Pramāṇa · Search · About · API

Angirasi 346

Aṅgirasī 346

Language
Sanskrit

346.1

bhavā̍śa̱rvau mṛ̱ḍata̱ṃ mābhi yā̍taṃ bhūta̍patī paśupa̍tī̱ namo̍ vām
prati̍hitā̱mārya̍ta̱ṃ mā vi srā̍ṣṭa̱ṃ mā nau̍ hiṃsiṣṭaṃ dvi̱pado̱ mā catu̍ṣpadaḥ

346.2

śune̍ kro̱ṣṭre mā śarī̍rāṇi ka̱rtamalikla̍vebhyo gṛ̱dhrebhyo̱ ye ca̍ kṛ̱ṣṇā a̍vi̱ṣyava̍ḥ
makṣi̍kāste paśupate va̱yāṃsi̍ te vi̱ghase̱ mā vi̍danta

346.3

kra̱ndāya̍ te prā̱ṇāya̱ yāśca̍ te bha̱va roṣa̍yaḥ | nama̍ste rudra kṛṇmaḥ sahasrā̱kṣāyāma̍rtya

346.4

pura̱stā̍tte̱ nama̍ḥ kṛṇma uttarā̱dadha̍rādu̱ta | a̱bhīva̱rgāddi̱vaspa̱rya̱ntari̍kṣāya te̱ nama̍ḥ

346.5

mukhā̍ya te paśupate̱ yāni̱ cakṣū̍ṃṣi te bhava | tvace̍ rū̱pāya̍ sa̱ṃdṛśe̍ pratī̱cīnā̍ya te̱ nama̍ḥ

346.6

aṅge̍bhyasta̱ uda̍rāya ji̱hvāyā̍ ā̱syā̍ya te | da̱dbhyo ga̱ndhāya̍ te̱ nama̍ḥ

346.7

a̱strā nīla̍śikhaṇḍena sahasrā̱kṣeṇa̍ vā̱jinā̍| ru̱dreṇā̍rdhakaghā̱tinā̱ tena̍ mā sama̍rāmahi

346.8

sa no̍ bha̱vaḥ pari̍ vṛṇaktu vi̱śvata̱ āpa̍ ivā̱gniḥ pari̍ vṛṇaktu no bha̱vaḥ
mā no̱bhi māṃsta̱ namo̍ a̱stvasmai̍

346.9

ca̱turnamo̍ a̱ṣṭakṛtvo̍ bha̱vāya̱ daśa̍ kṛtvaḥ paśupate̱ nama̍ste
tave̱me pañca̍ pa̱śavo̱ vibha̍ktā̱ gāvo̱ aśvā̱ḥ puru̍ṣā a̱jāvaya̍ḥ

346.10

tava̍ cata̍sraḥ pra̱diśa̱stava̱ dyaustava̍ pṛthi̱vī tave̱damu̱grorva1ntari̍kṣam
tave̱daṃ sarva̍mā̱tmanva̱dyatprāṇa̱tpṛthi̱vīmanu̍

346.11

u̱ruḥ ko̱śo̍ vasu̱dhāna̱stavā̱yaṃ yasmi̍nni̱mā viśvā̱ bhuva̍nānya̱ntaḥ
sa no̍ mṛḍa paśupate̱ nama̍ste puraḥ kro̱ṣṭāro̍ abhi̱bhāḥ śvāna̍ḥ pu̱ro ya̍ntvagha̱rudo̱ vike̱śya1ḥ

346.12

dhanurbibha̍rṣi hari̍taṃ hira̱ṇyaya̍ṃ sahasra̱ghniṃ śa̱tava̍dhaṃ śikhaṇḍinam
ru̱drasyeṣu̍ścarati de̱vahe̍ti̱stasyai̍ namo̱ yatama̍syāṃ di̱śīta̍ḥ

346.13

yo'̱bhiyā̍to ni̱laya̍te tvāṃ ru̱dra nicikī̍rṣati
pa̱ścāda̍nuprayu̱ṅkte taṃ vi̱ddhasya̍ pada̱nīriva̍

346.14

bha̱vāru̱drau sa̱yujau̍ saṃvidā̱nāvu̱bhāvu̱grau ca̍rato vī̱ryā̍ya
tābhyā̱ṃ namo̱ yatama̍syāṃ di̱śīta̍ḥ

346.15

nama̍ste'stvā̱yate̱ namo̍ astu parā̱yate̍
nama̍ste rudra tiṣṭha̍ta āsī̍nāyo̱ta te̱ nama̍ḥ

346.16

nama̍ḥ sā̱yaṃ nama̍ḥ prā̱tarnamo̱ rātryā̱ namo̱ divā̍
bha̱vāya̍ ca śa̱rvāya̍ co̱bhābhyā̍makara̱ṃ nama̍ḥ

346.17

sa̱ha̱srā̱kṣama̍tipa̱śyaṃ pu̱rastā̍dru̱dramasya̍ntaṃ bahu̱dhā vi̍pa̱ścita̍m
mopā̍rāma ji̱hvaye̍ya̍mānam

346.18

śyā̱vāśva̍ṃ kṛ̱ṣṇamasi̍taṃ mṛ̱ṇanta̍ṃ bhī̱maṃ ratha̍ṃ ke̱śina̍ṃ: pā̱daya̍ntam
pūrve̍ pratī̱mo namo̍ a̱stvasmai̍

346.19

mā no̍bhi̱ strā matrya̍ṃ de̱vahe̍tiṃ mā na̍: krudhaḥ paśupate̱ nama̍ste
anya̱trāsmaddivyā̱ṃ śākhā̱ṃ vi dhū̍nu

346.20

mā nau̍ hiṃsīradhi̍ no brūhi pari̍ ṇo vṛṅdhi̱ mā kru̍dhaḥ | mā tvayā̱ sama̍rāmahi

346.21

mā no̱ goṣu̱ puru̍ṣeṣu mā gṛ̍dho no a̱jāvi̍ṣu
anyatraugra̱ vi va̍rtaya piyā̱rūṇā̍ṃ pra̱jāṃ ja̍hi

346.22

yasya̍ ta̱kmā kāsi̍kā he̱tireka̱maśva̍syeva vṛṣa̱ṇaḥ kranda̱ eti̍
a̱bhi̱pūrva̱ṃ nirṇa̍yate̱ namo̍ a̱stvasmai̍

346.23

yo'̱ntari̍kṣe tiṣṭha̍ti̱ viṣṭa̍bhitoryajvanaḥ pramṛ̱ṇandeva̍pī̱yūn
tasmai̍ namo̱ daśa̍bhiḥ śakva̍rībhiḥ

346.24

tubhya̍māra̱ṇyāḥ pa̱śavo̍ mṛ̱gā vane̍ hi̱tā haṃsāḥ su̍pa̱rṇāḥ śa̍ku̱nā vayā̍ṃsi
tava̍ ya̱kṣaṃ pa̍śupate apsva̱1̱ntara̱stubhya̍ṃ kṣaranti di̱vyā āpo̍ vṛ̱dhe

346.25

śi̍ṃśumā̱rā a̍jagara̱āḥ pu̍rīka̱yā ja̱ṣā matsyā̍ raja̱sā yebhyo̱ asya̍si
na te̍ dūra̱ṃ na pa̍ri̱ṣṭhāsti̍ te bhava sa̱dyaḥ sarvā̱npari̍
paśyasi̱ bhūmi̍ṃ pūrve̍smāddha̱ṃsyutta̍rasmintsamu̱dre

346.26

mā nau̍ ru̱dra ta̱kmanā̱ mā vi̱ṣeṇa̱ mā na̍ḥ saṃ srā̍ di̱vyenā̱gninau̍
a̱nyatrā̱smadvi̱dyuta̍ṃ pātayaitām

346.27

bhuvo di̱vo bhava̱ īśe̍ pṛthi̱vyā bhava̱ ā pa̍pra u̱rva1̱̍ntari̍kṣam
tasmai̍ namo̱ yata̍masyāṃ di̱śī3ta̍ḥ

346.28

bhava̍ rā̱janya̍rjamānāya mṛḍa pa̱śūnāṃ hi pa̍śupa̱tirba̱bhūtha̍
yaḥ śra̱ddadhā̍ti̱ santi̍ de̱vā iti̱ catu̍ṣpade dvi̱pade̍sya mṛḍa

346.29

mā nau̍ ma̱hānta̍muta mā nau̍ arbha̱kaṃ mā no̱ vaha̍ntamuta mā nau vakṣya̱taḥ
mā nau̍ hiṃsīḥ pi̱tara̍ṃ mā̱tara̍ṃ ca̱ svāṃ ta̱nva̍ṃ 1 rudra mā rīriṣo naḥ

346.30

ru̱drasyai̍lava̱kāre̍bhyo'sa̱ṃsakta̍gilebhya̍ḥ
i̱daṃ ma̍hā̱sye̍bhya̱ḥ śvabhyo̍ akara̱ṃ nama̍ḥ

346.31

nama̍ste ghoṣi̱ṇībhyo̱ nama̍ste ke̱śinī̍bhyaḥ
namo̍ namaskṛ̱tābhyo̱ nama̍ḥ saṃbhu̱ñjatī̍bhyaḥ
nama̍ste deva̱ senā̍bhya̱ḥ svasti no̱ abha̍yaṃ ca naḥ

Linked texts (4)