Pramāṇa · Search · About · API

Angirasi 327

Aṅgirasī 327

Language
Sanskrit

327.1

sā̱ha̱sra̱stve̱ṣa ṛ̍ṣa̱bhaḥ paya̍svā̱nviśvā̍ rū̱pāṇi̍ vṛṣa̱ṇām̐su bibhra̍t
bhadraṃ dātre yaja̍mānāya̱ śikṣa̱nbarhaspṛtya u̱sriya̱stantu̍mātān

327.2

a̱pāṃ yo agre̍ prati̱mā ba̱bhūva̍ pra̱bhūḥ sarva̍smai pṛthi̱vīva̍ de̱vī
pi̱tā va̱tsānā̱ṃ pati̍ra̱ghnyānā̍ṃ sā̱hasre poṣe̱ api̍ naḥ kṛṇotu

327.3

pumā̱nanta̱rvāntsthavi̍ra̱ḥ paya̍svā̱nvaso̍ḥ kaba̱ndhamṛ̍ṣa̱bho bi̍bharti
tamindrā̍ya pa̱thibhi̍rdeva̱yānai̱rhuta̱mabhi̍rvahatu jā̱tave̍dāḥ

327.4

pi̱tā va̱tsānā̱ṃ pati̍ra̱ghnyānā̱matho̍ pi̱tā ma̍ha̱tāṃ garga̍rāṇām
va̱tso ja̱rāyu̍ prati̱dhukpīyū̍ṣa ā̱mikṣā̍ ghṛ̱taṃ tada̍sya̱ reta̍ḥ

327.5

de̱vānā̍ṃ bhā̱ga upa̍nāha e̱ṣo'pāṃ rasa̱ oṣa̍dhīnāṃ ghṛ̱tasya̍
soma̍sya bha̱kṣama̍vṛṇīta śa̱kro bṛ̱hannadri̍rabhava̱dyaccharī̍ram

327.6

some̍na pū̱rṇaṃ ka̱laśa̍ṃ bibharṣi̱ tvaṣṭā̍ rūpā̱ṇāṃ ja̍ni̱tā pa̍śū̱nām
śi̱vāstai̍ santu pra̱janvya̱ iha yā i̱mā nya̍'smabhya̍ṃ svadhite̱ yacchu̍ yā a̱mūḥ

327.7

ājya̍ṃ bibharti ghṛ̱tama̍sya̱ reta̍: sāha̱sraḥ poṣa̱stamu̍ ya̱jñamā̍huḥ
indra̍sya rū̱pamṛ̍ṣa̱bho vasā̍na̱: so a̱smāṃnde̱vāḥ śi̱va aitu̍ da̱ttaḥ

327.8

indra̍syaujo varu̍ṇasya bā̱hū a̱śvinoraṃsau̍ ma̱rutā̍miyaṃ ka̱kut
bṛha̱spati̍ṃ sa̱ṃbhṛta̍metamā̍hu̱rye dhīrā̍sa̱: ka̱vayo̱ ye ma̍nī̱ṣiṇa̍:

327.9

daivī̱rviśa̍: parya̍svānā teno̱ṣi tvāmindra̍ṃ tvāṃ sara̍svantamāhuḥ
sa̱hasra̍ṃ sa eka̍mukhā dadāti̱ yo brā̍hma̱ṇa ṛ̍ṣa̱bhamā̍ju̱hoti̍

327.10

bṛha̱spati̍: savi̱tā te̱ vayo̍ dadhau̱ tvaṣṭā̍rvāyo̱: paryā̍tmā ta̱ ābhṛ̍taḥ
a̱ntari̍kṣe mana̍sā tvā juhomi ba̱rhiṣṭe̱ dyāvā̍pṛthivī u̱bhe stā̍m

327.11

ya indra̍ iva de̱veṣu̍ go̱ṣveti̍ vi̱vāva̍dat
tasya̍ ṛṣabhasyā̱ṅgāni̱ brahmā̱ saṃ stau̍tu bha̱drayā̍

327.12

pā̱rśve ā̍stāmanu̱matyā̱ bharga̱yāstā̱manū̱vṛjau̍
a̱ṣṭhīvantā̍vabravīnmi̱tro mamai̱tau keva̍lāviti̍

327.13

bha̱sadā̍sīdādi̱tyānā̱ṃ śroṇī̍ āstāṃ bṛha̱spate̍:
puccha̱ṃ vāta̍sya de̱vasya̱ tena̍ dhū̱notyoṣa̍dhīḥ

327.14

gu̱dā ā̍santsinīvā̱lyāḥ sūryā̍yā̱stvaca̍mabruvan
utthā̱tura̍bruvanpa̱da ṛ̍ṣa̱bhaṃ yadaka̍lpayan

327.15

kro̱ḍa ā̍sījjāmiśa̱ṃsasya̱ soma̍sya ka̱laśau̍ dhṛ̱taḥ
de̱vāḥ saṃga̍tya̱ yatsa̱rvaṃ ṛ̍ṣa̱bhaṃ vyaka̍lpayan

327.16

te kuṣṭhi̍kāḥ sa̱ramā̍yai kūrmebhyo̍ adadhuḥ śa̱phān
ūva̍dhyamasya kī̱ṭebhya̍: śvavṛ̱tebhyo̍ adhārayan

327.17

śṛṅgā̍bhyā̱ṃ rakṣa̍ ṛṣa̱tyava̍rtiṃ hanti̱ cakṣu̍ṣā
śṛ̱ṇoti̍ bha̱draṃ karṇā̍bhyāṃ gavā̱ṃ yaḥ pa̍tira̱ghyaḥ

327.18

śa̱tayā̍jaṃ sa ya̍jate̱ naina̍ṃ dunvantya̱gnaya̍:
jinva̍nti̱ viśve̍ taṃ de̱vā yo brā̍hma̱ṇa ṛ̍ṣa̱bhamā̍ju̱hoti̍

327.19

brā̱hma̱ṇebhya̍ ṛṣa̱bhaṃ da̱ttvā varī̍yaḥ kṛṇute̱ mana̍:
puṣṭi̱ṃ so a̱ghnyānā̱ṃ sve go̱ṣṭheva̍ paśyate

327.20

gāva̍: santu pra̱jāḥ sa̱ntvatho̍ astu tanū̱bala̍m
tatsarva̱manu̍ manyantāṃ de̱vā ṛ̍ṣabhadā̱yine̍

327.21

a̱yaṃ pipa̍nni̱ndra indri̱yaṃ da̍dhātu ce̱tanī̍m
a̱yaṃ dhe̱nuṃ su̱dughā̍ṃ ni̱tyava̍tsāṃ va̱śāṃ du̱hāṃ vi̱paścita̍ṃ pu̱ro di̱vaḥ

327.22

pi̱śaṅgarū̍po nabha̱so va̍yo̱dhā aindṝḥ śu̱ṣmo vi̱śvarū̍po̱ na ārgan
āyu̍ra̱smabhya̍ṃ dadha̍tpra̱jāṃ ca̍ rā̱yaśca̱ poṣai̍ra̱bhi na̍ḥ sacatām

327.23

upa̍hopa̍parca̱nāsmingòṣṭha̱ upa̍ pṛñca naḥ
upa̍ ṛṣa̱bhasya̱ yadreta̱ upenda̍ tava̍ vī̱rya̍m

327.24

e̱taṃ vo̱ yuvāna̱ṃ prati̍ dadhmo̱ atra̱ tena̍ krīḍa̍ntīścarata va̱śām̐ anu̍
mā nau̍ hāsiṣṭa ja̱nuṣā̍ subhāgā rā̱yaśca̱ poṣai̍ra̱bhi na̍ḥ sacadhvam

327.1-2

ā na̍yaitamā ra̍bhasva su̱kṛtā̍ṃ lo̱kamapi̍ gacchatu prajā̱nan
tī̱rtvā tamā̍si bahu̱dhā ma̱hāntyajo nāka̱mā kra̍matāṃ tṛ̱tīya̍m

327.2-2

indrā̍ya bhā̱gaṃ pari̍ tvā nayāmya̱sminya̱jñe yaja̍mānāya sū̱rim
ye nau dva̱ṣantyanu̱ tāndra̍bhasvānāgaso̱ yaja̍mānasya vī̱rāḥ

327.3-2

pra pa̱dova̍ nenigdhi duśca̱rita̱ṃ yacca̱cāra̍ śu̱ddhaiḥ śa̱phairā kra̍matāṃ prajā̱nan
tī̱rtvā tamā̍si bahu̱dhā vi̱paśya̍nna̱jo nāka̱mā kra̍matāṃ tṛ̱tīya̍m

327.4-2

anu̍ cchya śyā̱mena̱ tvaca̍me̱tāṃ vi̱śasta̱ryathā̱parva̍'sinā̱ mābhi ma̍ṃsthāḥ
mābhi dru̍haḥ pa̱ruśa̱ḥ kalpa̍yainaṃ tṛ̱tīye̱ nāke̱ adhi̱ vi śra̍yainam

327.5-2

ṛ̱cā ku̱mbhīmadhyā̍dhau śrayā̱myā si̍ñcoda̱kamava̍ dhehyenam
paryā̍dhattā̱gninā̍ śamitāraḥ śṛ̱to ga̍cchatu su̱kṛtā̱ṃ yatra̍ lo̱kaḥ

327.6-2

utkrāmāta̱ḥ pari̱ cedatta̍sta̱smācca̱roradhi̱ nāka̍ṃ tṛ̱tīya̍m
a̱gnera̱gniradhi̱ saṃ ba̍bhūvi̱tha jyoti̍ṣmantamu̱bhi lo̱kaṃ ja̍yema

327.7-2

a̱jo a̱gniraja̱mu jyoti̍rāhu̱raja̍ṃ jī̱vatā̱ brahma̍ṇe de̱yamā̍huḥ
a̱jastamā̱ṃsyapa̍ hanti dū̱rama̱smiṃllo̱ke śradda̍dhānena da̱ttaḥ

327.8-2

pañcau̍danaḥ pañca̱dhā vi kra̍matāmā̱krama̍mā̱nastrīṇi̱ jyotī̍ṃṣi
īśā̍nānāṃ sukṛ̱tāṃ prehi̱ madhya̍ṃ tṛ̱tīye̱ nāke̱ adhi̱ vi śra̍yasva

327.9-2

ajā̱ roha̍ sukṛ̱tāṃ yatra̍ lo̱kaḥ śara̍bho na vṛ̱ttauti̍ du̱rgāṇyaiṣa̍ḥ
pañcau̍dano̱ brahma̍ṇe dīyamā̍na̱ḥ sa dā̱tāra̍ṃ tṛ̱ptyā̍ tarpayati

327.10-2

a̱jastrinā̍ke tridi̱ve tri̍pṛ̱ṣṭhe nāka̍sya pṛ̱ṣṭhe dadi̍vāṃsaṃ dadhāti
pañcau̍dano̱ brahma̍ṇe dīyamā̍no vi̱śvarū̍pā dhe̱nuḥ kā̍madu̱ghāsyaikā̍

327.11-2

e̱taddho̱ jyoti̍ḥ pitarastṛ̱tīya̱ṃ pañcau̍dana̱ṃ brahma̍ṇe̱jaṃ da̍dāti
a̱jastamā̱ṃsyapa̍ hanti dū̱rama̱smiṃllo̱ke śradda̍dhānena da̱ttaḥ

327.12-2

īśā̍nānāṃ sukṛ̱tāṃ lo̱kamīpsa̍npa̱ñcauda̍na̱ṃ brahma̍ṇe̱jaṃ da̍dāti
sa vyā̍ptimu̱bhi lo̱kaṃ ja̍yeta̱ṃ śivo̍'smabhya̱ṃ prati̍gṛhīto astu

327.13-2

a̱jo hya̍gne̱rarja̍niṣṭa̱ śokā̱dvipro̱ vipra̍sya̱ saha̍so vipa̱ścit
i̱ṣṭaṃ pū̱rtama̱bhipū̍ta̱ṃ vaṣa̍ṭkṛta̱ṃ tadde̱vā ṛ̱tuśaḥ ka̍lpayantu

327.14-2

a̱mota̱ṃ vāso̍ dadyā̱ddhira̍ṇyamapi̱ dakṣi̍ṇām
tathā̍ lo̱kāntsamā̍pnoti̱ ye di̱vyā ye ca̱ pārthi̍vāḥ

327.15-2

e̱tāstvā̱jopa̍ yantu̱ dhārā̍ḥ sau̱myā de̱vīrghṛ̱tapṛ̍ṣṭhā madhu̱ścuta̍ḥ
sta̱bhāna̱ pṛthi̱vīmu̱ta dyāṃ nāka̍sya pṛ̱ṣṭhe'dhi̍ sa̱ptara̍śmau

327.16-2

a̱jo'sya̱rja svargo̍'si̱ tvayā̍ lo̱kamaṅgi̍rasaḥ prājā̍nan
taṃ lo̱kaṃ puṇya̱ṃ pra jñai̍ṣam

327.17-2

yena̍ sa̱hasra̱ṃ vaha̍si̱ yenā̍gne sarvaveda̱sam
tene̱maṃ ya̱jñaṃ no̍ vaha sva̱rdde̱veṣu̱ ganta̍ve

327.18-2

a̱jaḥ pa̱kvaḥ svarge lo̱ke da̍dhāti̱ pañcau̍dano̱ nirṛ̍ti̱ṃ bādha̍mānaḥ
tena̍ lo̱kāntsūrya̍vato jayema

327.19-2

yaṃ brāhma̍ṇe niṃda̱dhe yaṃ ca̱ viśṇu̱ yā vipru̍ṣa oda̱nānā̍ma̱jasya̍
sarva̱ṃ tada̍gne sukṛ̱tasya̍ lo̱ke jā̍nītānna̱ḥ saṃga̍mane pa̱thīnām

327.20-2

ajo̱ vā i̱damagre̱ vya̍kramata̱ tayo̱ra i̱yama̍bhava̱dyauḥ pṛ̱ṣṭham
a̱ntari̍kṣa̱ṃ madhya̱ṃ diśa̍: pā̱rśve sa̍mu̱drau ku̱kṣī

327.21-2

sa̱tyaṃ ca̱taṃ ca̱ cakṣu̍ṣī̱ viśva̍ṃ sa̱tyaṃ śraddhā prā̱ṇo vi̱rāṭ śira̍:
e̱ṣa vā a̍parimi̱to ya̱jño yada̱jaḥ pa̱ñcauda̍naḥ

327.22-2

a̱pari̍mitame̱va ya̱jñamā̱pnotyapari̍mitaṃ lo̱kamava̍ rundhe
yo̍'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.23-2

nāsyā̱sthīni̍ bhindyā̱nna ma̱jjño nirdha̍yet | sarva̍menaṃ samā̱dāye̱dama̱daṃ pra ve̍śayèt

327.24-2

i̱dama̍da̱mevā̱sya rūpaṃ bhava̍ti̱ tenai̍na̱ṃ saṃ ga̍ṃmayati
iṣa̱ṃ madu̱rjama̍smai duhe̱ yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.25

pañca̍ ru̱kmā pañca̱ navā̍ni̱ vastrā̱ pañcā̍smai dhe̱nava̍: kāma̱dughā̍ bhavanti
yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.26

pañca̍ ru̱kmā jyoti̱rasmai̍ bhava̱nti varma̱ vāsā̍m̐si ta̱nve̍' bhavanti
sva̱rgaṃ lo̱kama̍śnute̱ yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.27

yā pūrva̱ṃ pati̍ṃ vi̱ttvāthā̱nyaṃ vi̱ndate̱para̍m
pa̱ñcauda̍naṃ ca̱ tāva̱jaṃ dadā̍to̱ na vi yòṣa̍taḥ

327.28

sa̱mā̱nalo̍ko bhavati puna̱rbhuvāpa̍ra̱: pati̍:
yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.29

a̱nu̱pūrva̍vatsāṃ dhe̱numa̍na̱ḍvāha̍mupaba̱rhaṇa̍m
vāso̱ hira̍ṇyaṃ da̱ttvā te ya̍nti̱ diva̍mutta̱mām

327.30

ā̱tmāna̍ṃ pi̱tara̍ṃ pu̱traṃ pautra̍ṃ pi̱tāma̱ham
jā̱yāṃ ja̍ni̱trīṃ mā̱tara̍ṃ ye pri̱yāstānupa̍ hvaye

327.31

yo vai naidā̍gha̱ṃ nāma̱rtuṃ veda̍ | e̱ṣa vai naidā̍gho̱ nāma̱rturyada̱jaḥ pa̱ñcauda̍naḥ
nire̍vāpri̱yasya̍ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.32

yo vai ku̱rvanta̱ṃ nāma̱rtuṃ veda̍ | ku̱rvatī̍ṅkurvatīme̱vāpri̱yasya̱ bhrātṛ̍vyasya̱ śriya̱mā da̍tte
e̱ṣa vai ku̱rvannāma̱rturyada̱jaḥ pa̱ñcauda̍naḥ
nire̍vāpri̱yasya̱ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇā̱jyoti̍ṣa̱ṃ dadā̍ti

327.33

yo vai saṃya̍ntaṃ nāma̱rtuṃ veda̍ | saṃya̍tī̱ṃsaṃya̍tīme̱vāpri̍yasya̱ bhrātṛ̍vyasya̱ śriya̱mā da̍tte
e̱ṣa vai saṃya̱nnāma̍rturyada̱jaḥ pañcau̍danaḥ
nire̱vāpri̍yasya̱ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇājyotiṣa̱ṃ dadā̍ti

327.34

yo vai pinva̍ntaṃ nāma̱rtuṃ veda̍ | pinva̍tī̱ṃpinva̍tīme̱vāpri̍yasya̱ bhrātṛ̍vyasya̱ śriya̱mā da̍tte
e̱ṣa vai pinva̱nnāma̍rturyada̱jaḥ pañcau̍danaḥ
nire̱vāpri̍yasya̱ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇājyotiṣa̱ṃ dadā̍ti

327.35

yo vā u̱dyanta̍ṃ nāma̱rtuṃ veda̍ | u̱dyatī̱mudya̍tīme̱vāpri̍yasya̱ bhrātṛ̍vyasya̱ śriya̱mā da̍tte
e̱ṣa vā u̱dyannāma̍rturyada̱jaḥ pañcau̍danaḥ
nire̱vāpri̍yasya̱ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇājyotiṣa̱ṃ dadā̍ti

327.36

yo vā a̍bhi̱bhuva̍ṃ nāma̱rtuṃ veda̍ | a̱bhi̱bhava̍ntīmabhibhava̍ntīme̱vāpri̍yasya̱ bhrātṛ̍vyasya̱ śriya̱mā da̍tte
e̱ṣa vā a̍bhi̱bhūrnāma̍rturyada̱jaḥ pañcau̍danaḥ
nire̱vāpri̍yasya̱ bhrātṛ̍vyasya̱ śriya̍ṃ dahati̱ bhava̍tyā̱tmanā̍
yo'̱jaṃ pa̱ñcauda̍na̱ṃ dakṣi̍ṇājyotiṣa̱ṃ dadā̍ti

327.37

a̱jaṃ ca̍ paca̍ta̱ pañca̍ cauda̱nān
sarvā̱ diśa̍: saṃma̍nasaḥ sa̱dhrīcī̍: sānte̍rde̱śāḥ prati̍ gṛhṇantu ta e̱tam

327.38

tāste̍ rakṣantu̱ tava̍ tu̱bhyame̱taṃ tābhya̱ ājya̍ṃ ha̱virha̱daṃ ju̍homi

Linked texts (4)