Pramāṇa · Search · About · API

Angirasi 315

Aṅgirasī 315

Language
Sanskrit

315.1

yau te̍ mā̱tonma̱mārja̍ jā̱tāyā̍ḥ pati̱veda̍nau
durṇāmā̍ tatra̱ mā gṛ̍dhadu̱rliśa̍ u̱ta va̱tsapa̍ḥ

315.2

pa̱lā̱lā̱nu̱pa̱lā̱lau śarku̍ṃ ko̱kaṃ ma̍limlu̱caṃ pa̍lī̱jaka̍m
ā̱śreṣa̍ṃ vṛ̱trivā̍sasa̱mṛkṣa̍grīvaṃ pramī̱lina̍m

315.3

mā saṃ vṛ̍to̱ mopa̍ sṛpa ū̱rū māva̍ sṛpo̱ntarā̍
kṛ̱ṇo̱mya̍syai bheṣa̱jaṃ bra̱jaṃ du̍rṇā̱macā̍tanam

315.4

durṇāmā̍ ca sunāmā̍ co̱bhā saṃvṛ̍tamicchataḥ
a̱rā̱yānapa̍ hanmaḥ sunāmā̱ straiṇa̍micchatām

315.5

yaḥ kṛ̱ṣṇaḥ ke̱śya̍su̱ra stamba̍ja u̱ta tu̍ṇḍi̱kaḥ
a̱rā̱yāṃstasyā̍ mu̱ṣkābhyā̱ṃ bhaṃsa̍sopa̍ hanmasi

315.6

anu̍jighraṃ pra̍mṛ̱śanta̍ṃ kra̱vyāda̍muta re̱riha̍m
a̱rā̱yām̐cchvaki̱ṣkiṇo̍ bra̱jaḥ pi̱ṅgo a̍nīnaśat

315.7

yastvau svapne̍ nipa̱dyate̱ bhrātā̍ bhū̱tvā pi̱teva̍ ca
bra̱jastānsa̍hatāmi̱taḥ klī̱barū̍pāṃstirī̱ṭina̍ḥ

315.8

yastvau svapa̍ntī̱ṃ tsara̍ti̱ yastvau dipsa̍ti̱ jāgra̍tīm
chā̱yāmi̍va pra tānsūrya̍ḥ pa̱rikrārmannanīnaśat

315.9

yaḥ kṛ̱ṇoti̍ mṛ̱tava̍tsā̱mava̍tokāmi̱māṃ striya̍m
tamo̍ṣadhe̱ tvaṃ nā̍śayā̱syāḥ ka̱mala̍mañji̱vam

315.10

ye śālā̍ḥ pari̱nṛtya̍nti sā̱yaṃ garda̍bhanā̱dina̍ḥ
ku̱sūlā̱ ye ca̍ kukṣi̱lāḥ ka̍ku̱bhāḥ ka̱rumā̍ḥ khi̱māḥ
tānoṣa̍dhe̱ tvaṃ ga̱ndhena̍ viṣū̱cīnā̱nvi nā̍śaya

315.11

ye ku̍ku̱ndhāḥ ku̱kūra̍bhāḥ kṛ̱ttīrdūrśā̍ni̱ bibhra̍ti
klī̱bā i̍va̱ pranṛtya̍nto̱ vane̱ ye ku̱rvate̱ ghoṣa̱ṃ tāni̱to nā̍śayāmasi

315.12

ye sūrya̍ṃ na titikṣa̍nta ātapa̍ntamu̱muṃ diva̍ḥ
a̱rāyā̍nvastavā̱sino̍ durgandhīm̐llohi̱tāsyā̍nmarkakā̱nnāśa̍yāmasi

315.13

ya ā̱tmāna̍matimā̱tramaṃse̍ ā̱dhāya̱ bibhra̍ti
strīṇā̱ṃ śroṇi̍prato̱dina̱ indra̱ rakṣā̍m̐si nāśa̍ya

315.14

ye pūrvai̍ va̱dhvo3̱ yanti̱ haste̍ śṛṅgā̍ṇi̱ bibhra̍taḥ
ā̱pā̱ke̱sthāḥ pra̍hā̱sina̍ṃ sta̱mbhe ye ku̱rvate̱ jyoti̱stāni̱to nā̍śayāmasi

315.15

yeṣā̍ṃ pa̱ścātprapa̍dāni pu̱raḥ pārṣṇī̍ḥ pu̱ro mukhā̍
khalu̱jāḥ śa̍rka̱dhūma̍jā uru̱ṇḍā ye ca̍ maṭmaṭāḥ kumbhamuṣkā ayāśavaḥ
tāntsyā brahma̍ṇaspate pratī̱bodhe̍na nāśaya

315.16

parya̍stākṣā apra̍caṅka̱śā astrai̍ṇāḥ sa̍ntu ṣaṇḍa̍gāḥ
ava̍ bheṣaja pādaya̱ ya i̱māṃ sa̍ṃvivṛ̱tsatyapa̍tiḥ svapa̍ti̱ṃ striya̍m

315.17

u̱ddharṣi̍ṇaṃ munike̱śaṃ jṛ̱mbhaya̍ntaṃ marīmṛ̱śam
u̱pepa̍ntamudumba̱laṃ tu̱ṇḍeda̍ṃmuta śā̱luḍa̍m
pa̱dā pra vi̍dhya pā̱rṣṇyā̍ sthā̱līṃ gaurī̍va spanda̱nā

315.18

yaste̱ garbha̍ṃ pratimṛ̱śājjā̱taṃ vā̍ mā̱ryā̍ti te
pi̱ṅgastamu̱gradha̍nvā kṛṇotu hṛda̱yāvi̍dham

315.19

ye a̱gno jā̱tānmāraya̍nti sūti̍kā anu̱śera̍te
strībhā̍gā̱npiṅgo̍ ga̍ndha̱rvāñvātau̍ abhrami̍vājatu

315.20

pari̍sṛta̱ṃ dhāra̍yatu̱ yaddhi̱taṃ māva̍ pādi̱ tat
garbha̍ṃ ta u̱grau ra̍kṣatāṃ bhe̱ṣa̱jau nī̍vibhā̱ryau̍

315.21

pra̱vīna̱sārtta̍ṅgalyau3̱cchāyā̍rkāduta narta̍kāt
pra̱jāyai̱ patye̍ tvā pi̱ṅgaḥ pari̍ pātu kimī̱dina̍ḥ

315.22

vyā̱syāccatura̍kṣātpañca̍pādānnaḍu̱reḥ
vṛntā̍da̱bhi pra̱sarpa̍ta̱ḥ pari̍ pāhi varīvṛ̱tāt

315.23

ya ā̱maṃ māṃsa̍ma̱danti̱ pauru̍ṣeyaṃ ca̱ ye kra̱viḥ
garbhā̍nkhāda̍nti ke̱śavā̱stāni̱to nā̍śayāmasi

315.24

ye sūtī̍ra̱parisa̍rpanti snuṣe̱va śvaśu̍rā̱dadhi̍
ba̱jaśca̱ teṣā̍ṃ pi̱ṅgaśca̱ hṛda̍ye̱dhi ni vi̍dhyatām

315.25

piṅga̱ rakṣa̍ jā̱yamā̍na̱ṃ mā pumā̍ṃsaṃ striya̍ṃ kṝn
ā̱ṇḍādo̱ garbhā̍nmā da̍bha̱nmārdhva̱sveta̍ḥ kimī̱dina̍ḥ

315.26

a̱pra̱jā̱stvaṃ mārta̍va̱tsamā̱droḍhu̍ma̱ghamā̱vaya̍m
vṛ̱kṣādi̍va̱ sraja̍ṃ kṛ̱tvāpri̍ye̱ prati̍ muñca̱ tat

315.1-2

yā ba̱bhravo̱ yāśca̍ śu̱krā rohi̍ṇīru̱ta pṛśna̍yaḥ
asi̍knīḥ kṛ̱ṣṇā oṣa̍dhīḥ sarvā̍ acchāvadāmasi

315.2-2

trāya̍ntāmi̱maṃ puru̍ṣa̱ṃ yakṣmā̍dde̱veṣi̍tā̱dadhi̍
yāsā̱ṃ dyauṣpi̱tā pṛ̍thi̱vī mā̱tā sa̍mu̱dro mūla̍ṃ vī̱rudhā̍ṃ ba̱bhūva̍

315.3-2

āpo̱ agre̍ di̱vyā oṣa̍dhayaḥ | tāste̱ yakṣma̍ma̱nasya̍1maṅgā̍daṅgādanīnaśan

315.4-2

pra̱stṛṇa̱tī sta̱mbinī̍rekaśuṅgāḥ pra̱tanva̍tī̱roṣa̍dhīrā vadāmi
a̱ṃśu̱matī̍ḥ kā̱ṇḍinī̱ryā viśā̍khā hvayā̍mi te vī̱rudho̍ vaiśvade̱vīru̱grāḥ puru̍ṣajīvanīḥ

315.5-2

yahva̱ḥ saha̍ḥ sahamānā vī̱rya̍ṃ1 yacca̍ vo̱ bala̍m
tene̱mama̱smādyakṣmā̍tpu̱ruṣa̍ṃ muñca̱tauṣa̍dhī̱ratho̍ kṛṇomi bheṣa̱jam

315.6-2

jī̱valā̍ṃ na̍ghāri̱ṣāṃ jī̱vantī̱moṣa̍dhīma̱ham
a̱ru̱ndha̱tīmunnaya̍ntīṃ pu̱ṣpāṃ ma̍dhumatīmi̱ha hu̍ve̱smā ari̍ṣṭātā̱taye̍

315.7-2

i̱hā ya̍ntu prace̍taso me̱dinī̱rvaca̍so̱ mama̍ | yathe̱maṃ pārayā̍masi̱ puru̍ṣaṃ duri̱tādadhi̍

315.8-2

a̱gnerghāmo̍ a̱pāṃ garbho̱ yā roha̍nti̱ puna̍rṇavāḥ
dhru̱vāḥ sa̱hasra̍nāmnīrbhaiṣa̱jīḥ santvābhṛ̍tāḥ

315.9-2

ava̍kolvā udakā̍tmā̱n oṣa̍dhayaḥ | vyu̍ṣantu duri̱taṃ tī̍kṣṇaśṛ̱ṅgya̍ḥ

315.10-2

u̱nmu̱ñcantī̱rvirva̍ruṇā u̱grā yā vi̍ṣadū̱ṣaṇī̍ḥ
atho̍ balāsa̱nāśa̍nīḥ kṛtyādū̱ṣaṇī̍śca̱ yāstā i̱hā ya̍ntvoṣa̍dhīḥ

315.11-2

apa̍krītāḥ sahīyasī̱rvīrudho̱ yā a̍bhi̱ṣṭutā̍ḥ | trāya̍ntāma̱smingrāme̱ gāmaśva̱ṃ puru̍ṣaṃ pa̱śum

315.12-2

madhumanmūla̱ṃ madhu̍madagra̍māsā̱ṃ madhu̍manmadhya̍ṃ vī̱rudhā̍ṃ babhūva
madhu̍matpa̱rṇaṃ madhu̍matpu̱ṣpa̍māsā̱ṃ madho̍ḥ saṃbha̱ktā a̱mṛta̍sya bha̱kṣo ghṛ̱tamanna̍ṃ duhatāṃ gopu̍rogavam

315.13-2

yāva̍tīḥ kiya̍tīśce̱māḥ pṛ̍thi̱vyāma̱dhyoṣa̍dhīḥ | tā mā̍ sa̱hasra̍pa̱rṇyo'mṛ̱tyormu̍ñca̱ntvaṃha̍saḥ

315.14-2

vai̱yā̱ghro ma̱ṇirvī̱rudhā̍ṃ trāya̍māṇobhiśa̱stipāḥ
amī̍vāḥ sarvā̱ rakṣā̍ṃsyapa̍ ha̱ntvadhi̍ dū̱ra̱ma̱sat

315.15-2

siṃha̱syeva̍ stana̱thoḥ saṃ vi̍jante̱gneriva̍ vija̱nta ā̱bhṛtā̍bhyaḥ
gavā̱ṃ yakṣma̱ḥ puru̍ṣāṇāṃ vī̱rudbhi̍ra̱ti̍nutto nā̱vyā̱'etu̱ srotyā̍ḥ

315.16-2

mumucā̱nā oṣa̍dhayo̱gnervai̍śvāna̱rādadhi̍
bhūmi̍ṃ saṃta̱nvatī̱rī̍ta yāsā̱ṃ rājā̱ vana̱spati̍ḥ

315.17-2

yā roha̍ntyāṅgira̱sīḥ parva̍teṣu sa̱meṣu̍ ca
tā na̱ḥ paya̍svatīḥ śi̱vā oṣa̍dhīḥ santu̱ śaṃ hṛ̱de

315.18-2

yāścā̱haṃ veda̍ vī̱rudho̱ yāśca̱ paśyā̍mi̱ cakṣu̍ṣā
ajñā̍tā jānīmaśca̱ yā yāsu̍ vi̱dma ca̱ saṃbhṛ̍tam

315.19-2

sarvā̍ḥ sama̱grā oṣa̍dhī̱rvordha̍ntu̱ varca̍so̱ mama̍
yathe̱maṃ pā̱rayā̍masi̱ puru̍ṣaṃ duri̱tādadhi̍

315.20-2

a̱śva̱ttho da̱rbho vī̱rudhā̱ṃ somo̱ rājā̱mṛta̍ṃ ha̱viḥ
vrī̱hiryava̍śca bheṣa̱jau di̱vaspu̱trāvama̍rtyau

315.21-2

ujji̍hīdhve stanaya̍tyabhi̱kranda̍tyoṣadhīḥ | ya̱dā va̍ḥ pṛśnimātaraḥ pa̱rjanyo̱ reta̱sārvā̍ta

315.22-2

tasyā̱mṛta̍sye̱maṃ bala̱ṃ puru̍ṣaṃ pāyayāmasi | atho̍ kṛṇomi bheṣa̱jaṃ yathāsa̍cchrata̱hā̍yanaḥ

315.23-2

va̱rā̱ho veda̍ vī̱rudha̍ṃ naku̱lo veda̍ bheṣa̱jīm
sarpā ga̍ndha̱rvā yā vi̱dustā a̱smā ava̍se huve

315.24-2

yāḥ su̍pa̱rṇā ā̍ṅgira̱sīrdi̱vyā yā ra̱ghaṭo̍ vi̱duḥ
vayā̍ṃsi ha̱ṃsā yā vi̱durdyāśca̱ sarve̍ pa̱triṇa̍ḥ
mṛ̱gā yā vi̱duroṣa̍dhī̱stā a̱smā ava̍se huve

315.25-2

yāva̍tīnā̱moṣa̍dhīnā̱ṃ gāva̱ḥ prā̱śnantya̱ghnyā yāva̍tīnāmajā̱vaya̍ḥ
tāva̍tīstu̱bhyamoṣa̍dhī̱ḥ śarma̍ yacchantvābhṛ̍tāḥ

315.26-2

yāva̍tīṣu manu̱ṣyā̍'bhiṣa̱jaṃ bhi̱ṣajo̍ vi̱duḥ | tāvatī̍rviśva̱bhaiṣa̍jīrā bha̍rāmi tvāma̱bhi

315.27

pu̱ṣpava̍tīḥ pra̱sūma̍tīḥ pha̱linī̍rapha̱lā u̱ta | saṃmāta̍ra iva duhāma̱smā a̍ri̱ṣṭatā̍taye

315.28

uttvā̍hā̱rṣaṃ pañca̍śalā̱datho̱ daśa̍śalādu̱ta
atho̍ ya̱masya̱ paḍbī̍śā̱dviśva̍smāddevakilbi̱ṣāt

Linked texts (5)