Pramāṇa · Search · About · API

Angirasi 345

Aṅgirasī 345

Language
Sanskrit

345.1

agne̍ jāya̱svādi̍ti̱rnādhi̍te̱yaṃ brahmauda̍na̱ṃ paca̍ti pu̱trakā̍mā
sa̱pta̱ṛṣayo̍ bhūta̱kṛta̱ste tvā̍ manthantu pra̱jayā̱ sahe̱ha

345.2

kṛ̱ṇu̱ta dhūma̱ṃ vṛṣa̍ṇaḥ sakhāyo̱droghā̍vittā vā̱camaccha̍
a̱yama̱gniḥ pṛta̍nāṣāṭ su̱vīro̱ yena̍ de̱vā asaha̍nta̱ dasyū̍n

345.3

agne'ja̍niṣṭhā ma̱hate vī̱ryā̍ya̱ brahmauda̍nāya̱ pakta̍ve jātavedaḥ
sa̱pta̱ṛṣayo̍ bhūta̱kṛta̱ste tvā̍jījana̱nnasmai̍ ra̱yiṃ sarva̍vīra̱ṃ ni ya̍ccha

345.4

sami̍ddho agne̱ sami̍dhā̱ sami̍dhyasva vi̱dvānde̱vānya̱jñiyā̍m̐ e̱ha va̍kṣaḥ
tebhyo̍ ha̱viḥ śrapa̍yaṃ jātaveda utta̱maṃ nāka̱madhi̍ rohaye̱mam

345.5

tre̱dhā bhā̱go nihi̍to yaḥ pu̱rā vo̍ de̱vānā̍ṃ pi̱tṝṇāṃ martyā̍nām
aṃśā̍ñjānī̱dhvaṃ vi bha̍jā̱mi tā̱nvo yo de̱vānā̱ṃ sa i̱māṃ pāra̍yāti

345.6

agne̱ saha̍svānabhi̱bhūra̍bhī̱da̍si nī̱co nyu̍bja dviṣa̱taḥ sa̱patnā̍n
i̱yaṃ mātrā̍ mīya̱mānā̱ mitā̍ ca sa̱jā̱tāṃste̍ ba̱lihṛta̍ḥ kṛṇotu

345.7

sā̱kaṃ sa̱ṃjātai̱ḥ paya̍sā sa̱haidhyudba̍lai̱nāṃ ma̱hate vī̱ryā̍ya
ū̱rdhvo nāka̱syādhi̍ roha vi̱ṣṭapa̍ṃ sva̱rgo lo̱ka iti̱ yaṃ vada̍nti

345.8

i̱yaṃ ma̱hī prati̍ gṛhṇātu̱ carma̍ pṛthi̱vī de̱vī su̍mana̱syamā̍nā
atha̍ gacchema su̱kṛta̍sya lo̱kam

345.9

e̱tau grāvā̍ṇau sa̱yujā̍ yu̱ṅkti carma̍ṇi nirbhi̱ndhya̍śūṉyaja̍mānāya sā̱dhu
ava̍ghnatī ni ja̍hi̱ ya i̱māṃ pṛta̱nyava̍ ū̱rdhvaṃ pra̱jāmuddha̍rantyudūha̍

345.10

gṛ̱hāṇa̱ grāvā̍ṇau sukṛ̱tau vī̱ra hasta̱ ā te̍ de̱vā ya̱jñiyā̍ ya̱jñama̍ṃguḥ
trayo̱ varā̍ ya̱tmāṃstvaṃ vṛṇī̱ṣe tāste̱ samṛ̍ddhīri̱ha rā̍dhayāmi

345.11

i̱yaṃ te̍ dhī̱tiri̱damu̍ te̱ jani̱traṃ gṛ̱hṇātu̍ tvāmadi̍tiḥ śūra̍putrā
parā̍ punīhi̱ ya i̱māṃ pṛta̱nyavo̱syai ra̱yiṃ sa̱rvavī̍ra̱ṃ ni ya̍ccha

345.12

upa̍śvase druva̱ye̍ sīdatā yū̱yaṃ vi vi̍ñcyadhvaṃ ya̱jñiyā̱sastuṣai̍ḥ
śriyā samā̱nānati̱ sarvā̍ntsyāmādha̱spada̍ṃ dviṣa̱taspā̍dayāmi

345.13

pare̍hi̱ nāri̱ puna̱rehi̍ kṣi̱prama̱pāṃ tvā̍ go̱ṣṭho'dhya̍rukṣadvarā̍ya
tāsā̍ṃ gṛhītādya̱tamā ya̱jñiyā̱ asa̱nvibhā̱jya̍ṃ dhīrī̱tarā̍ jahītāt

345.14

e̱mā a̍gu̱ryoṣi̍taḥ śumbha̍mānā̱ utti̍ṣṭha nāri̱ tvapa̍saṃ rabhasva
su̱patnī̱ patyā̍ pra̱jayā̍ pra̱jāva̱tyā tvā̍ga̱nya̱jñaḥ prati̍ ku̱mbhaṃ gṛ̍bhāya

345.15

ū̱rjo bhā̱go nihi̍to̱ yaḥ pu̱rā va̱ ṛṣi̍praśiṣṭa̱āpa ā bha̍rai̱tāḥ
a̱yaṃ ya̱jño gā̱tuvi̍nnā̍thavi̱tprajā̍vidu̱graḥ pa̍śu̱vidvī̱ravi̱dbho a̍stu

345.16

a̱gne ca̱rurya̱jñiya̱stvādhya̍rukṣa̱cchuci̱stapi̍ṣṭhastapa̍sā tapainam
ā̱rṣeyā̱ daivā̱ abhi̱saṃga̍tya bhā̱gami̱maṃ ta̍piṣṭhā ṛ̱tubhi̍stapantu

345.17

śu̱ddhāḥ pū̱tā yoṣi̍tau ya̱jñiyā̍ i̱mā āpa̍śca̱rumava̍ sarpantu śu̱bhrāḥ
adu̍ḥ pra̱jāṃ ba̍hu̱lānpa̱śūnna̍ḥ pa̱ktauda̱nasya̍ sukṛ̱tāme̍tu lo̱kam

345.18

brahma̍ṇā śu̱ddhā u̱ta pū̱tā ghṛ̱tena̱ soma̍syā̱ṃśava̱staṇḍu̍lā ya̱jñiyā̍ i̱me
apa̱ḥ pra vi̍śatu prati̍ gṛhṇātu va̱ścaru̍ri̱maṃ pa̱ktvā sukṛ̱tāme̍ta lo̱kam

345.19

u̱ruḥ pra̍thasva maha̱tā ma̍hi̱mnā sa̱hasra̍pṛṣṭhaḥ sukṛ̱tasya̍ lo̱ke
pi̱tāma̱hāḥ pi̱tara̍ḥ prajo̱pajā̱haṃ pa̱ktā pa̍ñcada̱śastai a̍smi

345.20

sa̱hasra̍pṛṣṭhaḥ śa̱tadhā̍ro̱ akṣi̍to̱ brahmauda̱no de̍va̱yāna̍ḥ sva̱rgaḥ
a̱mūṃsta ā da̍dhāmi pra̱jayā̍ṃ re̱ṣayai̱nānva̍lihā̱rāya̍ mṛḍatānmahya̍meva

345.21

u̱ddehi̱ vedi̍ṃ pra̱jayā̍ vardhayai̱nāṃ nu̱dasva̱ rakṣa̱ḥ pratara̱ṃ dhehye̍nām
śriyā samā̱nānati̱ sarvā̍ntsyāmādha̱spada̍ṃ dviṣa̱taspā̍dayāmi

345.22

a̱bhyāva̍rtasva pa̱śubhi̍ḥ sa̱hainā̍ṃ pratya̱ṅṅenā̍ṃ de̱vatā̍bhi̱ḥ sa̱haidhi̍
mā tvā̱ prāpa̍ñchupatho̱ mābhi̍cāra̱ḥ sve kṣe̱tre a̍namī̱vā vi rāja̍

345.23

ṛ̱tena̍ ta̱ṣṭā mana̍sā hi̱taiṣā brahmau̍dana̱sya vihi̍tā̱ vedi̱ragre̍
aṃsa̍dvrīṃ śu̱ddhāmupa̍ dhehi nāri̱ tatrauda̱naṃ sā̍daya̱ daivaunām

345.24

adi̍te̱rhastā̍ṃ su̱rcame̱tāṃ dvi̱tīyā̍ṃ sa̱ptaṛṣa̍yo bhūta̱kṛto̱ yāmakṛ̍ṇvan
sā gātrā̍ṇi vi̱duṣyoda̍nasya̱ davi̍rve̱dyāma̱dhyena̍ cinotu

345.25

śṛtaṃ tvā̍ ha̱vyamupa̍ sīdantu de̱vā niḥsṛ̍pyā̱gneḥ puna̱renā̱npra sī̍da
somena̍ pū̱to ja̱ṭhare̍ sīda̱ brahma̍ṇā̱marṣe̍yā̱ste mā ri̍ṣanprāśi̱tāra̍ḥ

345.26

soma̍ rāja̱ntsaṃjñā̍namā va̍pai̱bhyaḥ su̱trāhma̍ṇā ya̱tame̱ tvopa̍sī̱dān
ṛṣī̍nā̱rṣeyā̱ṃstapa̍sodhi̱ jātā̱nbrahmau̍dane su̱havā̱ joha̍vīmi

345.27

śu̱ddhāḥ pū̱tā yo̱ṣito̍ ya̱jñiyā̍ i̱mā brahma̍ṇāṃ hasteṃṣu̱ prapṛ̱thaksā̍dayāmi
yatkāṃma i̱dama̍bhiṣi̱ñcāmi̍ vo̱hamindro̍ ma̱rutvā̱ntsa da̍dātvi̱daṃ me̍

345.28

i̱daṃ me̱ jyoti̍ra̱mṛta̱ṃ hira̍ṇyaṃ pa̱kvaṃ kṣetrā̍tkāmu̱dho ma e̱ṣā
i̱daṃ dhana̱ṃ ni da̍dhe brā̱hmaṇe̍ṣu kṛ̱ṇve panthā̍ṃ pi̱tṛṣu̱ yaḥ svarga̍ḥ

345.29

a̱gnau tuṣā̍nā va̍pa jā̱tave̍dasi̱ para̍ḥ ku̱mbūkā̍m̐ apa̍ mṛḍḍhi dū̱ram
e̱taṃ śu̍śruma gṛha̱rāja̍sya̱ bhāga̱matho̍ vi̱dma nirṛ̍terbhāga̱dheya̍m

345.30

śrā̱myata̱: paca̍to vi̱ddhi su̱nvata̱ḥ panthā̍ṃ sva̱rgamadhi̍ rohayainam
yena̱ rohā̱tpara̍mā̱padya̱ yadya̍ utta̱maṃ nāka̍ṃ para̱maṃ vyo̍ma

345.31

ba̱bhrera̍dha̱rvo su̱ruca̍metaddhi mṛḍḍhyā̱jyāya̍ lo̱kaṃ kṛ̍ṇuhi pravi̱dvān
ghṛ̱tena̱ gātrā̍nu̱ sarvā̍ vi mṛ̍ṅgdhi kṛ̱ṇve panthā̍ṃ pi̱tṛṣu̱ yaḥ svarga̍ḥ

345.32

ba̱bhre rakṣa̍ḥ sama̱dumā va̍pai̱bhyotrā̍hma̱ṇā ya̱tame̱ tvopa̍sī̱dān
pu̱rī̱ṣiṇa̍: pratha̍mānāḥ pu̱rastā̍dā̱rṣeyā̱ste mā ri̍ṣanprāśi̱tāra̍ḥ

345.33

ā̱rṣeye̍ṣu̱ ni da̍dha oda̱na tvā̱ nānā̍rṣeyā̱ṇāmapya̱styatra̍
a̱gnirme̍ go̱ptā ma̱ruta̍śca̱ sarve̱ viśve̍ de̱vā a̱bhi ra̍kṣantu pa̱kvam

345.34

ya̱jñaṃ duhā̍naṃ sada̱mitprapī̍na̱ṃ pumā̍ṃsaṃ dhe̱nuṃ sada̍naṃ rayī̱ṇām
pra̱jāmṛ̱tatva̱muta dī̱rghamāyu̍: rā̱yaśca̱ poṣai̱rupa̍ tvā sadema

345.35

vṛ̱ṣabho̱'si sva̱rga ṛṣī̍nā̱rṣeyā̱ngaccha̍
su̱kṛtā̍ṃ lo̱ke sī̍da̱ tatra̍ nau̱ saṃskṛ̱tam

345.36

samācinuṣvānusaṃprayā̍hya̱me pa̱thaḥ ka̍lpaya de̱vayānā̍n
e̱taiḥ su̍kṛ̱tairanu̍ gacchema ya̱jñaṃ nāke̍ ti̱ṣṭhanta̱madhi̍ sa̱ptara̍śmau

345.37

yene̍ de̱vā jyoti̍ṣā̱ dyāmudāya̍nnabrahmauda̱naṃ pa̱ktvā su̍kṛ̱tasya̍ lo̱kam
tene̍ geṣma sukṛ̱tasya̍ lo̱kaṃ svarśi̍roha̍nto a̱bhi nāka̍mutta̱mam

Linked texts (4)