Pramāṇa · Search · About · API

Angirasi 333

Aṅgirasī 333

Language
Sanskrit

333.1

yatkṣa̱ttāra̍ṃ hvaya̱tyā śrāvayatyeva tat

333.2

yatprati̍śṛ̱ṇoti̍ pratyāśrāvayatyeva tat

333.3

yatpari̍ve̱ṣṭāra̍ḥ pātra̍hastāḥ pūrveṃ cāpa̍re ca pra̱padya̍nte camu̱sādhva̍ryava e̱va te

333.4

teṣā̱ṃ na kaśca̱nāho̍tā

333.5

yadvā a̍ti̍thipa̱tira̍ti̱thīnpa̍ri̱viṣya̍ gṛ̱hānupo̍dai̱tyava̍bhṛ̱thameva tadupauvai̍ti

333.6

yatsa̍mbhā̱gaya̍ti̱ dakṣi̍ṇāḥ sabhā̱gaya̍ti̱ yada̍nu̱tiṣṭha̍ta̱ uda̍va̱syatye̱va tat

333.7

sa upa̍hūtaḥ pṛthi̱vyāṃ bha̍kṣayatyupa̍hūta̱stasmi̱nyatpṛ̍thi̱vyāṃ vi̱śvarū̍pam

333.8

sa upa̍hūto̱ntari̍kṣe bhakṣayatyupa̍hūta̱stasmi̱nyada̱ntari̍kṣe vi̱śvarū̍pam

333.9

sa upa̍hūto di̱vi bha̍kṣayatyupa̍hūta̱stasmi̱nyaddi̱vi vi̱śvarū̍pam

333.10

sa upa̍hūto de̱veṣu̍ bhakṣayatyupa̍hūta̱stasmi̱nyadde̱veṣu̍ vi̱śvarū̍pam

333.11

sa upa̍hūto lo̱keṣu̍ bhakṣayatyupa̍hūta̱stasmi̱nyallo̱keṣu̍ vi̱śvarū̍pam

333.12

sa upa̍hūta̱ upa̍hūtaḥ

333.13

ā̱pnotī̱maṃ lo̱kamā̱pnotya̱mum

333.14

jyoti̍ṣmato lo̱kāñjaya̍ti̱ ya e̱vaṃ veda̍

333.1-2

pra̱jāpa̍tiśca parame̱ṣṭhī ca̱ śṛṅge̱ indra̱ḥ śiro̍ a̱gnirlalā̍ṭaṃ ya̱maḥ kṛ̱kāṭa̍m

333.2-2

somo̱ rājā̍ ma̱stiṣko̱ dyauru̍ttaraha̱nuḥ pṛ̍thi̱vyadha̍raha̱nuḥ

333.3-2

vi̱dyujji̱hvā ma̱ruto̱ dantā̍ re̱vatī̍rgrī̱vāḥ kṛttikā ska̱ndhā gha̱rmo vaha̍ḥ

333.4-2

viśva̍ṃ vā̱yuḥ sva̱rgo lo̱kaḥ kṛ̍ṣṇa̱draṃ vi̱dharaṇa̍ṃ nive̱ṣya̍ḥ

333.5-2

śye̱naḥ kro̱ḍo̱'ntari̍kṣaṃ pāja̱sya̍ṃ bṛha̱spati̍ḥ ka̱kudbṛ̍ha̱tīḥ kīka̍sāḥ

333.6-2

de̱vānā̱ṃ patnī̍ḥ pṛ̱ṣṭaya̍ upa̱sada̱ḥ parśa̍vaḥ

333.7-2

mi̱traśca̱ varu̍ṇaścāṃsau tvaṣṭā̍ cā̱rya̱mā ca̍ do̱ṣaṇī̍ mahāde̱vo bā̱hū

333.8-2

indrā̍ṇī bhasa̱dvāyu̱ḥ puccha̱ṃ pava̍māno̱ bālā̍ḥ

333.9-2

brahma̍ ca kṣa̱traṃ ca̱ śroṇī̱ bala̍ṃmūrū

333.10-2

dhā̱tā ca̍ savi̱tā cā̍ṣṭhī̱vantau̱ jaṅghā̍ gandha̱rvā a̍psa̱rasa̍ḥ ku̱ṣṭhikā̱ adi̍tiḥ śa̱phāḥ

333.11-2

ceto̱ hṛda̍ya̱ṃ yakṛ̍nme̱dhā vra̱taṃ pu̍rī̱tat

333.12-2

kṣu̱llu̱kṣiri̍rā va̱niṣṭhuḥ parva̍tāḥ plā̱śarya̍ḥ

333.13-2

kro̱dhau vṛ̱kkau ma̱nyurāṇḍau̍ pra̱jā śepa̍:

333.14-2

na̱dī sū̱trī va̱rṣasya̱ pata̍ya̱ stanā̍ stanayi̱tnūrūdha̍:

333.15

vi̱śvavya̍cā̱ścamauṣa̍dhayo̱ lomā̍ni̱ nakṣa̍trāṇi rū̱pam

333.16

de̱va̱janā̱ gudā̍ manu̱ṣyā̍ ā̱ntrāṇyu̍trā u̱dara̍m

333.17

rakṣā̍m̐si lohi̍tamitara̱janā̱ ūva̍dhyam

333.18

abhra̱ṃ pīvo̍ ma̱jjā ni̱dhana̍m

333.19

a̱gnirāsī̍n u̱tthito̱'śvinā̍

333.20

indra̍: prā̱ṅtiṣṭha̍ndakṣi̱ṇā tiṣṭha̍nya̱maḥ

333.21

pratya̱ṅṅitiṣṭha̍ndhā̱toda̱ṅtiṣṭha̍ntsavi̱tā

333.22

tṛṇā̍ni̱ prāpta̍: somo̱ rājā̍

333.23

mi̱tra īkṣa̍māṇa āvṛ̍tta ā̱nanda̍:

333.24

yu̱jyamā̍no vaiśvade̱vo yu̱ktaḥ pra̱jāpa̍tirvi̱mukta̍: sarva̍m

333.25

e̱tadvai vi̱śvarū̍pa̱ṃ sarvarū̍paṃ gorū̱pam

333.26

upai̍naṃ vi̱śvarū̍pāḥ sarvarūpāḥ pa̱śava̍stiṣṭhanti̱ ya e̱vaṃ veda̍

Linked texts (3)