Pramāṇa · Search · About · API

Angirasi 316

Aṅgirasī 316

Language
Sanskrit

316.1

indro̍ manthatu manthi̱tā śa̱kraḥ śū̍raḥ puraṃdaraḥ
yathā̍ ha̱nāma̱ senā̍ma̱mitrā̍ṇāṃ sa̱hasraśa̍ḥ

316.2

pū̱tira̱ṅgurapā̍dhmā̱nī pū̱tiṃ senā̍ṃ kṛṇotva̱mūm
dhū̱mama̱gniṃ parā̍dṛśyā̱mitrā̍ hṛ̱tsvā da̍dhatāṃ bha̱yam

316.3

a̱mūna̍śvattha̱ niḥ śṛ̍ṇīhi khā̱dāmūṃtkha̍dirā̱jira̍m
tā̱ja̱dbhaṅga̍ iva bhajyantāṃ ha̱ntvainā̱nvadha̍ko va̱dhaiḥ

316.4

pa̱ru̱ṣā̱namūnpa̍ruṣā̱haḥ kṛ̍ṇotu ha̱ntvainā̱nvadha̍ko va̱dhaiḥ
kṣi̱praṃ śara̍ i̍va bhajyantāṃ bṛ̱hajjā̱lena̱ saṃdi̍tāḥ

316.5

a̱ntari̍kṣaṃ jāla̍māsījjā̱ladu̍ṇḍā di̱śo ma̱hīḥ
tenā̍bhi̱dhāya̱ dasyū̍nāṃ śa̱kraḥ senā̍mapā̍vapan

316.6

bṛha̱ddhi jāla̍ṃ bṛ̱hataḥ śa̱krasya̍ vā̱jinī̍vataḥ
tena̱ śatrū̍na̱bhi sarvā̱nyu̍bja̱ yathā̱ na mucyā̍tai kata̱maśca̱naiṣā̍m

316.7

bṛha̱tte jāla̍ṃ bṛhata̱ indra̍ śūra sa̱hasrārghasya śa̱tavī̍ryasya
tena̍ śa̱taṃ sa̱hasra̍ma̱yuta̱ṃ nyarbu̍daṃ ja̱ghāna̍ śa̱kro dasyū̍nāmabhi̱dhāya̱ sena̍yā

316.8

a̱yaṃ lo̱ko jāla̍māsīccha̱krasya̍ ma̱hato ma̱hān
tenā̱hami̍ndra̱jāle̍nāmūṃstama̍sā̱bhi da̍dhāmi̱ sarvā̍n

316.9

sedi̍ru̱grā vyṛ̍ddhirā̱rttiśvānapavācanā
śrama̍sta̱ndrīśca̱ moha̍śca̱ taira̱mūna̱bhi da̍dhāmi̱ sarvā̍n

316.10

mṛ̱tyave̱mūnra ya̍cchāmi mṛ̱tyupāśaira̱mī si̱tāḥ
mṛ̱tyorye a̍gha̱lā dū̱tāstebhya̍ enā̱nprati̍ nayāmi ba̱ddhvā

316.11

naya̍ntvamūmanmṛtya̱dūtā̍ yama̍dūtā̱ apo̍mbhata
para̍ḥsaha̱srā ha̍nyantāṃ tṛṇeḍhainānma̱rtya̍ bhavasya̍

316.12

sā̱dhyā ekaiṃ jāladaṇḍamudyatya̍ ya̱ntvoja̍sā
ru̱drā eka̱ṃ vasava̍ ekamādi̱tyaireka̱ udya̍taḥ

316.13

viśve̍ de̱vā upa̍ri̱ṣṭādu̱bjantau̍ ya̱ntvoja̍sā
madhyai̍na̱ ghnantau̍ yantu̱ senā̱maṅgira̍so ma̱hīm

316.14

vana̱spatī̍nvānaspa̱tyānoṣa̍dhīru̱ta vī̱rudha̍ḥ
dvipāccatu̍ṣpādi̱ṣṇāsi̍ yathā senā̍ma̱mūṃ hana̍n

316.15

ga̱ndha̱rvāpsa̱rasa̍ḥ sa̱rpānde̱vānpu̍ṇyaja̱nānpi̱tṝn
dṛ̱ṣṭānadṛ̍ṣṭāṃnniṣṇāmi̍ yathā senā̍ma̱mūṃ hana̍n

316.16

i̱ma u̱ttā mṛ̱tyupā̍śā̱ yānākram‍ya̱ na mu̱cyase̍
a̱muṣyā̍ hantu senā̍yā i̱daṃ kūṭa̍ṃ sahasra̱śaḥ

316.17

gha̱rmaḥ sa̱middho̍ a̱gninā̱yaṃ horma̍ḥ sahasra̱haḥ
bhava̍śca pṛśni̍bāhuśca śa̱rva senā̍ma̱mūṃ ha̍tam

316.18

mṛ̱tyorāṣa̍mā pa̍dyantāṃ kṣudha̍ṃ sedi̍ṃ va̱dhaṃ bha̱yam
indre̍ścā̱kṣujā̱lābhyā̍ṃ śa̱rva senā̍ma̱mūṃ ha̍tam

316.19

parā̍jitā̱ḥ pra tre̍satāmitrā nu̱ttā dhā̍vatu̱ brahma̍ṇā
bṛha̱spati̍praṇuttānāṃ māmīṣā̍m̐ moci̱ kaśca̱na

316.20

ava̍ padyantāmeṣā̱māyu̍dhāni̱ mā śa̍kanprati̱dhāmi̱ṣum
athai̍ṣāṃ ba̱hu bi̍bhya̱tāmiṣa̍vo ghnantu marmā̍ṇi

316.21

saṃ kro̍śatāme̱nāndyāvā̍pṛthi̱vī sa̱mantari̍kṣaṃ sa̱ha de̱vatā̍bhiḥ
mā jñā̱tāra̍ṃ mā pra̍ti̱ṣṭhāṃ vi̍danta mi̱tho vi̍ndhānā̱ upa̍ yantu mṛ̱tyum

316.22

diśa̍ścata̱srośvata̍ryo̍ de̱vara̱thasya̍ puro̱ḍāśā̍: śa̱phā a̱ntari̍kṣamu̱ddhiḥ
dyāvā̍pṛthi̱vī pa̍kṣasī ṛ̱tavo̍bhīśa̱vonta̍rdeśāḥ ki̱ṃkarā vākpa̍ri̱radhya̍m

316.23

sa̱ṃva̱tsa̱ro ra̍thaḥ pa̍ri̱vatsa̱ro ra̍tho̱pastho̍ vi̱rāḍī̱ṣābhī̱ ratha̍mukham
indra̍ḥ savya̱ṣṭhāśca̱ndramā̍: sāra̍thiḥ

316.24

i̱to ja̍ye̱to vi ja̍ya̱ saṃ ja̍ya̱ jaya̱ svāhā̍
'i̱me ja̍yantu̱ parā̱mī ja̍yantā̱ṃ svāhai̍bhyo du̱rāhā̱mībhya̍ḥ | nī̱la̱lo̱hi̱tenā̱mūna̱bhyava̍tanomi

316.5-2

ṛṣiḥ- atharvā || devatā- mantroktāḥ || chandaḥ- 1, 6, 7, 10, 13, 15-21, 24 triṣṭup;
2 paṅktiḥ; 3 prāstārapaṅktiḥ; 4, 5, 23, 25, 26 anuṣṭup; 8, 11, 12, 22 jagatī;
9 bhurik triṣṭup; 14 catuṣpadā'tijagatī

Linked texts (2)