Pramāṇa · Search · About · API

Angirasi 337

Aṅgirasī 337

Language
Sanskrit

337.1

yāṃ ka̱lpaya̍nti va̱hatau va̱dhūmiva̍ vi̱śvarū̍pāṃ hasta̍kṛtāṃ ciki̱tsarva̍ḥ
sārāde̱tvapa̍ nudāma e̱nām

337.2

śī̱rṣṇvatī̍ṃ na̱svatī̍ṃ ka̱rṇinī̍ṃ kṛtyākṛ̱tā saṃbhṛ̍tā vi̱śvarū̍pā
sārāde̱tvapa̍ nudāma e̱nām

337.3

śū̱drakṛ̍tā rāja̍kṛtā strīkṛ̍tā brahma̍bhiḥ kṛ̱tā
jā̱yā patyā̍ nu̱tteva̍ ka̱rtāra̍ṃ bandhve̍cchatu

337.4

a̱nayā̱hamoṣa̍dhyā sarvā̍ḥ kṛtyā a̍dūduṣam
yāṃ kṣetre̍ ca̱kruryāṃ goṣu̱ yāṃ vā̍ te̱ puru̍ṣeṣu

337.5

a̱ghama̍stvaghakṛ̱te śapa̍thaḥ śapathī̱yate
pratya̱kprati̍prahiṇmro yathā̍ kṛtyākṛ̱taṃ hana̍t

337.6

pra̱tīcīna̍ āṅgi̱raso'dhyakṣo̍ naḥ pu̱rohi̍taḥ
pra̱tīcī̍: kṛtyā ā̱kṛtyā̱mankṛtyākṛ̍to jahi

337.7

yastvovā̍ca̱ pare̱hīti̍ prati̱kūla̍mu̱dāyya̍m
taṃ kṛ̍tye̱bhiniva̍rtasva̱ māsmāniccho anā̍gasaḥ

337.8

yaste̱ parū̍ṣi sa̱ṃdadhau̱ ratha̍sye̱varburdhi̍yā
taṃ ga̍ccha̱ tatra̍ te'ya̱namajñā̍taste̱yaṃ jane̍:

337.9

ye tvā̍ kṛ̱tvā'le̍bhi̱re vi̱dva̱lā a̍bhi̱cāriṇa̍ḥ
śa̱mbhī̱ruda̍ṃ kṛtyā̱dūṣa̍ṇaṃ prati̱vartma̱ puna̍ḥsaraṃ tena̍ tvā snapayāmasi

337.10

yaddu̱rbhagā̍ṃ pra̱snapi̍tāṃ mṛ̱tava̍tsā̱mupai̍yima
apai̍tu̱ sarva̱ṃ matpā̱paṃ dravi̍ṇaṃ mopa̍ tiṣṭhatu

337.11

yattai̍ pi̱tṛbhyo̱ dada̍to ya̱jñe vā̱ nāma̍ jagṛ̱huḥ
sa̱ṃde̱śyā̍1̱tsarva̍smātpā̱pādi̱mā mu̍ñcantu tvauṣa̍dhīḥ

337.12

daivai̍na̱sātpi̱tryā̍nnāma̱grāhā̍tsaṃde̱śyā̍da̱bhini̍ṣkṛtāt
muñca̍ntu tvā vī̱rudho̍ vī̱rye̍ṇa̱ brahma̍ṇā̱ ṛgbhi̱ḥ paya̍sa̱ ṛṣī̍ṇām

337.13

yathā̱ vāta̍ścyā̱vaya̍ti̱ bhūmyā̍ re̱ṇuma̱ntari̍kṣāccā̱bhram
e̱vā matsarva̍ṃ durbhū̱taṃ brahma̍nuttamapā̍yati

337.14

apa̍ krāma nārnadatī vine̍ddhā ga̱rda̱bhīva̍
kṛ̱tsnairṛkṣa̍vateto nu̱ttā brahma̍ṇā vī̱ryā̍vatā

337.15

a̱yaṃ panthā̍ḥ kṛtye̱ti tvā nayāmo̱bhiprahi̍tā̱ṃ prati̍ tvā̱ pra hi̍ṇmaḥ
tenā̱bhi yā̍hi bhañja̱tyana̍svatīva vā̱hinī̍ vi̱śvarū̍pā kuruṭinī̍

337.16

parā̍kte̱ jyoti̱rapa̍thaṃ te a̱rvāggnyatrā̱smada̍yanā kṛṇuṣva
pare̍ṇehi nava̱tiṃ nā̱vyā̍3̱ ati̍ du̱rgāḥ srotyā̱ mā kṣa̍ṇiṣṭhāḥ pare̍hi

337.17

vāta̍ iva vṛ̱kṣānpri̍ mṛṇīhi pāta̱ya mā gāmaśva̱ṃ puru̍ṣa̱mucchi̍ṣa eṣām
kṛ̱tsnairnivṛ̱tyeta̍ḥ kṛtye̱prajā̱stvāya̍ bodhaya

337.18

yāṃ te̍ ba̱rhiṣi̱ yāṃ śma̍śāne̱ kṣetre̍ kṛtyāṃ va̍lu̱gaṃ vā̍ ni̱cakhnuḥ
a̱gnau vā̍ tvā̱ gārha̍patyebhice̱ruḥ pāka̱ṃ santa̍ṃ dhīra̍tarā anā̱gasa̍ṃm

337.19

u̱pāhṛ̍ta̱manu̍buddhaṃ nikhā̍taṃ vairai̍ tsārya̱nvavi̍dāma̱ katra̍m
tade̍tu̱ yata̱ ābhṛ̍taṃ tatrāśva̍ iva̱ vi va̍rtatāṃ hantu̍ kṛtyā̱kṛta̍ḥ pra̱jām

337.20

svāya̍sā asa̱ya̍ḥ santi no gṛ̱he vi̱dmā te̍ kṛtye yati̱dhā parū̍ṃṣi
utti̍ṣṭheva̱ parai̍hīto'jñā̍te kima̱iheccha̍si

337.21

grī̱vāste̍ kṛtye pādau̍ cāpi̍ ka̱rtsyāmi̱ nirdra̍va
indrā̱gnī a̱smānra̍kṣatāṃ yau pra̱jānā̍ṃ pra̱jāva̍tī

337.22

somo̱ rājā̍dhipā mṛ̍ḍi̱tā ca̱ bhūtasya̍ na̱ḥ pata̍yo mṛḍayantu

337.23

bha̱vāśa̱rvāva̍syatāṃ pā̱pakṛ̱te̍ kṛtyā̱kṛte̍ | du̱ṣkṛ̱te vi̱dyuta̍ṃ de̱vahe̍tim

337.24

yadye̱yartha̍ dvi̱padī̱ catu̍ṣpadī̱ kṛtyā̍kṛtā̱ saṃbhṛ̍tā vi̱śvarū̍pā
seto̱'ṣṭāpa̍dī bhū̱tvā puna̱ḥ pare̍hi du̱cchune̍

337.25

a̱bhya̍ktā̱ktā sva̍raṃkṛtā̱ sarva̱ṃ bhara̍ntī du̱ritaṃ pare̍hi
jā̱nī̱hi kṛ̍tye ka̱rtāra̍ṃ duhi̱teva̍ pi̱tara̱ṃ svam

337.26

pare̍hi kṛtye̱ mā ti̍ṣṭho vi̱ddhasyeva̍ pa̱daṃ na̍ya
mṛ̱gaḥ sa mṛ̍gayu̱stvaṃ na tvā̱ nirka̍rtumaha̍ti

337.27

u̱ta ha̍nti pū̱rvāsina̍ṃ pratyā̱dāyāpa̍ra̱ iṣvā̍
u̱ta pūrva̍sya ni̱ghnato̱ ni ha̍ntyapa̍raḥ prati̍

337.28

e̱taddhi śṛṇu me̱ vacothe̍hi̱ yata̱ eya̍rtha | yastvā̍ ca̱kāra̱ taṃ prati̍

337.29

a̱nā̱go̱hatyā̱ vai bhī̱mā kṛ̍tye̱ mā no̱ gāmaśva̱ṃ puru̍ṣaṃ vadhīḥ
yatra̍yatrāsi̱ nihi̍tā̱ tata̍stvotthā̍payāmasi pa̱rṇālludhī̍yasī bhava

337.30

yadi̍ stha tama̱sāvṛ̍tā̱ jāle̍nā̱bhihi̍tā iva
sarvā̍ḥ saṃlupye̱taḥ kṛtyā̱ḥ puna̍ḥ ka̱rtre pra hi̍ṇmasi

337.31

kṛ̱tyā̱kṛtau̍ vala̱gino̍'bhiniṣkā̱riṇa̍ḥ pra̱jām
mṛ̱ṇī̱hi kṛ̍tye̱ mocchi̍ṣo̱mūnkṛ̍tyākṛ̱to ja̍hi

337.32

yathā̱ sūryo̍ mu̱cyate̱ tama̍sa̱spari̱ rātri̍ṃ jahā̱tyuṣasa̍śca ke̱tūn
e̱vāhaṃ sarva̍ṃ du̱rbhūta̱ṃ kartra̍ṃ kṛtyā̱kṛtā̍ kṛ̱taṃ hastau̍va̱ rajo̍ du̱ritaṃ ja̍hāmi

Linked texts (6)