Angirasi 321

Aṅgirasī 321

soda̍krāma̱tsāsu̍rā̱nāga̍ccha̱ttāmasu̍rā upā̍hvayanta̱ māya̱ ehīti̍

tasyā̍ viroca̍naḥ prā̱hrādirvatsa̍ āsīdayaspā̱traṃ pā̱tram

tāṃ dvi̱mūrddhātvyo̍'dhoktāṃ mā̱yāme̱vādho̍k

tāṃ mā̱yāmasu̍rā̱ upa̍ jīvantyupajī̱vanī̍yo bhavati̱ ya e̱vaṃ veda̍

soda̍krāma̱tsā pi̱tṝnāga̍ccha̱ttāṃ pi̱tara̍ upā̍hvayanta̱ svadha̱ ehīti̍

tasyā̍ ya̱mo rājā̍ va̱tsa āsī̍draja̱tapā̱traṃ pā̱tram

tāmanta̍ko mārtyavo̍dhoktāṃ sva̱dhāme̱vādho̍k

tāṃ sva̱dhāṃ pi̱tara̱ upa̍ jīvantyupajī̱vanī̍yo bhavati̱ ya e̱vaṃ veda̍

soda̍krāma̱tsā ma̍nu̱ṣyā3̱ nāga̍ccha̱ttāṃ ma̍nu̱ṣyā̍3 upā̍hvayanterā̍vatyehīti̍

tasyā manu̍rvaivasva̱to va̱tsa āsī̍tpṛthivī pātra̍m

tāṃ pṛ̱thīṃ vai̱nyo'dho̱ktāṃ kṛ̱ṣiṃ ca̍ sa̱syaṃ cā̍dhok

te kṛ̱rṣi ca̍ sa̱syaṃ ca̍ manu̱ṣyā̍ u̱pa jī̍vanti kṛ̱ṣṭarā̍dhirupajīva̱nīyo̍ bhavati̱ ya e̱vaṃ veda̍

soda̍krā̱matsā sa̍ptaṛṣīnāga̍ccha̱ttāṃ sa̍ptaṛ̱ṣaya̱ upā̍hvayanta̱ brahma̍ṇvatyehīti̍

tasyā̱ḥ somo̱ rājā̍ va̱tsa āsī̱cchanda̱ḥ pātra̍m

tāṃ bṛha̱spati̍rāṅgi̱ra̱so'dho̱ktāṃ brahma̍ ca̱ tapa̍ścādhok

tadbrahma̍ ca̱ tapa̍śca saptaṛ̱ṣaya̱ upa̍ jīvanti brahmavarca̱syu̍pajīva̱nīyo̍ bhavati̱ ya e̱vaṃ veda̍

Linked texts (2)