Pramāṇa · Search · About · API

Angirasi 343

Aṅgirasī 343

Language
Sanskrit

343.1

a̱ghāya̱tāmapi̍ nahyā murkhāni sa̱panne̍ṣu vajra̱marpa̍yaitam
indre̍ṇa du̱ttā pratha̱mā śa̱tauda̍nā bhrātṛvya̱ghnī yaja̍mānasya gā̱tuḥ

343.2

vedi̍ṣṭe carma̍ bhavatu barhirlomā̍ni̱ yāni̍ te
e̱ṣā tvā̍ raśa̱nābhya̍bhīdbhāvā̍ tvaiṣodhi̍ nṛtyutu

343.3

bālā̍ste prokṣa̍ṇīḥ santu ji̱hvā saṃ mā̍rṣṭva̱ghye
śuddhā tvaṃ ya̱jñiyā̍ bhūtvā diva̱ṃ prehi̍ śataudane

343.4

yaḥ śa̱tauda̍nāṃ paca̍ti kāma̱preṇa̍ sa ka̍lpate
prītā hya̍sya̱rtvija̱ḥ sarve̍ yanti̱ yathāya̱tham

343.5

sa sva̱rgamā ro̍hati ya̱trāda̱kṣidi̱vaṃ diva̍ḥ
apū̍panā̍bhiṃ kṛ̱tvā yo dadā̍ti śatauda̍nām

343.6

sa tāṃllo̱kāntsamā̍pnoti̱ ye di̱vyā ye ca̱ pārthi̍vāḥ
hira̍ṇya̱jyoti̍ṣaṃ kṛ̱tvā yo dadā̍ti śatauda̍nām

343.7

ye ta̍ de̱vi śa̱mitāra̍ḥ pa̱ktāro̍ ye ca̍ te̱ janā̍ḥ
te tvā̱ sarve̍ gopsyanti̱ maibhyo̍ bhaiṣīḥ śataudane

343.8

vasa̍vastvā dakṣi̱ṇata̱ uttarā̍nma̱ruta̍stvā
ā̱dityā̍ḥ pa̱ścādgo̍psyanti̱ sāgni̱ṣṭomamati̍ drava

343.9

de̱vāḥ pi̱taro̍ manu̱ṣyā̍ gandharvā̱psa̱rasa̍śca ye
te tvā̱ sarve̍ gopsyanti̱ sāti̍rā̱tramati̍ drava

343.10

a̱ntari̍kṣa̱ṃ diva̱ṃ bhūmi̍mādi̱tyānma̱ruto̱ diśa̍ḥ
lo̱kāntsa sarvā̍nāpnoti̱ yo dadā̍ti śatauda̍nām

343.11

ghṛ̱taṃ prokṣa̍ntī su̱bhagā̍ de̱vī de̱vānga̍miṣyati
pa̱ktāra̍ma̱dye mā hi̍ṃsīrdi̱vaṃ prehi̍ śataudane

343.12

ye de̱vā di̱viṣado̍ antari̱kṣasada̍śca̱ ye ye ce̱me bhūmyā̱madhi̍
tebhya̱stvaṃ dhu̍kṣva sa̱rvadā̱ kṣī̱raṃ sa̱rpiratho̱ madhu̍

343.13

yatte̱ śiro̱ yatte̱ mukha̱ṃ yau karṇau̍ ye ca̍ te̱ hanū̍
ā̱mikṣā̍ṃ duhratāṃ dā̱tre kṣī̱raṃ sa̱rpiratho̱ madhu̍

343.14

yau ta̱ oṣṭhau̍ ye nāsi̍ke̱ ye śṛṅge̱ ye ca̍ te̱kṣiṇī̍
ā̱mikṣā̍ṃ duhratāṃ dā̱tre kṣī̱raṃ sa̱rpiratho̱ madhu̍

343.15

yattai̱ klomā̱ yaddhṛda̍yaṃ pu̱rītatsa̱harka̍ṇṭhikā
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.16

yattai̱ yakṛ̍dye ma̱ta̍sne̱ yadāntra̱ṃ yāśca̍ te gu̱dāḥ
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.17

yastai̍ plī̱śirryo va̍ni̱ṣṭhuryau ku̱kṣī yacca̱ carma̍ te
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.18

yattai̍ ma̱jñā yada̍sthi̱ yanmā̱ṃsaṃ yacca̱ lohi̍tam
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.19

yau tai̍ bā̱hū ye do̱ṣaṇī̱ yāva̍ṃsau̱ yā ca̍ te ka̱kut
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.20

yāstai̍ grī̱vā ye ska̱ndhā yāḥ pṛ̱ṣṭīryāśca̱ parśa̍vaḥ
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.21

yau ta̍ ū̱rū a̍ṣṭhī̱vantau̱ ye śroṇī̱ yā ca̍ te bha̱sat
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.22

yattai̱ puccha̱ṃ ye te̱ bālā̱ yadūdho̱ ye ca̍ te stanā̍ḥ
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.23

yāstai̱ jaṅghā̱ yāḥ ku̱ṣṭhikā ṛ̱cchurā̱ ye ca̍ te śa̱phāḥ
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.24

yattai̱ carma̍ śatauda̱ne yāni̱ lomā̍nya̱ddhaye̍
ā̱mikṣā̍ṃ duhatāṃ dā̱tre kṣī̱raṃ sa̱rpiratho̱ madhu̍

343.25

kro̱ḍau tai stāṃ pu̱roḍā̱śāvājye̍nā̱bhighā̍ritau
tau pa̱kṣau de̍vi kṛ̱tvā sā pa̱ktāra̍ṃ di̱vaṃ va̍ha

343.26

u̱lūkha̍le musa̍le̱ yaśca̱ carma̍ṇi̱ yo vā̱ śūrpe̍ taṇḍu̱laḥ kaṇa̍ḥ
yaṃ vā̱ vāto̍ mā̱tari̍śvā pava̍māno̱ mamāthā̍mi̱ṣṭdotā̱ suhu̍taṃ kṛṇotu

343.27

a̱po de̱vīrmadhu̍matīrghṛ̱taścuto̱ brahma̍ṇā̱ṃ haste̍ṣu̱ prapṛ̱thaksā̍dayāmi
yatkā̍ma i̱dama̍bhiṣi̱ñcāmi̍ vo̱haṃ tanme̱ sarva̱ṃ saṃ pa̍dyatāṃ va̱yaṃ syāma̱ pata̍yo rayī̱ṇām

Linked texts (2)