḥ

314.2-2

a̱yaṃ ma̱ṇiḥ sa̍patna̱hā su̱vīra̍ḥ saha̍svānvā̱jī saha̍māna u̱graḥ
pratya̱kṛtyā̍ dū̱ṣaya̍ṃnneti vī̱raḥ

314.3-2

a̱nenendro̍ ma̱ṇinā̍ vṛ̱tramaha̍nna̱nenāsu̍rānparā̍bhāvayanmanī̱ṣī
a̱nenā̍jaya̱dyāvā̍pṛthi̱vī u̱bhe i̱me a̱nenā̍jayatpra̱diśa̍śca̱tasra̍ḥ

314.4-2

a̱yaṃ srāktyo ma̱ṇiḥ pra̍tīva̱rtaḥ pra̍tisa̱raḥ
oja̍svānvimṛ̱dho va̱śī so a̱smānpā̍tu sa̱rvata̍ḥ

314.5-2

tada̱gnirā̍ha̱ tadu̱ sorma āhu̱ bṛha̱spati̍ḥ savi̱tā tadindra̍ḥ
te me̍ de̱vāḥ pu̱rohi̍tāḥ pra̱tīcī̍ḥ kṛtyāḥ prati̍sarairejayantu

314.6-2

a̱ntarda̍dhe̱ dyāvā̍pṛthi̱vī u̱tāha̍ruta̱ sūrya̍m
te me̍ de̱vāḥ pu̱rohi̍tāḥ pra̱tīcī̍ḥ kṛtyāḥ prati̍sarairejayantu

314.7-2

ye srā̱ktyaṃ ma̱ṇiṃ janā̱ varmī̍ṇi kṛṇva̱te
sūrya̍ iva̱ diva̍māru̱hya vi kṛtyā bā̍dhate va̱śī

314.8-2

srā̱ktyene̍ ma̱ṇinā̱ ṛṣi̍ṇeva manī̱ṣiṇā̍
ajai̍ṣa̱ṃ sarvā̍ḥ pṛrta̍nā̱ vi mṛdhau̍ hanmi̱ rakṣa̍saḥ

314.9-2

yāḥ kṛtyā ā̍ṅgira̱sīryāḥ kṛtyā āsu̍rīryāḥ kṛtyāḥ sva̱yaṃkṛ̍tā yā u̍ cā̱nyebhi̱rābhṛ̍tāḥ
u̱bhayī̍stāḥ parā̍ yantu parā̱vato̱ nava̍tiṃ nā̱vyā3̱ ati̍

314.10-2

a̱smai ma̱ṇiṃ varma̍ badhnantu de̱vā indro̱ viṣṇu̍ḥ savi̱tā ru̱dro a̱gniḥ
pra̱jāpa̍tiḥ parame̱ṣṭhī vi̱rāḍvai̍śvāna̱ra ṛṣa̍yaśca̱ sarve̍

314.11-2

u̱tta̱mo a̱syoṣa̍dhīnāma̱nudvā̱ṅgatā̍miva vyā̱ghraḥ śvapa̍dāmiva
yamaicchā̱māvi̍dāma̱ taṃ prati̍sparśānamantitam

314.12-2

sa i̱dyā̱ghro bha̍vatyatho̱ siṃho atho̱ vṛṣā̍
atho̍ sapatna̱karno̱ yo bibha̍rtī̱maṃ ma̱ṇim

314.13-2

naina̍ṃ ghnantyapsa̱raso̱ na ga̍ndha̱rvā na martyā̍:
sarvā̱ diśo̱ vi rā̍jati̱ yo bibha̍rtī̱maṃ ma̱ṇim

314.14-2

ka̱śyapa̱stvāmasṛjata ka̱śyapa̍stvā̱ samai̍rayat
abi̍bha̱stvendro̱ mānu̍ṣe bibhra̱tsam̐śreṣi̱ṇe'ja̍yat
ma̱ṇiṃ sa̱hasra̍vīrya̱ṃ varma̍ de̱vā a̍kṛṇvata

314.15-2

yastvā̍ kṛ̱tyābhi̍rya̱stvā dī̱kṣābhi̍rya̱jñairyastvā̱ jighām̐sati
pratyaktami̍ndra̱ taṃ ja̍hi vajre̍ṇa śatapa̍rvaṇā

314.16-2

a̱yama̱hrai pra̍tī̱varta̍ oja̍svā̱nsaṃja̱yo ma̱ṇiḥ
pra̱jāṃ dhana̍ṃ ca rakṣatu pari̱pāṇa̍: suma̱ṅgala̍:

314.17-2

asa̍patnaṃ nò adha̱rāda̍sapa̱tnaṃ na̍ uttarā̱t
indrā̍sapa̱tnaṃ na̍: pa̱ścāñjyoti̍: śūra pu̱raskṛ̍dhi

314.18-2

varma̍ me̱ dyāvā̍pṛthi̱vī varmāha̱rvarma̍ sūrya̍:
varma̍ ma̱ indra̍ścā̱gniśca̱ varma̍ dhā̱tā da̍dhātu me

314.19-2

aindrā̱gnaṃ varma̍ bahu̱laṃ yadu̱graṃ viśve̍ de̱vā nāti̍ vidhya̍nti̱ sarve̍
tanmai̍ ta̱nva̍ trā̱yatā̱ṃ sarva̍to bṛha̱dāyu̍ṣmāñ jarada̍ṣṭi̱ryathāsā̍ni

314.20-2

ā mā̍ru̱kṣaddeva̱maṇi̱rmahyā ari̍ṣṭatātaye
i̱maṃ me̱thima̱bhisaṃvi̍śadhvaṃ tanu̱pāna̍ṃ tri̱varū̍tha̱moja̍se

314.21-2

a̱sminnindro̱ ni da̍dhātu nṛ̱mṇami̱maṃ dai̍vāso a̱bhisaṃvi̍śadhvam
dī̱rghā̱yu̱tvāya̍ śa̱taśā̍radā̱yāyu̍ṣmāñjarada̍ṣṭi̱ryathāsa̍t

314.22-2

sva̱sti̱dā vi̱śāṃ pati̍rvṛtra̱hā vimṛ̍dho va̱śī
indro̍ badhnātu te ma̱ṇiṃ ji̍gī̱vām̐ apa̍rājitaḥ so̱ma̱pā a̍bhaya̱ṃkaro vṛṣā̍
sa tvā̍ rakṣatu sarva̱to divā̱ nakta̍ṃ ca vi̱śvata̍:

Linked texts (6)