Pramāṇa · Search · About · API

Angirasi 326

Aṅgirasī 326

Language
Sanskrit

326.1

upa̍mitāṃ prati̍mitā̱matho̱ pari̍mitāmuta
śālā̍yā vi̱śvavā̍rāyā nahrāni̱ vi cṛ̍tāmasi

326.2

yattai nahraṃ vi̍śvavāre̱ pāśo̱ granthi̍śca̱ yaḥ kṛ̱taḥ
bṛha̱spati̍ri̱vāhaṃ va̱laṃ vā̱cā vi sra̍ṃsayāmi̱ tat

326.3

ā ya̍yāma̱ saṃ ba̍ba̱rha granthī̍ścakāra te dṛ̱ḍhān
parū̍ṃṣi vi̱dvāñchla̱stevendre̍ṇa̱ vi cṛ̍tāmasi

326.4

va̱ṃśānā̍ṃ te naha̍nānāṃ prā̱ṇāha̍sya̱ tṛṇa̍sya ca
pa̱kṣāṇā̍ṃ viśvavāre te nahrāni̱ vi cṛ̍tāmasi

326.5

saṃda̍ṃśānāṃ pala̱dānā̱ṃ pari̍ṣvañjalyasya ca
i̱daṃ māna̍sya̱ patnyai̱ nahrāni̱ vi cṛ̍tāmasi

326.6

yāni̍ te̱ntaḥ śikyā̍nyā̱bredhṛ̍raṇyā̱yya kam̍
pra te̱ tāni̍ cṛtāmasi śi̱vā māna̍sya patnī na̱ udi̍tā ta̱nve̍ bhava

326.7

ha̱vi̱rdhāna̍magniśā̱laṃ patnī̍nā̱ṃ sada̍na̱ṃ sada̍ḥ
sado̍ de̱vānā̍masi devi śāle

326.8

akṣu̍mopa̱śaṃ vita̍taṃ sa̱hasrā̍kṣaṃ vi̱ṣūvṛ̍ti
arva̍naddhama̱bhihi̍ta̱ṃ brahma̍ṇā̱ vi cṛ̍tāmasi

326.9

yastvā̍ śāle pratigṛhṇāti̱ yena̱ cāsi̍ mi̱tā tvam
u̱bhau māna̍sya̱ patni̱ tau jī̍vatāṃ ja̱rada̍ṣṭī

326.10

a̱mutrai̍na̱mā ga̍cchatādṛḍhā na̱ddhā pari̍ṣkṛtā
yasyā̍ste vicṛtāma̱syaṅga̍maṅga̱ṃ paru̍ṣparuḥ

326.11

yastvā̍ śāle nimi̱māya̱ṃ saṃja̱bhāra̱ vana̱spatī̍n
pra̱jāyai̍ cakre̱ tvā śā̍le parame̱ṣṭhī pra̱jāpa̍tiḥ

326.12

nama̱stasmai̍ namo̍ dā̱tre śālā̍pataye ca kṛṇmaḥ
namo̍'gnaye̍ pra̱cara̍te̱ puru̍ṣāya ca te̱ nama̍ḥ

326.13

gobhyo̱ aśve̍bhyo̱ namo̱ yacchālā̍yāṃ vi̱jāya̍te
vijā̍vati pra̱jāva̍ti̱ vi te̱ pāśā̍m̐ścatāmasi

326.14

a̱bhimantaśchā̍dayasi̱ puru̍ṣānpa̱śubhi̍ḥ sa̱ha
vijā̍vati pra̱jāva̍ti̱ vi te̱ pāśā̍m̐ścatāmasi

326.15

a̱ntarā dyāṃ ca̍ pṛthi̱vīṃ ca̱ yadvyaca̱stena̱ śālāṃ prati̍ gṛhṇāmi ta i̱mām
yada̱ntari̍kṣa̱ṃ raja̍so vi̱māna̱ṃ tatkṛ̍ṇve̱hamu̱dara̍ṃ śeva̱dhibhya̍ḥ
tena̱ śālā̱ṃ prati̍ gṛhṇāmi̱ tasmai̍

326.16

ūrja̍svatī paya̍svatī pṛthi̱vyāṃ nirmi̍tā mi̱tā
viśvā̱nnaṃ bibhra̍tī śāle̱ mā hi̍ṃsīḥ pratigṛhṇa̱taḥ

326.17

tṛṇai̱rāvṛ̍tā pala̱dānvasā̍nā̱ rātrī̍va̱ śālā̱ jaga̍to ni̱veśa̍nī
mi̱tā pṛ̍thi̱vyāṃ ti̍ṣṭhasi ha̱stinī̍va pa̱dvatī̍

326.18

iṭa̍sya te̱ vi cṛ̍tā̱myapi̍naddhamaporṇuvan
varu̍ṇena̱ samu̍bjitāṃ mi̱traḥ prā̱tarvyu̍rjatu

326.19

brahma̍ṇā̱ śālā̱ṃ nirmi̍tāṃ ka̱vibhi̱rnirmi̍tāṃ mi̱tām
indrā̱gnī ra̍kṣatā̱ṃ śālā̍ma̱mṛtau̱ somya̱ṃ sada̍ḥ

326.20

ku̱lāye̍dhi kulā̱yaṃ ko̱śe kośa̱ḥ samu̍bjitaḥ
tatra̱ marto̱ vi jā̍yate̱ yasmā̱dviśva̱ṃ pra̱jāya̍te

326.21

yā dvipa̍kṣā̱ catu̍ṣpakṣā̱ ṣaṭpa̍kṣā̱ yā ni̱mīya̍te
a̱ṣṭāpa̍kṣā̱ṃ daśa̍pakṣā̱ṃ śālā̱ṃ māna̍sya̱ patnī̍ma̱gnirgarbha̍ i̱vā śa̍ye

326.22

pra̱tīcī̍ tvā pratīcīnaḥ śāle̱ premṇāhi̍ṃsatīm
a̱gnihya̍1̱ntarārpa̍śca̱rtasya̍ pratha̱mā dvāḥ

326.23

i̱mā āpa̱ḥ pra bha̍rāmya̱yakṣmā̱ yakṣma̱nāśa̍nīḥ
gṛ̱hānupa̱ pra sī̍dāmya̱mṛte̍na sa̱hāgninā̍

326.24

mā na̱ḥ pāśa̱ṃ prati̍ muco gu̱rurbhāro la̱ghurbha̍va
va̱dhūmiva̍ tvā śāle yannrkāma̍ṃ bharāmasi

326.25

prācyā̍ di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.26

dakṣi̍ṇāyā di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.27

pra̱tīcyā̍ di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.28

udī̍cyā di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.29

dhru̱vāyā̍ di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.30

ū̱rdhvāyā̍ di̱śaḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

326.31

diśo̍diśa̱ḥ śālā̍yā̱ namo̍ mahi̱mne svāhā̍ de̱vebhya̱ḥ svāhā̍'bhyaḥ

Linked texts (2)