Pramāṇa · Search · About · API

Angirasi 335

Aṅgirasī 335

Language
Sanskrit

335.1

a̱sya vā̱masya̍ pali̱tasya̍ hotu̱stasya̱ bhrātā̍ madhya̱mo a̱styaśna̍ḥ
tṛ̱tī̱yo bhrātā̍ ghṛ̱tapṛ̍ṣṭho a̱syātrā̍paśyaṃ vi̱śpati̍ṃ sa̱ptapu̍tram

335.2

sa̱pta yu̍ñjanti̱ ratha̱meka̍cakra̱meko̱ aśvo̍ vahati sa̱ptanā̍mā
tri̱nābhi̍ ca̱krama̱jara̱mana̍rva̱ṃ yatre̱mā viśvā̱ bhuva̱nādhi̍ ta̱sthuḥ

335.3

i̱maṃ ratha̱madhi̱ ye sa̱pta ta̱sthuḥ sa̱ptaca̍kraṃ sa̱pta va̍hantyaśvā̍ḥ
sa̱pta svasā̍ro a̱bhi saṃ na̍vante̱ yatra̱ gavā̱ṃ nihi̍tā sa̱pta nāmā̍

335.4

ko da̍darśa pratha̱maṃ jāya̍mānama̱sthanva̍nta̱ṃ yada̍na̱sthā bibha̍rti
bhūmyā̱ asurasṛ̍gā̱tmā kva̍ svitko vi̱dvāṃsa̱mupa̍ gā̱tpraṣṭu̍me̱tat

335.5

i̱ha bra̍vītu̱ ya ī̍ma̱ṅga vedā̍sya vā̱masya̱ nihi̍taṃ pa̱daṃ veḥ
śī̱rṣṇaḥ kṣī̱raṃ du̍hṛte̱ gāvo̍ asya va̱vriṃ vasā̍nā uda̱kaṃ pa̱dāpu̍ḥ

335.6

pāka̍ḥ pṛcchāmi̱ mana̱sāvi̍jānandde̱vānā̍me̱nā nihi̍tā pa̱dāni̍
va̱tse ba̱ṣkaye̍'dhi sa̱pta tantūnvi ta̍tnire ka̱vaya̱ ota̱vā u̍

335.7

aci̍kitvāṃściki̱tuṣa̍ści̱datra̍ ka̱vīnpṛ̍cchāmi vi̱dmane̱ na vi̱dvān
vi yasta̱stambha̱ ṣaḷi̱mā rajā̱ṃsyaja̍sya rū̱pe kimapi̍ svi̱deka̍m

335.8

mātā̍ pi̱tara̍mṛ̱ta ā ba̍bhāja dhī̱tyagre̱ mana̍sā saṃ hi ja̱gme
sā bī̍bhatsurgarbha̍rasā̱ nivi̍ddhā̱ nama̍svanta̱ idu̍pavā̱kamī̍yuḥ

335.9

yu̱ktā mā̱tāsī̍ddhu̱ri dakṣi̍ṇāyā̱ ati̍ṣṭha̱dgarbho̍ vṛja̱nīṣva̱ntaḥ
amī̍medva̱tso anu̱ gāma̍paśyadvi̱śvarū̍pya̱ṃ triṣu̱ yoja̍neṣu

335.10

ti̱sro mā̱tṝṃstrīnpi̱tṝnbibhra̱deka̍ ū̱rdhvasta̍sthau̱ nemava̍ glāpayanta
mantra̍yante di̱vo a̱muṣya̍ pṛ̱ṣṭhe vi̍śvavi̱do vāca̱mavi̍śvavinnām

335.11

pañcā̍re ca̱kre pa̍ri̱varta̍māne̱ yasmi̱nnāta̍sthu̱rbhuva̍nāni̱ viśvā̍
tasya̱ nākṣa̍stapyate̱ bhūri̍bhāraḥ sa̱nāde̱va na śī̍ryate̱ sanā̍bhiḥ

335.12

pañca̍pādaṃ pi̱tara̍ṃ dvāda̱śākṛ̍tiṃ di̱va ā̍hu̱ḥ pare̱ ardhe purīṣiṇa̍m
athe̱me a̱nya upa̍re vicakṣa̱ṇe sa̱ptaca̍kre ṣaḍa̍ra āhu̱rarpi̍tam

335.13

dvāda̍śāraṃ na̱hi tajjarā̍ya̱ varva̍rti ca̱kraṃ pari̱ dyāmṛ̱tasya̍
ā pu̱trā a̍gne midhu̱nāso̱ atra̍ sa̱pta śa̱tāni̍ viṃśa̱tiśca̍ tasthuḥ

335.14

sa̱nemi̍ ca̱krama̱jara̱ṃ vi vā̍vṛta u̱ttānā̍yāṃ da̱śa yu̱ktā va̍hanti
sūrya̍sya̱ cakṣū̱ raja̍sai̱lāvṛ̍ta̱ṃ yasmi̱nnā ta̍sthu̱rbhuva̍nāni̱ viśvā̍

335.15

striya̍ḥ sa̱tīstām̐ u̍ me pu̱ṃsa ā̍huḥ paśya̍dakṣa̱ṇvānna vi ce̍tada̱ndhaḥ
ka̱viryaḥ pu̱traḥ sa ī̍mā ci̍keta̱ yastā vi̍jā̱nātsa pi̱tuṣpi̱tāsa̍t

335.16

sā̱ka̱ṃjānā̍ṃ sa̱ptatha̍māhureka̱jaṃ ṣaḍidya̱mā ṛṣa̍yo deva̱jā iti̍
teṣā̍mi̱ṣṭāni̱ vihi̍tāni dhāma̱śa sthā̱tre re̍jante̱ vikṛ̍tāni rūpa̱śaḥ

335.17

ava̍ḥ pare̍ṇa pa̱ra e̱nāva̍reṇa pa̱dā va̱tsaṃ bibhra̍tī̱ gauruda̍sthāt
sā ka̱drīcī̱ kaṃ svi̱dartha̱ṃ parā̍gā̱tkva̍ svitsūte na̱hi yū̱the a̱smin

335.18

ava̍ḥ pare̍ṇa pi̱tara̱ṃ yo asyā̱ vedā̍vaḥ pare̍ṇa pa̱ra e̱nāva̍reṇa
ka̱vīya̍māna̱ḥ ka i̱ha pra vo̍cadde̱vaṃ mana̱ḥ kuto̱ adhi̱ prajā̍tam

335.19

ye a̱rvāñca̱stām̐ u̍ pa̱rāca̍ āhu̱rye pa̱rāñca̱stām̐ u̍ a̱rvāca̍ āhuḥ
indra̍śca̱ yā ca̍kṛ̱thuḥ soma̱ tāni̍ dhu̱rā na yu̱ktā raja̍so vahanti

335.20

dvā su̍pa̱rṇā sa̱yujā̱ sakhā̍yā samā̱naṃ vṛ̱kṣaṃ pari̍ ṣasvajāte
tayo̍ra̱nyaḥ pippa̍laṃ svā̱dvattyana̍śnanna̱nyo a̱bhi cā̍kaśīti

335.21

yasmi̍nvṛ̱kṣe su̍pa̱rṇā ma̍dhva̱da̍ḥ supa̱rṇā ni̍vi̱śante̱ suva̍te̱ cādhi̱ viśve̍
tasya̱ yadāhu̱ḥ pippa̍laṃ svā̱dvagre̱ tannonna̍śa̱dyaḥ pi̱tara̱ṃ na veda̍

335.22

yatrā̍ supa̱rṇā a̱mṛta̍sya bha̱kṣamani̍meṣaṃ vi̱dathā̍bhi̱svara̍nti
e̱nā viśva̍sya̱ bhuva̍nasya go̱pāḥ sa mā̱ dhīra̍ḥ pā̱kamatrā vi̍veśa

Linked texts (2)