Pramāṇa · Search · About · API

Angirasi 338

Aṅgirasī 338

Language
Sanskrit

338.1

kene̱ pāṣṇī̱ ābhṛ̍te̱ pūru̍ṣasya̱ kena̍ mā̱ṃsaṃ saṃbhṛ̍ta̱ṃ kena̱ gulphau̍
kenā̱ṅgulī̱ḥ peśa̍nī̱ḥ kena̱ khāni̱ keno̍cchla̱ṅkau ma̍dhya̱taḥ kaḥ pra̍ti̱ṣṭhām

338.2

kasmā̱nnu gu̱lphāvadha̍rāvakṛṇvanna̱ṣṭhīva̍ntā̱vutta̍rau̱ pūru̍ṣasya
jaṅghe̱ nirṛtya̱ nya̍dadhu̱ḥ kva̍ svijjā̱nu̱noḥ saṃdhī̱ ka u̱ tacci̍keta

338.3

catu̍ṣṭayaṃ yujyate̱ saṃhi̍tānta̱ṃ jānu̍bhyāmū̱rdhvaṃ śi̍thi̱raṃ ka̱bandha̍m
śroṇī̱ yadū̱rū ka u̱ tarja̍jāna̱ yābhyā̱ṃ kusi̍ndhaṃ su̱dṛḍhaṃ ba̱bhūva̍

338.4

kati̍ de̱vāḥ ka̍ta̱me ta ā̍saṉ ya uro̍ grī̱vāścikyuḥ pūru̍ṣasya
kati̱ stanau̱ vya̍dadhuḥ kaḥ ka̍pho̱ḍau kati̍ ska̱ndhānkati̍ pṛ̱ṣṭīra̍cinvan

338.5

ko a̍sya bā̱hū sama̍bharadvī̱rya̱ṃ karavā̱diti̍
aṃsau̱ ko a̍sya̱ taddeva̱ḥ kusi̍ndhe̱ adhyā da̍dhau

338.6

kaḥ sa̱pta khāni̱ vi ta̍tarda śī̱rṣaṇi̱ karṇā̍vi̱mau nāsi̍ke̱ cakṣa̍ṇī̱ mukha̍m
yeṣā̍ṃ puru̱trā vi̱jaya̍sya ma̱hyani̱ catu̍ṣpādo dvi̱pado̱ yanti̱ yāma̍m

338.7

hanvo̱rhi ji̱hvāmada̍dhātpurū̱cīmadhā̍ ma̱hīmadhi̍ śi̱śrāya̱ vāca̍m
sa ā va̍rīvarti̱ bhuva̍neṣva̱ntara̱po vasā̍na̱ḥ ka u̱ tacci̍keta

338.8

ma̱sti̱ṣka̍masya yata̱mo la̱lāṭa̍ṃ ka̱kāṭi̍kāṃ pratha̱mo yaḥ ka̱pāla̍m
ci̱tvā citya̱ṃ hanvo̱ḥ pūru̍ṣasya di̱vaṃ ruroha kata̱maḥ sa de̱vaḥ

338.9

pri̱yāpri̱yāṇi̍ bahu̱lā svapna̱ṃ saṃbā̱dhatandrya̍ḥ
āna̱ndānu̱gro nandā̍m̐śca̱ kasmā̍dvahati̱ pūru̍ṣaḥ

338.10

ārti̱rarti̱rnirṛ̍ti̱ḥ kuto̱ nu puru̍ṣema̱tiḥ
rāddhi̱ḥ samṛ̍ddhiravyṛddhirma̱tirudi̍taya̱ḥ kuta̍ḥ

338.11

ko a̍sminnāpo̱ vyada̍dhādviṣu̱vṛtta̍ḥ puru̱vṛta̍ḥ sindhusṛ̱tyā̍ya jā̱tāḥ
tī̱vrā a̍ru̱ṇā lohi̍nīstāmradhūmrā ū̱rdhvā a̍vā̱cīḥ puru̍ṣe tira̱ścīḥ

338.12

ko a̍smin rūpa̱mada̍dhā̱tko ma̱hmāna̍ṃ ca̱ nāma̍ ca
gā̱tuṃ ko a̍sminkaḥ ke̱tuṃ kaśca̱ritrā̍ṇi̱ pūru̍ṣe

338.13

ko a̍sminprā̱ṇama̍vaya̱tko a̍pā̱naṃ vyā̱namu̍
sa̱mā̱nama̍sminko de̱vodhi̍ śi̱śrāya̱ pūru̍ṣe

338.14

ko a̍sminya̱jñamada̍dhāde̱ko de̱vodhi̍ pūru̍ṣe
ko a̍sminsa̱tyaṃ ko'nṛ̍ta̱ṃ kuto̍ mṛ̱tyuḥ kuto̱'mṛta̍m

338.15

ko a̍smai̱ vāsa̱ḥ parya̍dadhā̱tko a̱syāyu̍rakalpayat
bala̱ṃ ko a̍smai̱ prāya̍ccha̱tko a̍syākalpayajja̱vam

338.16

kenā̱po anva̍tanuta̱ kenāha̍rakarodvu̱ce
u̱ṣasa̱ṃ kenānvai̍ndha̱ kena̍ sāya̱ṃbhava̍ṃ dade

338.17

ko a̍smi̱nreto̱ nyada̍dhā̱ttantu̍rā tā̍yatā̱miti̍
me̱dhāṃ ko a̍smi̱nnadhyau̍ha̱tko bā̱ṇaṃ ko nṛ̱to da̍dhau

338.18

kene̱māṃ bhūmi̱maurṇo̱tken parya̍bhavaddiva̍m
kenā̱bhi ma̱hnā parva̍tā̱nken karmā̍ṇi pūru̍ṣaḥ

338.19

kerna pa̱rjanya̱manve̍ti ken soma̍ṃ vicakṣaṇam
kene̍ ya̱jñaṃ ca̍ śra̱ddhāṃ ca̱ kenā̍smi̱nnihi̍ta̱ṃ mana̍ḥ

338.20

ken śrotriya̱māpno̍ti̱ kene̱maṃ pa̍rame̱ṣṭhina̍m
kene̱mama̱gniṃ pūru̍ṣa̱ḥ kerna sa̍ṃvatsa̱raṃ ma̍me

338.21

brahma̱ śrotriya̱māpno̍ti̱ brahma̍maṃ pa̍rame̱ṣṭhina̍m
brahma̍mama̱gniṃ pūru̍ṣo̱ brahma̍ sa̍ṃvatsa̱raṃ ma̍me

338.22

kene̍ de̱vām̐ anu̍ kṣiyati̱ ken dairvajanī̱rviśa̍ḥ
kene̱damanya̱nnakṣa̍tra̱ṃ kena̍ sa̱tkṣatra̱mucya̍te

338.23

brahma̍ de̱vām̐ anu̍ kṣiyati̱ brahma̍ dairvajanī̱rviśa̍ḥ
brahme̱damanya̱nnakṣa̍tra̱ṃ brahma̍ sa̱tkṣatra̱mucya̍te

338.24

kene̱yaṃ bhūmi̱rvihi̍tā̱ kena̱ dyaurutta̍rā hi̱tā
kene̱damū̱rdhvaṃ ti̱ryakcā̱ntari̍kṣaṃ vyaco̍ hi̱tam

338.25

brahma̍ṇā̱ bhūmi̱rvihi̍tā̱ brahma̱ dyaurutta̍rā hi̱tā
brahme̱damū̱rdhvaṃ ti̱ryakcā̱ntari̍kṣaṃ vyaco̍ hi̱tam

338.26

mūrdhāna̍masya saṃsī̱vyātha̍rvā̱ hṛda̍yaṃ ca̱ yat
ma̱sti̱ṣkādū̱rdhvaḥ praire̍yatpava̍mānodhi̱ śīrṣa̍taḥ

338.27

tadvā atha̍rvaṇa̱ḥ śiro̍ de̱vako̱śaḥ samu̍bjitaḥ
tatprā̱ṇo a̱bhi ra̍kṣati̱ śiro̱ anna̱matho̱ mana̍ḥ

338.28

ū̱rdhvo nu sṛ̱ṣṭā3sti̱ryaṅ nu sṛ̱ṣṭā3ḥ sarvā̱ diśa̍ḥ puru̍ṣa ā ba̍bhū̱vām̐3
pura̱ṃ yo brahma̍ṇo ve̱da yasyā̍ḥ puru̍ṣa u̱cyate̍

338.29

yo vai tāṃ brahma̍ṇo ve̱dāmṛte̍nāvṛ̱tāṃ pura̍m
tasmai̱ brahma̍ ca brāhmā̱śca cakṣu̍ḥ prā̱ṇaṃ pra̱jāṃ da̍duḥ

338.30

na vai taṃ cakṣu̍rjahāti̱ na prā̱ṇo ja̱rasa̍ḥ pu̱rā
pura̱ṃ yo brahma̍ṇo ve̱da yasyā̍ḥ puru̍ṣa u̱cyate̍

338.31

a̱ṣṭāca̍krā nava̍dvārā de̱vānā̱ṃ pūra̍yo̱dhyā
tasyā̍m̐ hira̱ṇyaya̍ḥ kośa̍ḥ sva̱rgo jyoti̱ṣāvṛ̍taḥ

338.32

tasmi̍nhiraṇya̱ye ko̱śe trya̍re̱ tripra̍tiṣṭhite
tasmi̍nyadyakṣa̱mātma̱nvattadvai bra̍hma̱vido̍ viduḥ

338.33

pra̱bhrāja̍mānāṃ hari̍ṇīṃ yaśa̍sā̱ saṃ parī̍vṛtām
pura̱ṃ hira̍ṇyayīṃ bra̱hmā vi̱veśāpa̍rājitām

Linked texts (6)