Pramāṇa · Search · About · API

Angirasi 324: atha navamaṃ kāṇḍam

Aṅgirasī 324

Language
Sanskrit

atha navamaṃ kāṇḍam

324.p1

atha viṃśaḥ prapāṭhakaḥ

324.1

divaspṛ̍thi̱vyā a̱ntari̍kṣātsamu̱drāda̱gnervātā̍nmadhuka̱śā hi ja̱jñe
tāṃ ca̱yitvā̱mamṛta̱ṃ vasā̍nāṃ hṛ̱dbhiḥ pra̱jāḥ prati̍ nandanti̱ sarvā̍ḥ

324.2

ma̱hatpayo̍ vi̱śvarū̍pamasyāḥ samu̱drasya̍ tvota reta̍ āhuḥ
yat eti̍ madhuka̱śā rarā̍ṇā tatprā̱ṇastadamṛta̱ṃ nirvi̍ṣṭam

324.3

paśya̍ntyasyāśca̱rita̍ṃ pṛthi̱vyāṃ pṛthu̱gdaro̍ bahu̱dhā mīmā̍ṃsamānāḥ
a̱gnervātā̍nmadhuka̱śā hi ja̱jñe ma̱rutā̍mu̱grā nṛ̱tiḥ

324.4

mā̱tādi̍tyānāṃ duhi̱tā vasū̍nāṃ prā̱ṇaḥ pra̱jānā̍ma̱mṛta̍sya nābhi̍ḥ
hira̍ṇyavarṇā madhuka̱śā ghṛ̱tācī̍ ma̱hānbhaga̍ścarati̱ martye̍ṣu

324.5

madhvo̱: kaśā̍majanayanta de̱vāstasyā̱ garbho̍ abhavadvi̱śvarū̍paḥ
taṃ jā̱taṃ taru̍ṇaṃ piparti mā̱tā sa jā̱to viśvā̱ bhuva̍nā̱ vi ca̍ṣṭe

324.6

kastaṃ pra ve̍da̱ ka u̱ taṃ ci̍keta̱ yo a̍syā hṛ̱daḥ kala̍śaḥ soma̱dhāno̱ akṣi̍taḥ
bra̱hmā su̍me̱dhāḥ so a̍sminmadeta

324.7

sa tau pra ve̍da̱ sa u̱ tau ci̍keta̱ yāva̍syāḥ sta̱nau sa̱hasra̍dhārāvakṣi̍tau
ūrja̍ṃ duhā̍te̱ ana̍pasphurantau

324.8

hiṅka̍riṇvatī bṛha̱tī vayo̱dhā uccairgho̍ṣābhye̍ti̱ yā vra̱tam
trīngha̱rmānā̱bhi vā̍vaśā̱nā mimā̍ti mā̱yuṃ paya̍te̱ payo̍bhiḥ

324.9

yāmāpī̍nāmupasīda̱ntyāpa̍ḥ śākva̱rā vṛ̍ṣa̱bhā ye sva̱rāja̍ḥ
te va̍rṣanti te va̍rṣayanti tadbhi̱de kāma̱mūrja̱māpa̍ḥ

324.10

sta̱nayi̱tnuste̍ vākpra̍jāpate vṛṣā̱ śuṣma̍ṃ kṣipasi̱ bhūmyā̱madhi̍
a̱gnervātā̍nmadhuka̱śā hi ja̱jñe ma̱rutā̍mu̱grā tṛ̱ptiḥ

324.11

yathā̱ soma̍ḥ prātaḥsava̱ne a̱śvinorbhava̍ti pri̱yaḥ
e̱vā me̍ aśvinā̱ varca̱ ātma̍ni dhriyatām

324.12

yathā̱ somo̍ dvitīye̱ sava̍na indrā̱gnyorbhava̍ti pri̱yaḥ
e̱vā me̍ indrāgnī̱ varca̱ ātma̍ni dhriyatām

324.13

yathā̱ soma̍stṛtīye̱ sava̍na ṛbhū̱ṇāṃ bhava̍ti pri̱yaḥ
e̱vā me̍ ṛbhavo̱ varca̱ ātma̍ni dhriyatām

324.14

madhu̍ janiṣīya̱ madhu̍ vaṃśiṣīya
paya̍svānagna̱ āga̍ma̱ṃ taṃ mā̱ saṃ sṛ̍ja̱ varca̍sā

324.15

saṃ mā̍gne̱ varca̍sā sṛja̱ saṃ pra̱jayā̱ samāyu̍ṣā
vi̱dyurme̍ asya de̱vā indro̍ vidyātsa̱ha ṛṣi̍bhiḥ

324.16

yathā̱ madhu̍ madhu̱kṛta̍ḥ sa̱ṃbhara̍nti madhvā̱vadhi̍
e̱vā me̍ aśvinā̱ varca̱ ātma̍ni dhriyatām

324.17

yathā̱ makṣā̍ idaṃ madhu̍ nya̱ñjanti̍ madhvā̱vadhi̍
e̱vā me̍ aśvinā̱ varca̱stejo̱ bala̱moja̍śca dhriyatām

324.18

yadgi̱riṣu̱ parva̍teṣu̱ goṣvaśve̍ṣu̱ yanmadhu̍
surā̍yāṃ si̱cyamā̍nāyā̱ṃ yattatra̱ madhu̱ tanmayi̍

324.19

aśvi̍nā sā̱raghe̍ṇa mā̱ madhu̍nāṅktaṃ śubhaspatī
yathā̱ varca̍svatī̱ṃ vāca̱māvadā̍ni̱ janā̱m̐ anu̍

324.20

sta̱nayi̱tnuste̍ vākpra̍jāpate̱ vṛṣā̱ śuṣma̍ṃ kṣipasi̱ bhūmyā̍ṃ di̱vi
tāṃ pa̱śava̱ upa̍ jīvanti̱ sarve̱ teno̍ seṣa̱mūrja̍ṃ piparti

324.21

pṛthi̱vī da̱ṇḍo̱3̱ntari̍kṣa̱ṃ garbho̱ dyauḥ kaśā̍ vi̱dyutpra̍ka̱śo hira̍ṇmayo bi̱nduḥ

324.22

yo vai ka̱śāṃyāḥ sa̱pta madhū̍ni̱ veda̍ madhu̱mānbhavati
brā̱hma̱ṇaśca rājā̍ ca dhe̱nuścāna̍ḍvāṃśca vrī̱hiśca̱ yava̍śca̱ madhu̍ sa̱ptamam

324.23

madhu̍mānbhavati̱ madhu̍madasyāhārya̍ṃ bhavati
madhu̍mato lo̱kāñjaya̍ti̱ ya e̱vaṃ veda̍

324.24

yaddī̍dhre stanaya̍ti pra̱jāpa̍tireva tanna̱jābhya̍ḥ prā̱durbhavati
tasmā̍tprācīnopavī̱tasti̍ṣṭhe pra̱jāpa̍ternu̱ mā bu̍dhya̱sveti̍
anve̍naṃ pra̱jā anu̍ pra̱jāpa̍tirbudhyate̱ ya e̱vaṃ veda̍

Linked texts (3)