Angirasi 336

Aṅgirasī 336

Language: Sanskrit

336.1

yadgāyatre adhi̍ gāya̱tramāhi̍ta̱ṃ traiṣṭu̍bhaṃ vā̱ traiṣṭu̍bhā̱nnira̍takṣata
yadvā̱ jaga̍jjaga̱tyāhi̍taṃ pa̱daṃ ya ittadvi̱duste a̍mṛta̱tvamā̍naśuḥ

336.2

gā̱ya̱treṇa̱ prati̍ mimīte a̱rkama̱rkeṇa̱ sāma̱ traiṣṭu̍bhena vā̱kam
vā̱kena̍ vā̱kaṃ dvi̱padā̱ catu̍ṣpadā̱kṣareṃṇa mimate sa̱pta vāṇī̍ḥ

336.3

jaga̍tā̱ sindhu̍ṃ di̱vyaska̍bhāyadadhaṃtare̱ sūrya̍ parya̍paśyat
gā̱ya̱trasya̍ sa̱midha̍sti̱sra ā̍hustato̍ ma̱hnā pra ri̍rice mahi̱tvā

336.4

upa̍ hvaye su̱dughā̍ṃ dhe̱nume̱tāṃ su̱hasto̍ go̱dhugu̱ta dau̍ha̱denā̍m
śreṣṭha̍ṃ sa̱vaṃ sa̍vi̱tā sā̍viṣanno̱'bhī̍ddho gha̱rmastadu̱ ṣu pra vo̍cat

336.5

hiṅkṛ̍ṇvatī vasu̱patnī̱ vasū̍nāṃ va̱tsami̱cchantī̱ mana̍sā̱bhyāgā̍t
du̱hāma̱śvibhyā̱ṃ payo̍ a̱ghnyeyaṃ sā va̍rdhatāṃ maha̱te saubha̍gāya

336.6

gaura̍mīmeda̱bhi va̱tsaṃ mi̱ṣanta̍ṃ mū̱rdhāna̍ṃ hiṅkṛ̍ṇo̱nmātvā̱ u̍
sṛkvā̍ṇaṃ gha̱rmama̱bhi vā̍vaśānā mimā̍ti mā̱yuṃ paya̍te̱ payo̍bhiḥ

336.7

a̱yaṃ sa śi̱ṅkte yena̱ gaura̱bhīvṛ̍tā mimā̍ti mā̱yuṃ dhva̱sanā̱vadhi̍ śri̱tā
sā cittibhi̱rni hi ca̱kāra̱ martyā̍nvidyudbhava̍ntī̱ prati̍ va̱vrīmau̍hata

336.8

ana̱cchaye̍ tu̱ragā̍tu jī̱vameja̍ddhru̱vaṃ madhya̱ ā pa̱styā̍nām
jī̱vo mṛ̱tasya̍ carati sva̱dhābhi̱rama̍rtyo̱ martye̍nā̱ sayo̍niḥ

336.9

vi̱dhuṃ da̍drā̱ṇaṃ sa̍li̱lasya̍ pṛ̱ṣṭhe yu̱vāna̍ṃ santa̍ṃ pali̱to ja̍gāra
de̱vasya̍ paśya̱ kāvya̍ṃ mahi̱tvādyā ma̱māra̱ sa hyaḥ samā̍na

336.10

ya ī̍ṃ ca̱kāra̱ na so a̱sya ve̍da̱ ya ī̍ṃ da̱darśa̱ hiru̱ginnu tasmā̍t
sa mā̱turyonā̍ pari̍vīto a̱ntarbahupra̱jā niṛ̍tirā vi̍veśa

336.11

apa̍śyaṃ go̱pāmani̍padyamāna̱mā ca̱ parā̍ ca pa̱thibhi̱ścara̍ntam
sa sa̱dhrīcī̱ḥ sa viṣū̍cī̱rvasā̍na̱ ā va̍rīvartti̱ bhuva̍neṣva̱ntara

336.12

dyaurna̍ḥ pi̱tā ja̍ni̱tā nābhi̱ratra̱ bandhu̍rno mā̱tā pṛ̍thi̱vī ma̱hīyam
u̱ttā̱nayo̍śca̱mvo̱3̱ryoni̍ra̱ntaratra̍ pi̱tā du̍hi̱turgarbha̍mādhā̍t

336.13

pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̍ pṛ̱ṣṇo aśvā̍sya̱ reta̍ḥ
pṛ̱cchāmi̍ vi̱śvasya̱ bhuva̍nasya̱ nābhi̍ṃ pṛ̱cchāmi̍ vā̱caḥ pa̍ra̱maṃ vyo̍ma

336.14

i̱yaṃ vedi̱ḥ paro̱ anta̍ḥ pṛthi̱vyā a̱yaṃ somo̱ vṛṣṇo̍ a̱śvasya̱ reta̍ḥ
a̱yaṃ ya̱jño vi̱śvasya̱ bhuva̍nasya̱ nābhi̱rbrahmā̱yaṃ vā̱caḥ pa̍ra̱maṃ vyo̍ma

336.15

na vi jā̍nāmi̱ yadi̍ve̱damasmi̍ ni̱ṇyaḥ saṃna̍ddho̱ mana̍sā carāmi
ya̱dā mārganprathama̱jā ṛ̱tasyādiddhāco a̍śnuve bhā̱gama̱syāḥ

336.16

a̱pāṅ prāṅe̍ti sva̱dhayā̍ gṛbhī̱to'ma̍rtyo̱ martye̍nā̱ sayo̍niḥ
tā śaśva̍ntā̱ viṣū̍cīnā̱ viya̍ntā̱ nya1̍nyaṃ cikyu̱rna ni ci̍kyura̱nyam

336.17

sa̱ptārdha̍garbhā̱ bhuva̍nasya̱ reto̱ viṣṇo̍stiṣṭhanti pra̱diśā̱ vidha̍rmaṇi
te dhī̱tibhi̱rmana̍sā̱ te vi̍pa̱ścita̍ḥ pari̱bhuva̱ḥ pari̍ bhavanti vi̱śvata̍ḥ

336.18

ṛco a̱kṣare̍ para̱me vyo̍ma̱nyasmi̍nde̱vā adhi̱ viśve̍ niṣe̱duḥ
yastanna veda̱ kimṛ̱cā ka̍riṣyati̱ ya ittadvi̱dusta i̱me samā̍sate

336.19

ṛ̱caḥ pa̱daṃ mātra̍yā kalpayanto̱rdhvena̍ cā̱klṛpu̱rviśva̍meja̍t
tri̱pādva̱rhaḥ puru̱rūpa̱ṃ vi ta̍ṣṭhe̱ tena̍ jīvanti pra̱diśa̱ścata̍sraḥ

336.20

sū̱ya̱va̱sādbha̍gavatī̱ hi bhū̱yā atho̍ va̱yaṃ bhaga̍vantaḥ syāma
a̱ddhi tṛṇa̱maghnye̱ viśvadānī̱ṃ piba̍ śu̱ddhamu̍da̱kamāca̍rantī

336.21

gaurīrbhimāya salilā̍ni̱ takṣa̱tyeka̍padī dvi̱padī̱ sā catu̍ṣpadī
a̱ṣṭāpa̍dī̱ nava̍padī babhū̱vuṣī̍ saha̱srākṣa̍rā bhuva̍nasya pa̱ṅktistasyā̍ḥ
samu̱drā adhi̱ vi kṣa̍ranti

336.22

kṛ̱ṣṇaṃ ni̱yāna̱ṃ hara̍yaḥ supa̱rṇā a̱po vasā̍nā̱ diva̱mutpa̍tanti
ta āva̍vṛtra̱ntsada̍nādṛta̱syādiddhṛ̱tena̍ pṛthi̱vīṃ vyu̍nduḥ

336.23

a̱pāde̍ti pratha̱mā pa̱dvatī̍nā̱ṃ kastadvā̍ṃ mitrāvaruṇā ci̍keta
garbho̱ bhāra̱ṃ bhara̍tyā cidasyā ṛ̱taṃ pi̍pa̱rtyanṛ̍ta̱ṃ ni pā̍ti

336.24

vi̱rāḍa̱gnivi̱rāṭ pṛ̍thi̱vī vi̱rāḍa̱ntari̍kṣaṃ vi̱rāṭ pra̱jāpa̍tiḥ
vi̱rāṇmṛ̱tyuḥ sā̱dhyānā̍madhirā̱jo ba̍bhūva̱ tasya̍ bhū̱taṃ bhavya̍ṃ va̱śe sa me̍ bhū̱taṃ bhavya̍ṃ va̱śe kṛ̍ṇotu

336.25

śa̱kamaya̍m̐ dhūma̱mārā̱dapa̍śyaṃ viṣū̱vatā̍ pa̱ra e̱nāvare̍ṇa
u̱kṣāṇa̍ṃ pṛśni̍mapacanta dhī̱rāstāni̱ dharmā̍ṇi pratha̱mānyā̍san

336.26

traya̍ḥ ke̱śina̍ ṛ̱tuthā vi ca̍kṣate saṃvatsa̱re va̍pa̱ta̱ eka̍ eṣām
viśva̍ma̱nyo a̱bhica̍ṣṭe̱ śacī̍bhi̱rdhāji̱reka̍sya dadṛśe̱ na rū̱pam

336.27

ca̱tvāri̱ vākpari̍mitā pa̱dāni̱ tāni̍ vidurbrāhma̱ṇā ye ma̍nī̱ṣiṇa̍ḥ
guhā̱ trīṇi̱ nihi̍tā̱ neṅga̍yanti turī̱yaṃ vā̱co ma̍nu̱ṣyā̍ vadanti

336.28

indra̍ṃ mi̱traṃ varu̍ṇama̱gnimā̍huratho̍ di̱vyaḥ sa su̍pa̱rṇo ga̱rutmā̍n
eka̱ṃ sad viprā̍ bahu̱dhā va̍dantya̱gniṃ ya̱maṃ mā̍ta̱riśvā̍namāhuḥ

Linked texts (3)

Atharvaveda — Sanskrit
Śaunakasaṃhitā — Sanskrit
Kubjikopāsanāmṛtapūrṇopaniṣat — Sanskrit